മലയാളികള്ക്ക് ഏറെ പ്രിയപ്പെട്ട അഭിനേത്രിമാരില് ഒരാളാണ് മഞ്ജു വാര്യര്. ഏറെ വര്ഷത്തെ ഇടവേളക്ക് ശേഷം മഞ്ജു തിരിച്ചുവരവ് നടത്തിയ ചിത്രമായിരുന്നു ഹൗ ഓള്ഡ് ആര് യു. റോഷന് ആന്ഡ്രൂസ് ആയിരുന്നു ഈ സിനിമ സംവിധാനം ചെയ്തത്.
ഇപ്പോള് ഹൗ ഓള്ഡ് ആര് യു സിനിമയെ കുറിച്ചും മഞ്ജു വാര്യരുടെ തിരിച്ചു വരവിനെ കുറിച്ചും പറയുകയാണ് സംവിധായകന്. മഞ്ജു വാര്യര് സിനിമയിലേക്ക് തിരിച്ച് വരുന്നതിന് മുമ്പേ താന് ആലോചിച്ച കഥയായിരുന്നു അതെന്നാണ് അദ്ദേഹം പറയുന്നത്.
നടിയുടെ തിരിച്ചുവരവിന്റെ വാര്ത്ത അറിഞ്ഞപ്പോള് രണ്ട് കഥകളുമായി തങ്ങള് മഞ്ജുവിനെ സമീപിച്ചെന്നും അതിലൊന്ന് മഞ്ജു വാര്യരും പൃഥ്വിരാജും പ്രധാന കഥാപാത്രമായെത്തുന്ന മേഴ്സി കില്ലിങ്ങിന്റെ കഥപറയുന്ന ചിത്രമായിരുന്നെന്നും റോഷന് ആന്ഡ്രൂസ് പറയുന്നു.
‘രണ്ടാമത്തേതായിരുന്നു ഹൗ ഓള്ഡ് ആര് യു. അവസാനഘട്ട ചര്ച്ചയില് രണ്ടാമത്തെ കഥയുമായി ഞങ്ങള് മുന്നോട്ടുപോകാന് തീരുമാനിച്ചു. അങ്ങനെയാണ് ഹൗ ഓള്ഡ് ആര് യു എന്ന ചിത്രത്തിലെ നിരുപമ രാജീവായി മഞ്ജു വാര്യര് സിനിമയിലേക്ക് വീണ്ടുമെത്തുന്നത്. അതൊരു ചരിത്രപരമായ നിയോഗമായിരുന്നു,’ റോഷന് ആന്ഡ്രൂസ് പറയുന്നു.
മഞ്ജു വാര്യരുടെ സ്വഭാവത്തിലെ ഏറ്റവും വലിയ ക്വാളിറ്റി ഡെഡിക്കേഷനും ഇന്വോള്മെന്റുമാണെന്നും സംവിധായകന് അഭിമുഖത്തില് പറഞ്ഞു.
എല്ലാ കാര്യത്തിലും അത് കാണാമെന്നും രാവിലെ ഏഴുമണിക്ക് ഫസ്റ്റ് ഷോട്ട് പ്ലാന് ചെയ്താല് ആറേമുക്കാലിന് മേക്കപ്പ് ചെയ്ത് മഞ്ജു സെറ്റിലെത്തുമെന്നും അദ്ദേഹം കൂട്ടിച്ചേര്ത്തു.
‘എന്റെ സിനിമാസൗഹൃദത്തില് നല്ല ഹ്യൂമര് സെന്സുള്ള ഫ്രണ്ടാണ് മഞ്ജു. നമ്മുടെ പല കാര്യങ്ങളും പറയാതെ തന്നെ അവര്ക്ക് മനസിലാകും,’ റോഷന് ആന്ഡ്രൂസ് പറയുന്നു.
Content Highlight: Roshan Andrews Talks About Manju Warrier