നവാഗതനായ നഹാസ് ഹിദായത്തിന്റെ സംവിധാനത്തില് ആന്റണി വര്ഗീസ്, നീരജ് മാധവ്, ഷെയ്ന് നിഗം എന്നിവര് കേന്ദ്രകഥാപാത്രങ്ങളായെത്തിയ ആര്.ഡി.എക്സ് തിയേറ്ററുകളില് മികച്ച പ്രതികരണം നേടി പ്രദര്ശനം തുടരുകയാണ്.
ആക്ഷന് രംഗങ്ങള്ക്ക് പ്രാധ്യാനം നല്കി കഥപറയുന്ന ചിത്രത്തിന് മികച്ച അഭിപ്രായമായിരുന്നു ആദ്യ ദിനം ലഭിച്ചത്. ഏറെ കാലങ്ങള്ക്ക് ശേഷം തിയേറ്ററില് കണ്ട കിടിലന് ആക്ഷന് സിനിമയെന്നും, രോമാഞ്ചം തരുന്ന രംഗങ്ങളാണ് സിനിമയില് ഉള്ളതെന്നുമൊക്കെയാണ് സിനിമ ആദ്യ ദിനം കണ്ടവര് പറഞ്ഞത്.
ഒമ്പത് ദിവസം കൊണ്ട് ആഗോള ബോക്സ് ഓഫീസില് നിന്ന് 50 കോടി നേടിയ ചിത്രം ഇക്കഴിഞ്ഞ ഞായറാഴ്ചയും കാര്യമായി പ്രേക്ഷകരെ തിയേറ്ററുകളില് എത്തിച്ചു.
ഈ ഞായറാഴ്ച കേരളത്തില് നിന്ന് ചിത്രത്തിന് 2 കോടിക്ക് അടുത്ത് കളക്ഷന് ലഭിച്ചതായാണ് റിപ്പോര്ട്ടുകള്. 17 ദിവസം കൊണ്ട് കേരളത്തില് നിന്ന് മാത്രം 45 കോടിയിലേറെ നേടിയിരിക്കുന്ന ചിത്രം വൈകാതെ കേരളത്തില് നിന്ന് മാത്രമായി 50 കോടി ക്ലബ്ബില് ഇടംപിടിക്കുമെന്നാണ് കരുതുന്നത്.
അതേസമയം ആഗോള ബോക്സ് ഓഫീസില് നിന്ന് ചിത്രം ഇതുവരെ 75 കോടി നേടിയതായാണ് ബോക്സ് ഓഫീസ് ട്രാക്കര്മാര് അറിയിക്കുന്നത്. ചിത്രം ഇനിയും ബോക്സ് ഓഫീസില് അത്ഭുതം സൃഷ്ടിക്കുമെന്ന് തന്നെയാണ് കരുതപ്പെടുന്നത്.
ജനപ്രീതി കണക്കിലെടുത്ത് വലിയ തിയേറ്ററുകളും കൂടുതല്
സ്ക്രീനുകളും സിനിമക്ക് ഇപ്പോള് ലഭിക്കുന്നുണ്ട്. വീക്കെന്ഡ് ബ്ലോക്ക്ബസ്റ്റേഴ്സിന്റെ ബാനറില് സോഫിയ പോളാണ് ആര്.ഡി.എക്സ് നിര്മിക്കുന്നത്.
ആദര്ശ് സുകുമാരന്, ഷബാസ് റഷീദ് എന്നിവരുടേതാണ് ആര്.ഡി.എക്സിന്റെ തിരക്കഥ. കെ.ജി.എഫ്, വിക്രം, ബീസ്റ്റ് തുടങ്ങിയ ചിത്രങ്ങള്ക്ക് സംഘട്ടനം ഒരുക്കിയ അന്ബ് അറിവാണ് ഈ ചിത്രത്തിന്റെ ആക്ഷന് രംഗങ്ങള് കൈകാര്യം ചെയ്യുന്നത്. ബാബു ആന്റണി, ലാല്, ഐമ റോസ്മി സെബാസ്റ്റ്യന്, മഹിമ നമ്പ്യാര്, മാല പാര്വതി, ബൈജു തുടങ്ങിയവരും ചിത്രത്തില് അഭിനയിക്കുന്നുണ്ട്.
എഡിറ്റര് – ചമന് ചാക്കോ, ഛായാഗ്രഹണം – അലക്സ് ജെ. പുളിക്കല്, സംഗീതസംവിധാനം – സാം സി. എസ്, വരികള് മനു മന്ജിത്, കോസ്റ്റംസ് – ധനു ബാലകൃഷ്ണന്, മേക്കപ്പ് – റോണക്സ് സേവ്യര്, ആര്ട്ട് ഡയറക്ടര് – ജോസഫ് നെല്ലിക്കല്, ഫിനാന്സ് കണ്ട്രോളര് – ബണ് സി. സൈമണ്, പ്രൊഡക്ഷന് കണ്ട്രോളര് – ജാവേദ് ചെമ്പ്.