ഗുരുവിന്റെ ആശയങ്ങളെ പകര്‍ത്തി എസ്.എന്‍.ഡി.പിയെ നയിക്കാന്‍ വെള്ളാപ്പള്ളിയ്ക്കാകട്ടെ; മുഖ്യമന്ത്രിയുടെ പ്രസംഗത്തിന്റെ പൂര്‍ണരൂപം

തിരുവനന്തപുരം: എസ്.എന്‍.ഡി.പി ശാഖയുടെ ആഭിമുഖ്യത്തില്‍ നിര്‍മിച്ച ശ്രീനാരായണീയം കണ്‍വെന്‍ഷന്‍ സെന്ററിന്റെ ഉദ്ഘാടനം നിര്‍വഹിച്ച് മുഖ്യമന്ത്രി പിണറായി വിജയന്‍. എസ്.എന്‍.ഡി.പി യോഗത്തിന്റെ നേതൃത്വത്തില്‍ 30 സംവത്സരം പൂര്‍ത്തിയാക്കുന്ന വെള്ളാപ്പള്ളി നടേശനെയും മുഖ്യമന്ത്രി ചടങ്ങില്‍ ആദരിച്ചു.

നമ്മുടെ സമൂഹചരിത്രത്തിന്റെ ഒരു പ്രത്യേക ഘട്ടത്തില്‍, സമൂഹം ജാതിയുടെ അനാചാരങ്ങളുടെ അന്ധവിശ്വാസങ്ങളുടെ ഇരുട്ടില്‍ തളയ്ക്കപ്പെട്ടുപോയിരുന്ന വേളയിലാണ് എസ്.എന്‍.ഡി.പിയോഗം രൂപീകൃതമാകുന്നതെന്ന് മുഖ്യമന്ത്രി പറഞ്ഞു.

വിദ്യകൊണ്ട് പ്രബുദ്ധരാകുക, സംഘടന കൊണ്ട് ശക്തരാകുക എന്നതായിരുന്നു ശ്രീനാരായണ ഗുരുവിന്റെ ആഹ്വാനമെന്നും ഇത് നാടാകെ ഏറ്റെടുത്തതിന്റെ ഫലം നമ്മുടെ സമൂഹത്തില്‍ കാണാന്‍ കഴിയുന്നുണ്ടെന്നും മുഖ്യമന്ത്രി പറഞ്ഞു.

അറിവാണ് യഥാര്‍ത്ഥ ശക്തിയെന്നും അത് നേടാനുള്ള ഏക മാര്‍ഗം വിദ്യാഭ്യാസമാണെന്നും ഗുരു പഠിപ്പിച്ചെന്നും അന്നത്തെ കാലത്ത് അക്ഷരം പോലും നിഷേധിക്കപ്പെട്ട ഒരു വലിയ വിഭാഗം ജനതയ്ക്ക് അറിവിന്റെ വാതിലുകള്‍ തുറന്നുകൊടുക്കാന്‍ എസ്.എന്‍.ഡി.പി യോഗം അക്ഷീണം പ്രവര്‍ത്തിച്ചെന്നും മുഖ്യന്ത്രി കൂട്ടിച്ചേര്‍ത്തു.

ജാതിയും മതവും പടര്‍ത്തിയ അന്ധവിശ്വാസങ്ങള്‍, അനാചാരങ്ങള്‍ ഇതെല്ലാം കേരളത്തില്‍ തൂത്തെറിയാന്‍ കഴിഞ്ഞത് നമ്മുടെ നവോത്ഥാന ആശയങ്ങള്‍ ശക്തമായി പ്രചരിപ്പിച്ചതിന്റെ ഭാഗമാണെന്നും പക്ഷേ ഇവിടേയും അത്തരത്തിലുള്ള പിന്തിരിപ്പന്‍ ആശയങ്ങള്‍ വേരുപിടിപ്പിക്കാനുള്ള ശ്രമങ്ങള്‍ നടക്കുന്നു എന്നത് ഗൗരവമായി കാണണമെന്നും മുഖ്യമന്ത്രി പറഞ്ഞു.

‘വര്‍ഗീയത അത് ഏത് രൂപത്തിലുള്ളതായാലും സമൂഹത്തിന് വിനാശകരമായ ഒന്നാണ്. അത് സമൂഹത്തെയാകെ അപ്പാടെ നശിപ്പിക്കുകയാണ് ചെയ്യുക. അതുകൊണ്ട് വര്‍ഗീയതയുടെ വിഷവിത്തുകള്‍ മനുഷ്യരുടെ മനസുകളില്‍ നട്ടുപിടിപ്പിക്കാന്‍ ശ്രമിക്കുന്നവരെ തിരിച്ചറിയാന്‍ നമുക്ക് കഴിയേണ്ടതുണ്ട്.

കേരളത്തിന് വെളിച്ചം പകര്‍ന്ന ശ്രീനാരായണ ഗുരുവിനെ പോലും സ്വന്തമാക്കാന്‍ ചില വര്‍ഗീയ ശക്തികള്‍ വല്ലാതെ പാടുപെടുന്നത് കാണാന്‍ നമുക്ക് കഴിയും. വര്‍ഗീയതയുടെ വിഷം ചീറ്റാന്‍ ഗുരുവിന്റെ തന്നെ ദര്‍ശനങ്ങളെ ദുരുപയോഗിക്കാന്‍ ശ്രമിക്കുന്നതും ചിലപ്പോള്‍ നമ്മള്‍ കാണുന്നുണ്ട്,’ മുഖ്യമന്ത്രി പറഞ്ഞു.

എന്നും വര്‍ഗീയതയെ എതിര്‍ത്ത ഗുരു ശ്രേഷ്ഠനായിരുന്നു ശ്രീ നാരായണ ഗുരു. മനുഷ്യരെ ഭിന്നിപ്പിക്കാനല്ല ഒരുമിപ്പിക്കാനാണ് ഗുരു പഠിപ്പിച്ചത്. ഗുരുവിന്റെ വാക്കുകളും പ്രവര്‍ത്തനങ്ങളും ഒരു മതത്തിലോ ജാതിയിലോ മാത്രമായി ഒതുങ്ങുന്നതായിരുന്നില്ല. അത് എല്ലാ മനുഷ്യര്‍ക്കും വേണ്ടിയുള്ളതായിരുന്നു.

മാത്രമല്ല സനാതന ധര്‍മ പ്രചാരകര്‍ക്ക് എതിര്‍ ദിശയിലാണ് ഗുരു എപ്പോഴും നിലകൊണ്ടത്. സനാതന ധര്‍മമെന്നതിനെ ഗുരു കണ്ടത് മനുഷ്യനെ തുല്യനായി കാണുന്നതും ഒരുമിച്ച് നിര്‍ത്തുന്നതുമായ ഒരു ദര്‍ശനമായിട്ടാണെന്നും മുഖ്യമന്ത്രി പറഞ്ഞു.

മുഖ്യമന്ത്രിയുടെ പ്രസംഗത്തിന്റെ പൂര്‍ണരൂപം

എസ്.എന്‍.ഡി.പി ശാഖയുടെ ആഭിമുഖ്യത്തില്‍ നിര്‍മിച്ച ശ്രീനാരായണീയം കണ്‍വെന്‍ഷന്‍ സെന്ററിന്റെ ഉദ്ഘാടനമാണ് ഒരു പരിപാടി. അതേപോലെ തന്നെ എസ്.എന്‍.ഡി.പി യോഗത്തിന്റെ നേതൃത്വത്തില്‍ 30 സംവത്സരം പൂര്‍ത്തിയാക്കുന്ന ശ്രീ. വെള്ളാപ്പള്ളി നടേശനുള്ള ആദരവാണ് രണ്ടാമത്തെ പരിപാടി. ഇത് രണ്ടും എസ്.എന്‍.ഡി.പി യോഗത്തെ സംബന്ധിച്ചിടത്തോളം ഏറെ പ്രധാനപ്പെട്ട പരിപാടികളാണ് എന്ന് പ്രത്യേകം പറയേണ്ടതില്ല.

ശ്രീനാരായണ ഗുരുവിന്റെ പേരില്‍ നിര്‍മിച്ചിട്ടുള്ള ഈ കണ്‍വെന്‍ഷന്‍ സെന്റര്‍ നാട്ടിലെ പൊതുസമൂഹത്തിനാകെ ഉപകാരപ്രദമാകുന്ന ഒന്നാണ്. നവോത്ഥാന നായകനായ ശ്രീനാരായണ ഗുരു എല്ലാവരേയും ചേര്‍ത്തു പിടിക്കുക എന്ന മഹത്തായ ആശയമാണ് മുന്നോട്ടുവെച്ചത്. അദ്ദേഹം രൂപീകരിച്ച സംഘടനയാണല്ലോ എസ്.എന്‍.ഡി.പി.

കേരളത്തിന്റെ നവോത്ഥാന ചരിത്രത്തില്‍ നിര്‍ണായക പ്രാധാന്യം എസ്.എന്‍.ഡി.പിക്ക് ഉണ്ട് എന്നത് എല്ലാവര്‍ക്കും അറിയാവുന്ന കാര്യമാണ്. നമ്മുടെ സമൂഹചരിത്രത്തിന്റെ ഒരു പ്രത്യേക ഘട്ടത്തില്‍, സമൂഹം ജാതിയുടെ അനാചാരങ്ങളുടെ അന്ധവിശ്വാസങ്ങളുടെ ഇരുട്ടില്‍ തളയ്ക്കപ്പെട്ടുപോയിരുന്നു. ആ വേളയിലാണ് എസ്.എന്‍.ഡി.പിയോഗം രൂപീകൃതമാകുന്നത്.

വിദ്യകൊണ്ട് പ്രബുദ്ധരാകുക, സംഘടന കൊണ്ട് ശക്തരാകുക ശ്രീനാരായണ ഗുരുവിന്റെ ആഹ്വാനമാണിത്. ഇത് നാടാകെ ഏറ്റെടുത്തതിന്റെ ഫലം നമ്മുടെ സമൂഹത്തില്‍ കാണാന്‍ കഴിയുന്നുണ്ട്. അറിവാണ് യഥാര്‍ത്ഥ ശക്തിയെന്നും അത് നേടാനുള്ള ഏക മാര്‍ഗം വിദ്യാഭ്യാസമാണെന്നും ഗുരു പഠിപ്പിച്ചു.

അന്നത്തെ കാലത്ത് അക്ഷരം പോലും നിഷേധിക്കപ്പെട്ട ഒരു വലിയ വിഭാഗം ജനതയുണ്ട്. ആ ജനതയ്ക്ക് അറിവിന്റെ വാതിലുകള്‍ തുറന്നുകൊടുക്കാന്‍ എസ്.എന്‍.ഡി.പി യോഗം അക്ഷീണം പ്രവര്‍ത്തിച്ചു. സ്‌കൂളുകള്‍ സ്ഥാപിച്ചു, വായനശാലകള്‍ തുടങ്ങി. അങ്ങനെ അറിവിന്റെ വെളിച്ചം ഓരോ വീട്ടിലും എത്തിച്ചു. അത് സമൂഹത്തിലുണ്ടാക്കിയ മാറ്റം ചെറുതായിരുന്നില്ല.

അതുപോലെ തന്നെ വര്‍ഗീയതയെ സമൂഹത്തില്‍ നിന്നകറ്റാന്‍ എല്ലാ വിഭാഗം ഒരുമിച്ചു നില്‍ക്കുന്ന, ജനങ്ങളെയാകെ ഒരുമിച്ച് നിര്‍ത്തുന്ന സംഘടനകള്‍ക്ക് മാത്രമേ സാധിക്കുകയുള്ളൂവെന്ന് ഗുരു പഠിപ്പിക്കുകയുണ്ടായി, എസ്.എന്‍.ഡി.പി യോഗത്തിന്റെ രൂപീകരണത്തിന് തന്നെ വഴിതെളിയിച്ചത് ഇത്തരം കാര്യങ്ങളായിരുന്നു.

ശ്രീനാരായാണ ഗുരുവിന്റെ ദര്‍ശനങ്ങള്‍ പ്രായോഗികമായി നടപ്പിലാക്കുന്നതിന് എസ്.എന്‍.ഡി.പി യോഗം വഹിച്ച മുന്‍കൈ വിവരണാതീതമാണ്. പിന്നോക്കം നില്‍ക്കുന്ന ജനങ്ങളുടെ ആത്മാഭിമാനം തിരിച്ചുപിടിക്കാന്‍ വലിയ പ്രവര്‍ത്തനമാണ് ആ സംഘടന നടത്തിയത്. അതേപോലെ തന്നെ പിന്നോക്കം നില്‍ക്കുന്ന ജനങ്ങള്‍ക്ക് വിദ്യാഭ്യാസം, തൊഴില്‍, സാമൂഹ്യ പദവി ഇവയെല്ലാം ലഭ്യമാക്കാനും യോഗം അക്ഷീണം പ്രവര്‍ത്തിച്ചു. അതിനൊക്കെ നല്ല ഫലവുമുണ്ടായി.

അയ്യാ വൈകുണ്ഠനും ശ്രീനാരായണ ഗുരുവും ചട്ടമ്പി സ്വാമികളും പൊയ്കയില്‍ കുമാരഗുരുവും മക്തി തങ്ങളും അടക്കമുള്ള ഗുരുവര്യന്മാരുടെ നേതൃത്വത്തില്‍ നടന്ന നവോത്ഥാന പ്രക്രിയയാണ് കേരളം നേടിയ പല നേട്ടങ്ങളുടെയും അടിത്തറ.

അവിടെ നിന്നും കേരളം ഇന്ന് കാണുന്ന പുരോഗതിയിലേക്ക് എത്തിയിട്ടുണ്ട്. നവോത്ഥാന പ്രസ്ഥാനം നമ്മുടെ സംസ്ഥാനത്തുള്ളതിനേക്കാളും ശക്തമായി നിന്ന ചില സംസ്ഥാനങ്ങള്‍ ഉണ്ടായിരുന്നു. പക്ഷേ അവിടെ മനുഷ്യര്‍ക്കിടയിലുള്ള വേര്‍തിരിവുകള്‍ അവസാനിച്ചതായി നാം കാണുന്നില്ല. അവിടങ്ങളില്‍ ജാതിചിന്തയും അതിന്റെ ഭാഗമായി വേര്‍തിരിവുകളും എല്ലാം നിലനില്‍ക്കുന്നതായി തന്നെ, തുടരുന്നതായി തന്നെ നാം കാണുന്നു.

എന്നാല്‍ കേരളീയ സമൂഹം ഒരു മാതൃകാസമൂഹം എന്ന നിലയില്‍ ഉയര്‍ന്നതിന് പിന്നില്‍ നവോത്ഥാനം കൊളുത്തിവിട്ട വെളിച്ചം അത് ഒട്ടും തന്നെ കെട്ടുപോകാതെ മുന്നോട്ടു കൊണ്ടുപോയ നമ്മുടെ നാടിന്റെ അനുഭവവും അതില്‍ ഇടതുപക്ഷ പുരോഗമന പ്രസ്ഥാനങ്ങള്‍ വഹിച്ച പങ്ക് ആര്‍ക്കും നിഷേധിക്കാനാവുന്നതല്ല.

ഗുരുവിന്റെ വാക്കുകള്‍ ‘മനുഷ്യാണാം മനുഷ്യത്വം ജാതി’ ഇത് ആവര്‍ത്തിച്ച് ഓര്‍മിക്കേണ്ട കാലമാണ് ഇത്. മനുഷ്യനെ മനുഷ്യനായി കാണാന്‍ ജാതിയുടേയും മതത്തിന്റേയും വേലിക്കെട്ടുകള്‍ക്കപ്പുറം സാഹോദര്യത്തോടെ ജീവിക്കാന്‍ ഈ വാക്കുകള്‍ പഠിപ്പിക്കുന്നു. സമൂഹത്തില്‍ വര്‍ഗീയത പടര്‍ത്തി മനുഷ്യരെ ഭിന്നിപ്പിക്കാന്‍ ബോധപൂര്‍വമായ ശ്രമങ്ങള്‍ പലയിടത്തും നടക്കുന്നതായി നമുക്കറിയാം.

ജാതിയും മതവും പടര്‍ത്തിയ അന്ധവിശ്വാസങ്ങള്‍, അനാചാരങ്ങള്‍ ഇതെല്ലാം കേരളത്തില്‍ തൂത്തെറിയാന്‍ കഴിഞ്ഞത് നമ്മുടെ നവോത്ഥാന ആശയങ്ങള്‍ ശക്തമായി പ്രചരിപ്പിച്ചതിന്റെ ഭാഗമാണ്. പക്ഷേ ഇവിടേയും അത്തരത്തിലുള്ള പിന്തിരിപ്പന്‍ ആശയങ്ങള്‍ വേരുപിടിപ്പിക്കാനുള്ള ശ്രമങ്ങള്‍ നടക്കുന്നു എന്നത് ഗൗരവമായി കാണണം.

നാം ഉള്‍ക്കൊള്ളേണ്ട കാര്യം വര്‍ഗീയത അത് ഏത് രൂപത്തിലുള്ളതായാലും സമൂഹത്തിന് വിനാശകരമായ ഒന്നാണ്. അത് സമൂഹത്തെയാകെ അപ്പാടെ നശിപ്പിക്കുകയാണ് ചെയ്യുക. അതുകൊണ്ട് വര്‍ഗീയതയുടെ വിഷവിത്തുകള്‍ മനുഷ്യരുടെ മനസുകളില്‍ നട്ടുപിടിപ്പിക്കാന്‍ ശ്രമിക്കുന്നവരെ തിരിച്ചറിയാന്‍ നമുക്ക് കഴിയേണ്ടതുണ്ട്.

ഒരുകാര്യം ഇവിടെ പ്രത്യേകം ശ്രദ്ധിക്കേണ്ടതുണ്ട്. കേരളത്തിന് വെളിച്ചം പകര്‍ന്ന ശ്രീനാരായണ ഗുരു, അദ്ദേഹത്തെ പോലും സ്വന്തമാക്കാന്‍ ചില വര്‍ഗീയ ശക്തികള്‍ വല്ലാതെ പാടുപെടുന്നത് കാണാന്‍ നമുക്ക് കഴിയും. വര്‍ഗീയതയുടെ വിഷം ചീറ്റാന്‍ ഗുരുവിന്റെ തന്നെ ദര്‍ശനങ്ങളെ ദുരുപയോഗിക്കാന്‍ ശ്രമിക്കുന്നതും ചിലപ്പോള്‍ നമ്മള്‍ കാണുന്നുണ്ട്.

ഇവിടെ ഒരു കാര്യം അര്‍ത്ഥശങ്കയ്ക്കിടയില്ലാതെ വ്യക്തമാണ്. എന്നും വര്‍ഗീയതയെ എതിര്‍ത്ത ഗുരു ശ്രേഷ്ഠനായിരുന്നു ശ്രീ നാരായണ ഗുരു. മനുഷ്യരെ ഭിന്നിപ്പിക്കാനല്ല ഒരുമിപ്പിക്കാനാണ് ഗുരു പഠിപ്പിച്ചത്. ഗുരുവിന്റെ വാക്കുകളും പ്രവര്‍ത്തനങ്ങളും ഒരു മതത്തിലോ ജാതിയിലോ മാത്രമായി ഒതുങ്ങുന്നതായിരുന്നില്ല. അത് എല്ലാ മനുഷ്യര്‍ക്കും വേണ്ടിയുള്ളതായിരുന്നു.

മാത്രമല്ല സനാതന ധര്‍മ പ്രചാരകര്‍ക്ക് എതിര്‍ ദിശയിലാണ് ഗുരു എപ്പോഴും നിലകൊണ്ടത്. സനാതന ധര്‍മമെന്നതിനെ ഗുരു കണ്ടത് മനുഷ്യനെ തുല്യനായി കാണുന്നതും ഒരുമിച്ച് നിര്‍ത്തുന്നതുമായ ഒരു ദര്‍ശനമായിട്ടാണ്. ജാതിയുടേയും ഉച്ചനീചത്വങ്ങളുടേയും പേരില്‍ ഇപ്പോള്‍ ചിലര്‍ പ്രചരിപ്പിക്കുന്ന സനാധന ധര്‍മം ഗുരുവിന്റെ ദര്‍ശനങ്ങള്‍ക്ക് കടകവിരുദ്ധവുമാണ്.

ഗുരുവിന്റെ വാക്കുകള്‍ അവനവനാത്മസുഖത്തിന് ആചരിക്കുന്നവ അപരന്ന് സുഖത്തിനായി വരണം എന്നതാണ്. ഇത് വര്‍ഗ്ഗീയതയ്ക്ക് എതിരെയുള്ള ശക്തമായ ആഹ്വാനമാണ്. ഒരു മനുഷ്യന്റെയും മനസ്സ് വേദനിപ്പിക്കാതെ, സ്നേഹത്തോടെയും സാഹോദര്യത്തോടെയും ജീവിക്കാനാണ് അദ്ദേഹം ആഹ്വാനം ചെയ്തത്. മനുഷ്യത്വത്തിന്റെ പാത വെട്ടിത്തന്ന ഗുരുവിന്റെ വഴികളില്‍ നിന്ന് വ്യതിചലിക്കാതിരിക്കാന്‍ പ്രത്യേകം ശ്രദ്ധിക്കേണ്ടതായിട്ടുണ്ട്.

മഹത്തായ പ്രസ്ഥാനമാണ് എസ്.എന്‍.ഡി.പി. ആ എസ്.എന്‍.ഡി.പി യോഗത്തിന്റെ കഴിഞ്ഞ 3 പതിറ്റാണ്ടിലേറെയുള്ള നേതൃത്വമാണ് ശ്രീ. വെള്ളാപ്പള്ളി നടേശന്‍ നയിക്കുന്നത്. അദ്ദേഹത്തെ ഇന്നിവിടെ ആദരിക്കുന്നത് എല്ലാ അര്‍ത്ഥത്തിലും ഔചിത്യപൂര്‍ണമായ നടപടിയാണ്.

എസ്.എന്‍.ഡി പി യോഗം ജനറല്‍ സെക്രട്ടറി, എസ്.എന്‍.ട്രസ്റ്റ് സെക്രട്ടറി ഇത്തരം പദവികളില്‍ കഴിഞ്ഞ 30 ദശാബ്ദമായി അദ്ദേഹം തുടരുന്നു എന്നത് ചെറിയ കാര്യമല്ല. ഒരു ഒരു പ്രസ്ഥാനത്തെ നിരന്തരമായി മുന്നോട്ടു നയിക്കാനും, അതിന്റെ ലക്ഷ്യങ്ങള്‍ നേടാനും, പുതിയ തലമുറയ്ക്ക് വഴികാട്ടാനും ഒരു നേതാവിന് എത്രത്തോളം ദൃഢനിശ്ചയം ഉണ്ടാകണമെന്ന് വെള്ളാപ്പള്ളി കാണിച്ചുതരുന്നുണ്ട്.

ഈ സംഘടനയെ ശക്തമായ ഒരു സാമ്പത്തിക ശക്തിയാക്കി വളര്‍ത്തിയെടുക്കുന്നതില്‍ അദ്ദേഹം കാണിച്ച ദീര്‍ഘവീക്ഷണവും പ്രായോഗിക ബുദ്ധിയും അഭിനന്ദനാര്‍ഹമാണ്. സാമ്പത്തികമായി പിന്നോക്കം നില്‍ക്കുന്നവര്‍ക്ക് വിദ്യാഭ്യാസവും തൊഴിലും ലഭിക്കുമ്പോള്‍ മാത്രമാണ് യഥാര്‍ത്ഥ സാമൂഹികനീതി നടപ്പാക്കപ്പെടുക എന്ന ഗുരുവിന്റെ ദര്‍ശനങ്ങളെ പ്രാവര്‍ത്തികമാക്കുന്നതിലും അദ്ദേഹം ശ്രദ്ധവെക്കുന്നുണ്ട്.

ഗുരുവിന്റെ ആശയങ്ങളെ ജീവിതത്തില്‍ പകര്‍ത്തിക്കൊണ്ട് ഈ പ്രസ്ഥാനത്തെ ഇനിയും കൂടുതല്‍ കാലം നയിക്കാന്‍ ശ്രീ. വെള്ളാപ്പള്ളിയ്ക്ക് കഴിയട്ടെ എന്ന് ആശംസിക്കുകയും അദ്ദേഹത്തിന്റെ നേതൃത്വത്തില്‍ യോഗം കൂടുതല്‍ ഉയരങ്ങളിലേക്ക് എത്തട്ടെ എന്നുകൂടി ആശംസിച്ചുകൊണ്ട്, ഈ ചടങ്ങിന്റെ ഔപചാരികമായ ഉദ്ഘാടനം കൂടി നിര്‍വഹിക്കുന്നു. നിങ്ങള്‍ക്കെന്റെ സ്‌നേഹാഭിവാദ്യങ്ങള്‍.

Content Highlight: Pinarayi Vijayan about SreeNarayana Guru and SNDP Full Text