ടി.ജി. മോഹന്‍ദാസിനെതിരെ കേസടുക്കണം: പരാതി നല്‍കി എസ്.എഫ്.ഐയും യൂത്ത് കോണ്‍ഗ്രസും

തിരുവനന്തപുരം: വിദ്യാഭ്യാസ മന്ത്രി ധര്‍മേന്ദ്ര പ്രധാന്റെ രാജി ആവശ്യപ്പെട്ട് ദല്‍ഹി ജന്തര്‍ മന്ദറില്‍ പ്രതിഷേധിച്ച വിദ്യാര്‍ത്ഥികള്‍ക്കെതിരായ വിദ്വേഷ പരാമര്‍ശങ്ങള്‍ നടത്തിയ സംഘപരിവാര്‍ പ്രചാരകന്‍ ടി.ജി. മോഹന്‍ദാസിനെതിരെ കേസെടുക്കാനാവശ്യപ്പെട്ട് യൂത്ത് കോണ്‍ഗ്രസും എസ്.എഫ്.ഐയും പൊലീസില്‍ പരാതി നല്‍കി.

താനായിരുന്നു ഭരിക്കുന്നതെങ്കില്‍ ജന്തര്‍ മന്ദറില്‍ കര്‍ഫ്യൂ പ്രഖ്യാപിക്കുകയും പിരിഞ്ഞ് പോകാത്ത വിദ്യാര്‍ത്ഥികള്‍ക്ക് നേര്‍ക്ക് വെടിവെപ്പ് നടത്തുകയും ചെയ്യുമായിരുന്നുവെന്നായിരുന്നു ഇന്നലെ ഒരു വീഡിയോയില്‍ മോഹന്‍ദാസ് നടത്തിയ വിദ്വേഷ പരാമര്‍ശങ്ങളിലൊന്ന്. വെടിവെപ്പില്‍ കുറേ പേര്‍ മരണപ്പെടുമായിരുന്നെന്നും അവരുടെ ശവങ്ങള്‍ പെറുക്കിയെടുത്ത് ആശുപത്രിയില്‍ എത്തിക്കുമായിരുന്നെന്നും മോഹന്‍ദാസ് വിദ്വേഷ പരാമര്‍ശം നടത്തിയിരുന്നു.

മോഹന്‍ദാസിനെതിരെ യൂത്ത് കോണ്‍ഗ്രസ് സംസ്ഥാന ജനറല്‍ സെക്രട്ടറി വി.പി. ദുല്‍കിഫിലും എസ്.എഫ്.ഐ  തിരുവനന്തപുരം ജില്ലാ സെക്രട്ടറി നന്ദനും പൊലീസില്‍ പരാതി നല്‍കി. ഡി.ജി.പിക്ക് നേരിട്ടാണ് ദുല്‍കിഫില്‍ പരാതി നല്‍കിയത്.

സമരത്തെ അധിക്ഷേപിക്കുന്ന രീതിയിലുള്ള പരാമര്‍ശങ്ങളുടെ കൂട്ടത്തില്‍ സ്ത്രീകള്‍ക്കെതിരെ വളരെ മോശമായ പരാമര്‍ശങ്ങള്‍ മോഹന്‍ദാസ് നടത്തിയതായി പരാതികളില്‍ ചൂണ്ടിക്കാട്ടുന്നു. വെടിവെച്ചു കൊല്ലാനുള്ള ആഹ്വാനവും മോഹന്‍ദാസിന്റെ ഭാഗത്തുനിന്നുണ്ടായെന്നും പരാതികളില്‍ വ്യക്തമാക്കുന്നു.

‘എനിക്ക് ഈ സിറ്റുവേഷന്‍ കയ്യില്‍ കിട്ടിയാല്‍ ഞാന്‍ എന്തു ചെയ്യും എന്ന് നിങ്ങളോട് പറയാം. ഞാന്‍ ആ പ്രദേശത്ത് കര്‍ഫ്യൂ ചുമത്തും. ജന്തര്‍ മന്ദര്‍ പരിസരത്ത് ഒരു നാല് സ്‌ക്വയര്‍ കിലോമീറ്ററില്‍ കര്‍ഫ്യൂ ചുമത്തും.

ജനക്കൂട്ടത്തോട് പിരിഞ്ഞു പോകാന്‍ മൈക്കില്‍ ആവശ്യപ്പെടും. മൂന്നു തവണ ആവശ്യപ്പെടും. പിന്നെ വെടിവയ്ക്കും.

ആളുകള്‍ ചിതറിയോടും. കുറെ പേര് മരിക്കും. കുറേ പേര് മരിക്കില്ല. കുറേ പേര്‍ക്ക് അംഗഭംഗം സംഭവിക്കും. ഏകദേശം ഒരു നാലു മണിക്കൂര്‍ കൊണ്ട് ഈ രംഗം ശാന്തമാകും. ശവങ്ങള്‍ പെറുക്കി ആശുപത്രിയില്‍ എത്തിക്കും.

കുറേ കാര്യങ്ങള്‍ നടക്കും. ഇപ്പോള്‍, ശരി ഞാന്‍ ഇങ്ങനെ ചെയ്യുന്നത് ഒരു പരിഹാരം ആണ്. പ്രക്ഷോഭം ഒക്കെ അടിച്ചമര്‍ത്താന്‍ പറ്റും. ‘ എന്നായിരുന്നു മോഹന്‍ദാസിന്റെ അതി ക്രൂരമായ പരാമര്‍ശം.

ജന്തര്‍ മന്ദറില്‍ ചെയ്ത വിദ്യാര്‍ത്ഥിനികളെ ലക്ഷ്യം വച്ച് സ്ത്രീത്വത്തെ അപമാനിക്കുന്ന വളരെ മോശമായ പരാമര്‍ശങ്ങളും മോഹന്‍ദാസ് നടത്തിയിരുന്നു. ‘വോക്ക് രാഷ്ട്രീയം പറയുന്നവര്‍ എന്ത് ഹീനകൃത്യവും ചെയ്യും’ എന്നതടക്കമുള്ള പരാമര്‍ശങ്ങളും സംഘപരിവാര്‍ പ്രചാരകന്‍ നടത്തിയിരുന്നു.

‘അട്ടിമറി നടത്തിയാല്‍ ജനങ്ങള്‍ എതിരാകും എന്ന് സി.ജെ.പിക്കും ഒപ്പമുള്ളവര്‍ക്കും അറിയാം. അതിനുപകരം ഇവര് പ്ലാന്‍ ചെയ്തിരുന്നത് ഈ എട്ടും പൊട്ടും തിരിയാത്ത ചെറുപ്പക്കാരെയും ചെറുപ്പക്കാരികളെയും ഇളക്കിവിടാനാണ്.

വോക്ക് തലയില്‍ കയറിയാല്‍ പിന്നെ അറുതല തുള്ളുന്ന പോലെയാണ്. പിന്നെ എന്തും ചെയ്യും. എന്ത് ഹീനകൃത്യം ചെയ്യും. ഇവരെ ആത്മഹത്യ ചെയ്യിക്കാന്‍ വളരെ എളുപ്പമാണ്. തലയില്‍ മണ്ണെണ്ണയോ പെട്രോള ഒഴിച്ചിട്ട് തീ കൊളുത്തുക.

ചെറുപ്പക്കാര്‍ പട്ടണങ്ങളില്‍ മാതൃകാപരമായിട്ട് എല്ലാവരും കാണുകെ തലയില്‍ മണ്ണെണ്ണ ഒഴിച്ചോ പെട്രോള്‍ ഒഴിച്ചോ തീ കൊളുത്തി എന്ന് വെക്കുക. അത് ഹാന്‍ഡില്‍ ചെയ്യാനും മാര്‍ഗങ്ങളുണ്ട്,’ എന്നാണ് സംഘപരിവാര്‍ ചിന്തകന്റെ പരാമര്‍ശം.

മോഹന്‍ദാസിനെതിരെ കേസെടുക്കണമെന്ന് എസ്.എഫ്.ഐ സംസ്ഥാന പ്രസിഡന്റ് എം. ശിവപ്രസാദ് ഇന്നലെ ആവശ്യപ്പെട്ടിരുന്നു. സമരം ചെയ്ത വിദ്യാര്‍ത്ഥികളെ വെടിവെച്ചു കൊല്ലണമെന്ന് പറഞ്ഞ ശവത്തിനെതിരെ കേസെടുക്കാന്‍ പോലീസ് തയ്യാറാവണമെന്ന് ശിവപ്രസാദ് ആവശ്യപ്പെട്ടു. ഇത്തരം മാനസ്സിക രോഗികളെ നാട്ടില്‍ ഇറങ്ങി നടക്കാന്‍ പൊതു സമൂഹം അനുവദിക്കരുതെന്നും അദ്ദേഹം ഫേസ്ബുക്ക് പോസ്റ്റില്‍ പറഞ്ഞിരുന്നു.

Content Highlight: Petition by SFi and Youth congress against TG Mohandas on Hate Comments Against Jantar Mandar Protest