ലോക കേരള സഭയുടെ പ്രവര്‍ത്തനങ്ങള്‍ക്ക് സര്‍ക്കാര്‍ പണം നല്‍കിയെന്ന്‌ ആരോപണം; ഒരു രൂപ പോലും വകയിരുത്തിയിട്ടില്ലെന്ന് മുഖ്യമന്ത്രിയുടെ ഓഫീസ്‌

തിരുവനന്തപുരം: ലോക കേരള  സഭയുടെ പ്രവര്‍ത്തനങ്ങള്‍ക്ക് പണം നല്‍കിയെന്ന്‌  ആരോപണം. ലോക കേരള സഭയുടെ പുതിയ സാമ്പത്തിക വര്‍ഷത്തേക്കുള്ള പ്രവര്‍ത്തനങ്ങള്‍ക്ക് ഭരണാനുമതി നല്‍കുകയും ഇതിനായി രണ്ട് കോടി രൂപ അനുവദിക്കുകയും ചെയ്തതായി ഒരു മലയാളം ടി.വി ചാനല്‍ റിപ്പോര്‍ട്ട് ചെയ്തു. എന്നാല്‍ ലോക കേരള സഭയുടെ ആറാമത്തെ എഡിഷനായി സര്‍ക്കാര്‍ ഒരു രൂപ പോലും വകയിരുത്തിയിട്ടില്ലെന്നു മുഖ്യമന്ത്രിയുടെ ഓഫീസ് പിന്നീട് വാര്‍ത്താക്കുറിപ്പില്‍ പ്രതികരിച്ചു.

ലോക കേരള സഭ തുടരില്ലെന്ന യു.ഡി.എഫ് നിലപാടില്‍ മാറ്റമില്ലെന്ന് വാര്‍ത്താക്കുറിപ്പില്‍ പറയുന്നു. സഭ തുടരില്ലെന്നത് യു.ഡി.എഫിന്റെ രാഷ്ടീയ തീരുമാനമാണെന്നും ആറാമത്തെ എഡിഷനായി സര്‍ക്കാര്‍ ഒരു രൂപ പോലും വകയിരുത്തിയിട്ടില്ലെന്നും മുഖ്യമന്ത്രിയുടെ ഓഫീസ് പ്രതികരിച്ചു.

പ്രവാസികള്‍ പിന്തുണക്കുന്ന പരിപാടി കണ്ണടച്ച് ഉപേക്ഷിക്കരുതെന്ന് ലീഗ് ആവശ്യപ്പെട്ടിരുന്നു.  ലോക കേരള സഭ  വെറും ധൂര്‍ത്താണെന്നായിരുന്നു പ്രതിപക്ഷത്തായിരുന്നപ്പോള്‍ വി.ഡി സതീശന്‍ അഭിപ്രായപ്പെട്ടത്.

ഇതിന് പിന്നാലെയാണ് ലോക കേരള സഭയുടെ പുതിയ സാമ്പത്തിക വര്‍ഷത്തേക്കുള്ള പ്രവര്‍ത്തനങ്ങള്‍ക്ക് ഭരണാനുമതി നല്‍കിയതായുള്ള വാര്‍ത്തകള്‍ പുറത്ത് വന്നത്. എന്നാല്‍ ലോക കേരള സഭ സെക്രട്ടേറിയേറ്റിന് നിലവില്‍ ഓഫീസുണ്ടെന്നും അവിടുത്ത ഭരണച്ചെലവുകള്‍ക്കായാണ് തുക അനുവദിച്ചിരിക്കുന്നതെന്നും മുഖ്യമന്ത്രിയുടെ ഓഫീസ് പറഞ്ഞു.

കേരളത്തിന് മുഴുവന്‍ നാണക്കേടുണ്ടാക്കുന്നതാണ് ലോക കേരള സഭയെന്നും പണമുള്ളവനെ മാത്രം വിളിച്ച് കയറ്റി അടുത്തിരുന്ന ഈ പരിപാടി കേരളത്തിനും കമ്മ്യൂണിസ്റ്റുകാരനായ മുഖ്യമന്ത്രിക്കും ചേര്‍ന്നതല്ലെന്നും വി.ഡി സതീശന്‍ അന്ന് പറഞ്ഞിരുന്നു.

‘കേരളത്തിന്റെ പേരില്‍ നടക്കുന്ന അനധികൃത പിരിവിനെക്കുറിച്ച് അന്വേഷിക്കുകയും അവര്‍ക്കെതിരെ ശക്തമായ നടപടി സ്വീകരിക്കുകയും വേണം,’ വി.ഡി സതീശന്‍ പറഞ്ഞു. പ്രവാസി മലയാളികളുടെ പ്രശ്നങ്ങളും കേരളത്തിന്റെ വികസനവും ചര്‍ച്ച ചെയ്യുക എന്ന ലക്ഷ്യത്തോടെ രൂപീകരിച്ച ജനകീയ വേദിയായിരുന്നു ലോക കേരള സഭ.

കഴിഞ്ഞ ജനുവരിയിലാണ് ലോക കേരളാ സഭയുടെ അഞ്ചാം പതിപ്പ് നടന്നത്. 125 രാജ്യങ്ങളില്‍ നിന്ന് ഇന്ത്യയിലെ 28 സംസ്ഥാനങ്ങളില്‍ നിന്നുമായി അഞ്ഞൂറിലധികം പ്രതിനിധികള്‍ സമ്മേളനത്തില്‍ പങ്കെടുക്കുകയും ചെയ്തു. എന്നാല്‍ പ്രതിപക്ഷം പരിപാടിയില്‍ നിന്ന് വിട്ടുനില്‍ക്കുകയായിരുന്നു

Content Highlight: Past opposition is now history; having once criticized it as wasteful extravagance while in the opposition, V.D. Satheesan has now decided to continue the Loka Kerala Sabha.