ശ്രീനഗര്: പഹല്ഗാം ഭീകരാക്രമണത്തില് പങ്കാളികളായ കശ്മീരി സ്വദേശികളും ലഷ്കര് ഇ ത്വയ്ബ ഭീകരരുമായ രണ്ട് പേരുടെ വീടുകള് കൂടി തകര്ത്ത് അധികൃതര്.
അഫ്സാന് ഉള് ഹഖ്, ഹാരിസ് അഹമ്മദ് എന്നിവരുടെ വീടുകളാണ് പ്രാദേശിക ഭരണകൂടം തകര്ത്തത്. ഭീകരാക്രമണത്തില് പങ്കുണ്ടെന്ന് കണ്ടെത്തിയതോടെയാണ് നടപടിയെടുത്തതെന്ന് അധികൃതര് അറിയിച്ചു.
കഴിഞ്ഞ ദിവസം രണ്ട്ഭീകരരുടെ വീടുകള് സ്ഫോടനത്തില് തകര്ത്തതായി റിപ്പോര്ട്ടുണ്ടായിരുന്നു. ഭീകരാക്രമണത്തിലെ മൂന്ന് പ്രതികളില് ഒരാളായ ദക്ഷിണ കശ്മീരിലെ ത്രാലിലുള്ള ആദില് ഹുസൈന് തോക്കറിന്റെവീടും ആസിഫ് ഫൗജി എന്ന ആസിഫ് ഷെയ്ഖിന്റെ വീടുമാണ് തകര്ക്കപ്പെട്ടത്.
ഇവരുടെ വീടുകള്ക്കുള്ളില് സ്ഫോടകവസ്തുക്കള് സൂക്ഷിച്ചിരുന്നതായും ദേശീയ മാധ്യമങ്ങള് റിപ്പോര്ട്ട് ചെയ്തിരുന്നു. വ്യാഴാഴ്ച രാത്രിയാണ് ഇവരുടെ വീടുകള് തകര്ത്തത്.
ജമ്മു കശ്മീരിലെ അനന്ത്നാഗ് ജില്ലക്കാരനായ തോക്കര് ചൊവ്വാഴ്ച നടന്ന പഹല്ഗാം കൂട്ടക്കൊലയിലെ പ്രധാന പ്രതികളില് ഒരാളാണ്. ആസിഫ് ഷെയ്ഖിന് ഗൂഢാലോചനയില് പങ്കുണ്ടെന്ന് അന്വേഷണ സംഘം സംശയിക്കുന്നുണ്ട്.
2018ല് ആദില് ഹുസൈന് തോക്കര് വാഗ-അട്ടാരി അതിര്ത്തിയിലൂടെ പാകിസ്ഥാനിലേക്ക് കടന്നതായും ഇന്ത്യയില് തിരിച്ചെത്തുന്നതിന് മുന്നോടിയായി തീവ്രവാദ പരിശീലനം നേടിയിരുന്നതായും ഇന്റലിജിന്സ് റിപ്പോര്ട്ട് ഉണ്ടായിരുന്നു. ഇയാള് പാകിസ്ഥാന് ഭീകരരുടെ ഗൈഡായി പ്രവര്ത്തിച്ചിരുന്നതായും റിപ്പോര്ട്ടുണ്ടായിരുന്നു.
26 പേരുടെ മരണത്തിനിടയാക്കിയ പഹല്ഗാം ആക്രമണത്തില് ഉള്പ്പെട്ട ആസിഫ് ഷെയ്ഖ്, സുലൈമാന് ഷാ, അബു തല്ഹ എന്നിവരുടെ രേഖാചിത്രങ്ങള് ഉദ്യോഗസ്ഥര് പുറത്ത് വിട്ടിരുന്നു. ഇതിനുപിന്നാലെയാണ് വീടുകള് തകര്ത്തുകൊണ്ടുള്ള നടപടി.
പഹല്ഗാമിലെ ആക്രമണത്തെ തുടര്ന്ന് ഭീകരരുടെ കുടുംബാംഗങ്ങള് വീട് ഉപേക്ഷിച്ചിരുന്നു. നാട്ടുകാരുടെ പ്രതിഷേധത്തെ തുടര്ന്നാണ് ഇവര് വീട് വീടുവിട്ടിറങ്ങിയത്. ഈ പശ്ചാത്തലത്തില് കൂടിയായിരുന്നു പ്രാദേശിക ഭരണകൂടത്തിന്റെ നീക്കം.
നിലവില് ഭീകരര്ക്ക് വേണ്ടിയുള്ള തിരച്ചില് സൈന്യം ശക്തമാക്കിയിരിക്കുകയാണ്. ഭീകരര് പീര്പഞ്ചില് ഒളിച്ചിരിക്കുന്നതായി വിവരം ലഭിച്ചിരുന്നു. ഭീകരരെ കുറിച്ച് വിവരം നല്കുന്നവര്ക്ക് 20 ലക്ഷം രൂപ പാരിതോഷികവും പ്രഖ്യാപിച്ചിട്ടുണ്ട്.
Content Highlight: Pahalgam terror attack: Two more terrorist houses demolished in Pulwama