സിനിമാപ്രേമികള്ക്ക് ഏറെ പരിചിതയായ അഭിനേത്രിയും മോഡലുമാണ് നമിത വങ്കവാല. തമിഴ്, തെലുങ്ക്, കന്നഡ എന്നീ ഭാഷകളില് നിരവധി സിനിമകളുടെ ഭാഗമായ നമിത ഏതാനും മലയാള സിനിമകളിലും അഭിനയിച്ചിട്ടുണ്ട്.
2010ല് കലാഭവന് മണി – ബാല എന്നിവര് ഒന്നിച്ച ബ്ലാക്ക് സ്റ്റാലിയന് എന്ന ചിത്രത്തിലൂടെയാണ് നമിത മലയാള സിനിമയില് എത്തുന്നത്. പിന്നീട് 2016ല് മോഹന്ലാല് ചിത്രമായ പുലിമുരുകനിലും അഭിനയിച്ചു.
ആമേന് (2013) എന്ന ലിജോ ജോസ് പെല്ലിശ്ശേരി ചിത്രത്തില് സാന്ദ്ര തോമസ് അവതരിപ്പിച്ച കഥാപാത്രമായി ആദ്യം പരിഗണിച്ചിരുന്നത് നമിതയെ ആയിരുന്നു. എന്നാല് നടി എന്തുകൊണ്ടോ ആ വേഷത്തില് നിന്നും പിന്മാറുകയായിരുന്നു.
ഇപ്പോള് തമിഴ് സിനിമയില് നിന്ന് മലയാള സിനിമയിലേക്കെത്തുമ്പോള് വലിയ തോതിലുള്ള മാറ്റം അനുഭവപ്പെടുന്നുണ്ടോ എന്ന ചോദ്യത്തിന് മറുപടി നല്കുകയാണ് നമിത. മലയാള സിനിമയെ കുറിച്ച് ആവേശത്തോടെ മാത്രമേ സംസാരിക്കാന് കഴിയൂള്ളൂവെന്നാണ് നടി പറയുന്നത്.
ഇവിടുത്തെ നടീനടന്മാരുടെ പ്രകടനം അഭിനയമാണെന്ന് തിരിച്ചറിയാനാകാത്ത വിധം സ്വാഭാവികമാണെന്നും 2002 മുതലാണ് താന് സൗത്ത് ഇന്ത്യന് സിനിമയിലേക്ക് എത്തുന്നതെന്നും നമിത പറഞ്ഞു.
‘അന്നുമുതല് മലയാളസിനിമയെ കുറിച്ച് കൂടുതല് മനസിലാക്കി തുടങ്ങി. ചെറുതെങ്കിലും പുലിമുരുകന് എന്ന സിനിമയില് ശ്രദ്ധേയമായ വേഷം തന്നെ ലഭിച്ചു. പൃഥ്വിരാജ് സുകുമാരന്, ഫഹദ് ഫാസില്, ടൊവിനോ തോമസ് എന്നിവരെല്ലാം എന്റെ ഇഷ്ടപ്പെട്ട നടന്മാരാണ്,’ നമിത പറഞ്ഞു.
അതേസമയം തമിഴ് സിനിമയാണ് തന്നെ പ്രേക്ഷകരിലേക്ക് എത്തിച്ചതെന്നും നടി പറയുന്നു. നിലവില് തനിക്കൊരു ഇമേജ് നേടിത്തന്നതിന് കോളിവുഡിന് വലിയ പ്രാധാന്യമുണ്ടെന്നും തമിഴ് ആയാലും മലയാളമായാലും ആഹ്ലാദത്തോടെ ആസ്വദിച്ചാണ് താന് സിനിമകളുടെ ഭാഗമാകുന്നതെന്നും നമിത കൂട്ടിച്ചേര്ത്തു. സ്റ്റാര് ആന്ഡ് സ്റ്റൈലിനോട് സംസാരിക്കുകയായിരുന്നു നമിത.
Content Highlight: Namitha Talks About Her Fav Actors In Malayalam