വെസ്റ്റ് ഇന്‍ഡീസിന്റെ ഇന്ത്യന്‍ പര്യടനത്തിലെ ടി-20 പരമ്പര അവസാനിച്ചതിന് പിന്നാലെ ഇന്ത്യന്‍ സൂപ്പര്‍ താരം ഇഷാന് കിഷനെ പ്രശംസിച്ച് മുന്‍ താരം മുഹമ്മദ് കൈഫ്.
വിരാടിന്റെ ബാറ്റിങ് ശൈലിയുമായി സാമ്യമുള്ള പ്രകടനമാണ് ഇഷാന് കിഷനില്‍ നിന്നും ഉണ്ടായതെന്നും കൈഫ് അഭിപ്രായപ്പെട്ടു.
ഇന്ത്യ-വെസ്റ്റ് ഇന്‍ഡീസ് അഞ്ചാം ടി20 മത്സരത്തിന് ശേഷം ക്രിക്ക്ബസില്‍ സംസാരിക്കവെയാണ് കൈഫ് ഈ വിലയിരുത്തല്‍ നടത്തിയത്.
മുഹമ്മദ് കൈഫ്, Photo:Cricket Central/x.com
‘ഇന്ന് അഭിഷേക് ശര്‍മ പുറത്തായ അതേ പന്തുകളാണ് ഇഷാന് കിഷന്‍ സിക്സറുകള്‍ക്ക് പറത്തിയത്. ശരീരത്തോട് ചേര്‍ന്നുവരുന്ന പന്തുകളെപ്പോലും ബാറ്റ് സ്വിങ് ഉപയോഗിച്ച് നേരിടാന്‍ ഇഷാന് മികച്ച കഴിവുണ്ട്. ഇക്കാര്യത്തില്‍ വിരാട് കോഹ്‌ലിയുടേതിന് സമാനമായ മികവാണ് അദ്ദേഹത്തിനുള്ളത്.
ഓണ്‍സൈഡില്‍ പന്തുകളെ അടിച്ചകറ്റാനും ഇഷാന് പ്രത്യേക കഴിവുണ്ട്. കഴിഞ്ഞ രണ്ട് വര്‍ഷത്തിനിടെ അദ്ദേഹം കളിയില്‍ വരുത്തിയ പുരോഗതി അതിശയിപ്പിക്കുന്നതാണ്.
പന്തെറിയുന്നത് ആരായാലും, ലെഗ് സൈഡിലേക്ക് ഫ്‌ളിക്കിലൂടെ സിക്സര്‍ നേടാന്‍ കഴിയുന്ന രീതിയിലാണ് അദ്ദേഹം വളര്‍ന്നിരിക്കുന്നത്. പന്ത് ആ ലൈനിലാണ് വരുന്നതെങ്കില്‍ ഇഷാന് അത് സിക്സറിന് പറത്തും,’ കൈഫ് പറഞ്ഞു.
ഇഷാന് കിഷന്‍ ഇപ്പോള്‍ ഒരു ബിഗ് മാച്ച് പ്ലെയര്‍ ആയി മാറിക്കൊണ്ടിരിക്കുകയാണെന്ന് കൈഫ് അഭിപ്രായപ്പെട്ടു. 2026-ലെ ദുലീപ് ട്രോഫി ഫൈനലില്‍ ഈസ്റ്റ് സോണിനായി താരം നേടിയ തകര്‍പ്പന്‍ ഇരട്ട സെഞ്ച്വറിയും (270 റണ്‍സ്) ഇതിന് ഉദാഹരണമായി അദ്ദേഹം ചൂണ്ടിക്കാണിച്ചു.
‘ഇഷാന് കിഷനില്‍ ഞാന്‍ ശ്രദ്ധിക്കുന്ന ഒരു ഗുണമിതാണ്: അവന്‍ ബിഗ് മാച്ച് പ്ലെയറായി മാറുകയാണ്. ഇന്നത്തേത് ഒരു പരമ്പരയിലെ നിര്‍ണായക മത്സരമായതിനാല്‍ സാധാരണ മത്സരങ്ങളില്‍ നിന്ന് തന്റെ പ്രകടനം അവന്‍ ഉയര്‍ത്തി.
നിര്‍ണായക മത്സരങ്ങളില്‍ സ്വാധീനം ചെലുത്താന്‍ കഴിയുന്നതുകൊണ്ടാണ് അവന്‍ ഐ.സി.സി റാങ്കിങ്ങില്‍ ഒന്നാമതെത്തിയത്. 2026ലെ ടി-20 ലോകകപ്പ് മുതല്‍ ഞാന്‍ ഇത് നിരീക്ഷിക്കുന്നുണ്ട്. പാകിസ്ഥാനെതിരായ നിര്‍ണായക മത്സരത്തിലും ഫൈനലിലും അവന്‍ തിളങ്ങി,’ കൈഫിനെ ഉദ്ധരിച്ച് സ്‌പോര്‍ട്‌സ്‌കീഡ റിപ്പോര്‍ട്ട് ചെയ്തു.
ബെംഗളൂരുവില്‍ നടന്ന അവസാന ടി20 മത്സരത്തില്‍ മഴ മൂലം കളി തടസ്സപ്പെടുന്നതിന് മുന്‍പ് തകര്‍പ്പന്‍ ബാറ്റിങ് പുറത്തെടുത്ത ഇഷാന് കിഷന്‍ 3 ബൗണ്ടറികളും 2 സിക്‌സറുകളും അടക്കം മികച്ച പ്രകടനമാണ് കാഴ്ചവെച്ചത്.
ഈ പരമ്പരയില്‍ മികച്ച ബാറ്റിങ് ശരാശരിയും ഉയര്‍ന്ന സ്‌ട്രൈക്ക് റേറ്റും നിലനിര്‍ത്താന്‍ താരത്തിന് സാധിച്ചിരുന്നു. പരമ്പരയിലെ അവസാന മത്സരം മഴമൂലം ഉപേക്ഷിച്ചതോടെ അഞ്ച് മത്സരങ്ങളടങ്ങിയ പരമ്പര 2-2 സമനിലയില്‍ കലാശിച്ചു.
Content Highlight: Mohammad Kaif praises Ishan Kishan