തിരുവനന്തപുരം: പത്മനാഭസ്വാമി ക്ഷേത്രത്തിലെ സ്വര്ണം കാണാതായ സംഭവത്തില് അസിസ്റ്റന്റ് മുതല്പ്പടിയെ വീണ്ടും വിളിപ്പിച്ച് പൊലീസ്. കഴിഞ്ഞ ദിവസം സ്വര്ണം തൂക്കാന് കൊണ്ടുവന്ന രീതിയില് വീഴ്ചയുണ്ടായോ എന്ന് പരിശോധിക്കാനാണ് മുതല്പ്പടിയെ വീണ്ടും വിളിപ്പിക്കുന്നതെന്നാണ് വിവരം.
മൊഴിയില് ദുരൂഹതയുണ്ടെന്ന സംശയത്തെ തുടര്ന്നാണ് നടപടി. കഴിഞ്ഞ ദിവസം സ്വര്ണം തൂക്കാന് കൊണ്ടുവന്നത് പെട്ടി തുറന്ന് സഞ്ചിയിലെന്നായിരുന്നു മൊഴി.
മുതല്പ്പടിയും ഗാര്ഡും ഇല്ലാതെ കുറച്ച് ദൂരം സ്വര്ണവുമായി നടന്നുവെന്ന് ഇയാള് മൊഴി നല്കിയിരുന്നു. അസിസ്റ്റന്റ് മുതല്പ്പടിയും പൊലീസ് ഗാര്ഡും ഉള്പ്പെടെയുള്ള ആളുകളാണ് സ്വര്ണം എടുത്ത് തൂക്കാന് കൊണ്ടുപോയത്.
പിന്നാലെ ക്ഷേത്രം എക്സിക്യൂട്ടീവ് ഉദ്യോഗസ്ഥരുടെ മേല്നോട്ടത്തില് തട്ടാന്റെ അടുത്ത് സ്വര്ണം തൂക്കിയാണ് സ്ട്രോങ് റൂമില് കൊണ്ടുവയ്ക്കുന്നത്. ഇതിന് ഗാര്ഡിന്റെയും മുതല്പ്പടിയുടെയും മേല്നോട്ടവും ആവശ്യമാണ്.
കഴിഞ്ഞ പത്താം തീയതി ഇത്തരത്തില് സ്വര്ണം കൊണ്ടുപോയതില് വ്യത്യാസമുണ്ടായിരുന്നുവെന്നാണ് റിപ്പോര്ട്ടുകള്. തുറന്ന പെട്ടി സഞ്ചിയില് സുരക്ഷ ജീവനക്കാരില്ലാതെ കൊണ്ടുപോയതില് വിശദീകരണം ലഭിക്കാനാണ് പൊലീസ് നിലവില് വിളിപ്പിച്ചിരിക്കുന്നത്.
കൊണ്ടുപോയ വഴിയിലെ മണല് തിട്ടയില് വീണോ അതോ ഒളിപ്പിക്കുകയോ ചെയ്തോ എന്ന് അറിയാന് മെറ്റല് ഡിക്ടട്ടര് ഉപയോഗിച്ച് പരിശോധന നടത്തുന്നതായും റിപ്പോര്ട്ടുണ്ട്.
ക്ഷേത്ര ഭരണസമിതിയുടെ ലോക്കറില് സൂക്ഷിച്ച 13 പവന് സ്വര്ണമാണ് കവര്ന്നത്. താഴികക്കുടം സ്വര്ണം പൂശുന്ന ജോലികള് പുരോഗമിക്കുന്നതിനിടയിലാണ് മോഷണം നടന്നതെന്നാണ് വിവരം.
ഇന്നലെ രാവിലെയാണ് സ്വര്ണം മോഷ്ടിക്കപ്പെട്ടതായി ഭരണ സമിതിയുടെ ശ്രദ്ധയില് പെട്ടത്. പിന്നാലെ ക്ഷേത്ര ഭരണ സമിതി ഫോര്ട്ട് പൊലീസില് പരാതി നല്കുകയായിരുന്നു.
ക്ഷേത്രത്തിലേക്ക് സംഭാവനയായി നല്കിയ സ്വര്ണമാണ് മോഷ്ടിക്കപ്പെട്ടത്. അതീവ സുരക്ഷ മേഖലയിലാണ് സ്വര്ണം ഉണ്ടായിരുന്നതെന്നും റിപ്പോര്ട്ടുകളുണ്ട്. സംഭവത്തില് ഫോര്ട്ട് പൊലീസാണ് അന്വേഷണം നടത്തുന്നത്.
Content Highlight: Missing gold from Padmanabhaswamy temple incident; Police summon assistant Thunappady again due to contradiction in statement