ലോകത്തിലെ ഏറ്റവും പഴക്കമുള്ള ജനാധിപത്യ രാഷ്ട്രമെന്ന് അഭിമാനപൂർവം സ്വയം വിശേഷിപ്പിക്കാറുള്ള അമേരിക്ക പോലും ഇന്ന് ജനാധിപത്യത്തിന്റെ കെട്ടുറപ്പിനെക്കുറിച്ച് ഗൗരവമേറിയ ചോദ്യങ്ങൾ നേരിടുകയാണ്.
2026 നവംബറിൽ നടക്കാനിരിക്കുന്ന ഇടക്കാല തെരഞ്ഞെടുപ്പിന് മുന്നോടിയായി യു.എസിൽ സംഭവിച്ചുകൊണ്ടിരിക്കുന്ന കാര്യങ്ങൾ, ലോകമെമ്പാടും എന്ന പോലെ അമേരിക്കയിലും ജനാധിപത്യം നേരിടുന്ന വെല്ലുവിളികളെ കുറിച്ച് ഓർമിപ്പിക്കുന്നതാണ്.
അമേരിക്കന് പ്രസിഡന്റെ ഡൊണാള്ഡ് ട്രംപ്
അതിശയകരമെന്ന് പറയട്ടെ, ഇന്ത്യയിൽ തെരഞ്ഞെടുപ്പ് സംവിധാനങ്ങളെ ചുറ്റിപ്പറ്റി ഉയരുന്ന വിവാദങ്ങളോട് സാമ്യമുള്ള നിരവധി പ്രവണതകൾ ഇന്ന് അമേരിക്കയിലും ശക്തമായി പ്രകടമാണ്.
വോട്ടർ പട്ടിക തിരുത്തൽ, മണ്ഡല പുനർവിഭജനം, വോട്ടവകാശ നിയന്ത്രണങ്ങൾ, തെരഞ്ഞെടുപ്പ് സംവിധാനങ്ങളോടുള്ള അവിശ്വാസം തുടങ്ങിയ വിഷയങ്ങൾ ഇന്ത്യയിൽ പോലെ അമേരിക്കയിലും വലിയ രാഷ്ട്രീയ ചർച്ചകളായി മാറിയിരിക്കുകയാണ്.
ഇന്ത്യയിലെ എസ്.ഐ.ആർ പോലുള്ള വോട്ടർ പട്ടിക പരിശോധനാ നടപടികൾ വിവാദമാകുമ്പോൾ, അമേരിക്കയിൽ “Voter ID Laws” എന്ന പേരിൽ നടപ്പാക്കപ്പെടുന്ന നിയമങ്ങൾ സമാന വിമർശനങ്ങൾ നേരിടുന്നു. തെരഞ്ഞെടുപ്പ് സുതാര്യത ഉറപ്പാക്കാനാണെന്നാണ് അവകാശപ്പെടുന്നതെങ്കിലും, കർശനമായ തിരിച്ചറിയൽ രേഖകൾ നിർബന്ധമാക്കുന്നത് സാമ്പത്തികമായി പിന്നാക്കം നിൽക്കുന്നവരുടെയും ന്യൂനപക്ഷങ്ങളുടെയും വോട്ടവകാശത്തെ ബാധിക്കുന്നുവെന്നാണ് വിമർശകർ പറയുന്നത്.
ഏപ്രിൽ 29ന് അമേരിക്കൻ സുപ്രീം കോടതി വോട്ടവകാശ നിയമത്തിന്റെ പരിധി വെട്ടിക്കുറച്ചുകൊണ്ട് പുറപ്പെടുവിച്ച വിധി, നീതിന്യായ വ്യവസ്ഥയുടെ രാഷ്ട്രീയവത്കരണത്തിന്റെ ഏറ്റവും പുതിയ ഉദാഹരണമാണ്. ജസ്റ്റിസ് സാമുവൽ അലീറ്റോയുടെ നേതൃത്വത്തിൽ പുറപ്പെടുവിച്ച പുതിയ വിധി പ്രകാരം, വംശീയ വിവേചനത്തിന്റെ ഉദ്ദേശം (intent) തെളിയിക്കണം.
ജസ്റ്റിസ് സാമുവൽ അലീറ്റോ. Photo: Wikipedia
ഇത് നിയമപരമായി വളരെ ബുദ്ധിമുട്ടുള്ള മാനദണ്ഡമാണ്. മുമ്പ് “വംശീയ വിവേചനഫലം” (discriminatory effect) തെളിയിച്ചാൽ മതിയായിരുന്നു.ഇപ്പോൾ പുറപ്പെടുവിച്ച വിധി പ്രകാരം വംശീയ വിവേചനം തെളിയിക്കാൻ വിവേചനം നടന്നതായി കാണിച്ചാൽ മാത്രം പോരെന്നും മനഃപൂർവമായ ഉദ്ദേശ്യത്തിന് ശക്തമായ തെളിവുകൾ വേണമെന്നും പറയുന്നു .
നിയമപരമായി സങ്കീർണമെന്നു തോന്നുന്ന ഈ വിധി, യഥാർത്ഥത്തിൽ ന്യൂനപക്ഷ സമൂഹങ്ങളുടെ, പ്രത്യേകിച്ച് കറുത്തവർഗക്കാരുടെ രാഷ്ട്രീയ പ്രതിനിധാനത്തെ ബാധിക്കാമെന്ന ആശങ്ക ഉയർത്തുന്നു.
ഇലക്ടറൽ ഡിസ്ട്രിക്റ്റുകളുടെ പുനർവിഭജനത്തിൽ (redistricting) ഇത് സ്വാധീനം ചെലുത്താനിടയുണ്ടെന്നും, അതുവഴി അവരുടെ വോട്ടിന്റെ രാഷ്ട്രീയ പ്രഭാവം കുറയാമെന്നും വിമർശകർ മുന്നറിയിപ്പ് നൽകുന്നു.
മാത്രമല്ല വോട്ടവകാശ ലംഘനങ്ങൾക്കെതിരെ നിയമനടപടി സ്വീകരിക്കുന്നത് ഏറെക്കുറെ അസാധ്യമാക്കുന്നു. മുൻ പ്രസിഡന്റ് ബരാക് ഒബാമ ഈ വിധിയെ ന്യൂനപക്ഷ വോട്ടർമാരുടെ അവകാശങ്ങൾ നിഷേധിക്കുന്ന വിധി എന്നാണ് വിമർശിച്ചത്.
ബരാക് ഒബാമ
ഈ വിധിയുടെ പ്രത്യാഘാതങ്ങൾ കണ്ട് തുടങ്ങിയത് പെട്ടെന്നായിരുന്നു . തെക്കൻ സംസ്ഥാനങ്ങളിലെ റിപ്പബ്ലിക്കൻ നിയമസഭകൾ തിരക്കേറിയ രീതിയിൽ ഇലക്ടറൽ മാപ്പുകൾ പുനർവരയ്ക്കാനുള്ള പ്രവർത്തനങ്ങൾ ആരംഭിച്ചു കഴിഞ്ഞു.
ഫ്ലോറിഡയിൽ ഗവർണർ റോൺ ഡി സാന്റിസിന്റെ നേതൃത്വത്തിൽ അംഗീകരിച്ച പുതിയ കോൺഗ്രസ് മാപ്പ് റിപ്പബ്ലിക്കൻമാർക്ക് നാല് അധിക സീറ്റുകൾ ഉറപ്പാക്കുമെന്നാണ് കണക്കുകൾ സൂചിപ്പിക്കുന്നത്. സൗത്ത് കരോലിനയിലും ടെന്നസിയിലും സമാനമായ പുനർവിഭജനങ്ങൾ നടക്കുന്നുണ്ട്.
റോൺ ഡി സാന്റിസ്. Photo: Wikipedia
‘ജെറിമാൻഡറിങ്’ എന്ന് അറിയപ്പെടുന്ന ഈ സമ്പ്രദായം പുതിയതല്ല. എന്നാൽ സുപ്രീം കോടതി വിധി ഇതിന് ഭരണഘടനാപരമായ സാധൂകരണം നൽകുന്നത് വളരെ ആശങ്കാജനകമാണ്.
Photo: Washington Post
കറുത്തവർഗക്കാരും ഹിസ്പാനിക് സമുദായക്കാരും കൂടുതലായി താമസിക്കുന്ന മേഖലകളെ വിഭജിച്ച് വിവിധ മണ്ഡലങ്ങളിലായി ചിതറിക്കുകയോ, അല്ലെങ്കിൽ ഒന്നോ രണ്ടോ മണ്ഡലങ്ങളിൽ തിരക്കിക്കൂട്ടി അവരുടെ വോട്ടിന്റെ മൊത്തത്തിലുള്ള രാഷ്ട്രീയ സ്വാധീനം കുറയ്ക്കുകയോ ചെയ്യുന്ന രീതിയാണ് ഇത്.
അതിശയകരമെന്ന് പറയട്ടെ, ഇന്ത്യയിൽ പരക്കെ ചർച്ച ചെയ്യപ്പെടുന്ന തെരഞ്ഞെടുപ്പ് കൃത്രിമത്വത്തിന്റെ ആരോപണങ്ങൾക്ക് സമാനമായ പ്രശ്നങ്ങൾ ലോകത്തിലെ ഏറ്റവും ശക്തമായ ജനാധിപത്യമെന്ന് അവകാശപ്പെടുന്ന അമേരിക്കയിലും കാണാൻ കഴിയുന്നു.
വോട്ടർ പട്ടിക തിരുത്തൽ (ഇന്ത്യയിലെ SIR പോലെ) , ന്യൂനപക്ഷ മണ്ഡലങ്ങളുടെ പുനർവിഭജനം, തുടങ്ങിയ സമ്പ്രദായങ്ങൾ രണ്ട് രാജ്യങ്ങളിലും പ്രകടമാണ്.
ഇന്ത്യയിൽ ഇലക്ട്രോണിക് വോട്ടിംഗ് മെഷീനുകളുടെ (EVM) സുതാര്യതയെക്കുറിച്ചുള്ള ചോദ്യങ്ങൾ ഉയരുന്നതുപോലെ, അമേരിക്കയിലും 2020 തെരഞ്ഞെടുപ്പിനുശേഷം വോട്ടെണ്ണലിന്റെ ആധികാരികതയെക്കുറിച്ചുള്ള വ്യാപകമായ സംശയങ്ങൾ ഉയർന്നു.”തെരഞ്ഞെടുപ്പ് കവർച്ച” ആരോപണങ്ങൾ, സത്യമാണെന്ന് ദശലക്ഷക്കണക്കിന് അമേരിക്കക്കാർ ഇപ്പോഴും വിശ്വസിക്കുന്നു.
2026 ഇടക്കാല തെരഞ്ഞെടുപ്പ് അമേരിക്കൻ ജനാധിപത്യത്തിന്റെ യഥാർഥ പരീക്ഷണമായിരിക്കും. ഹൗസ് ഓഫ് റപ്രസന്റേറ്റീവ്സിലെ 435 സീറ്റുകളും സെനറ്റിലെ 33 സീറ്റുകളും പുതുക്കപ്പെടും.
നിലവിലെ പുനർവിഭജനങ്ങളുടെ ഫലമായി ട്രംപിന്റെ പിന്തുണക്കുന്ന റിപ്പബ്ലിക്കൻമാർക്ക് ഗണ്യമായ നേട്ടം ഉണ്ടാകുമെന്ന് വിശകലന വിദഗ്ധർ പ്രവചിക്കുന്നു. ഇത് യഥാർഥ ജനകീയ പിന്തുണയെ പ്രതിഫലിപ്പിക്കുന്നതാണോ അതോ ഇലക്ഷൻ സംവിധാനത്തിലെ കൃത്രിമത്വത്തിന്റെ ഫലമാണോ എന്നത് ചോദ്യചിഹ്നമാണ്.
അമേരിക്കയുടെ അനുഭവം ലോകത്തിലെ മറ്റ് ജനാധിപത്യ രാഷ്ട്രങ്ങൾക്ക് പാഠമാണ്. സുപ്രീം കോടതി പോലുള്ള സ്ഥാപനങ്ങളുടെ രാഷ്ട്രീയവത്കരണം എത്ര അപകടകരമാണെന്ന് ഇത് വ്യക്തമാക്കുന്നു.
നീതിന്യായ വ്യവസ്ഥ രാഷ്ട്രീയ പാർട്ടികളുടെ താത്പര്യങ്ങൾക്ക് വഴങ്ങുമ്പോൾ, ജനാധിപത്യത്തിന്റെ സംരക്ഷകനായി പ്രവർത്തിക്കേണ്ട സ്ഥാപനം അതിനെ ദുർബലപ്പെടുത്തുന്നതിന് ഉപകരണമായി മാറുകയാണ്.
ഇന്ത്യയിലും അമേരിക്കയിലും നടക്കുന്ന സമാനമായ പ്രവണതകൾ ജനാധിപത്യം നേരിടുന്ന സാർവത്രിക വെല്ലുവിളികൾ വെളിപ്പെടുത്തുന്നു. വോട്ടവകാശം എന്നത് കേവലം നിയമപരമായി ലഭിക്കുന്നതായാൽ മാത്രം പോരാ. അത് പ്രായോഗികമായി സംരക്ഷിക്കപ്പെടുകയും വേണം.
നിയമത്തിന്റെ വാച്യാർത്ഥം പാലിച്ചുകൊണ്ട് അതിന്റെ ആത്മാവിനെ ലംഘിക്കാൻ കഴിയുമ്പോൾ, ജനാധിപത്യം കേവലം നടപടിക്രമ സംവിധാനമായി മാറും.
നവംബറിലെ തെരഞ്ഞെടുപ്പ് ഫലങ്ങൾ ട്രംപ് ഭരണത്തിന്റെ ഭാവി നിർണയിക്കുമെന്നതിലുപരി, അമേരിക്കൻ ജനാധിപത്യം സ്വയം പരിഷ്കരിക്കാനുള്ള ശേഷിയുണ്ടോ എന്ന അടിസ്ഥാനചോദ്യത്തിനും മറുപടി നൽകും. ജനാധിപത്യം എന്നത് ഒരിക്കൽ നേടിയാൽ എന്നേക്കും സുരക്ഷിതമായി നിലനിൽക്കുന്ന ഒന്നല്ല; ഓരോ തലമുറയും അതിനെ സംരക്ഷിക്കാൻ പുതുതായി പോരാടേണ്ടതുണ്ട്.
Content highlight: Mansoor Pallur writes about the democratic system in India and America