ന്യൂദല്ഹി: എം.കെ.ഗ്രൂപ്പ് ചെയര്മാനും പ്രമുഖ പ്രവാസി വ്യവസായിയുമായ എം.എ.യൂസഫലി എയര് ഇന്ത്യാ ഡയറക്ടര് ബോര്ഡ് അംഗത്വം രാജിവച്ചു. ഗള്ഫ് മലയാളികളോടുള്ള എയര് ഇന്ത്യയുടെ അവഗണനയില് പ്രതിഷേധിച്ചാണ് രാജി.[]
പ്രവാസി മലയാളികള് യാത്രാസംവിധാനങ്ങളുടെ പേരില് ബുദ്ധിമുട്ടുന്ന അവസ്ഥ തുടരുകയാണെന്ന് യൂസഫലി പറഞ്ഞു. എയര് ഇന്ത്യയിലെ പ്രശ്നങ്ങള് മൂലം ഇത് പരിഹരിക്കാന് തനിക്ക് കഴിയുന്നില്ലെന്നും അതിനാലാണ് രാജിവെക്കുന്നതെന്നും അദ്ദേഹം വ്യക്തമാക്കി.
എയര് ഇന്ത്യയിലെ മോശം സാഹചര്യങ്ങള്ക്ക് ഇരയാകേണ്ടിവരുന്നത് ഗള്ഫ് മലയാളികളാണ്. എയര് ഇന്ത്യയുടെ മാതൃകയില് എയര് കേരള എന്നൊരു വിമാനസര്വീസ് ആരംഭിക്കുന്ന കാര്യം ആലോചനയില് ഉണ്ട്. ഈ പദ്ധതിയുമായി സഹകരിച്ച് ഈ മേഖലയില് തുടരും. ഇതൊരു പ്രൊപ്പോസലായി സര്ക്കാരിന് സമര്പ്പിച്ചിട്ടുണ്ടെന്നും യൂസഫലി വ്യക്തമാക്കി.
2010ലാണ് എയര് ഇന്ത്യയിലെ അഞ്ചു സ്വതന്ത്ര ഡയറക്ടര്മാരിലൊരാളായി യൂസഫലിയെ കേന്ദ്ര സര്ക്കാര് നിയമിച്ചത്. മൂന്നു വര്ഷമായിരുന്നു കാലാവധി. നിലവില് കൊച്ചി രാജ്യാന്തര വിമാനത്താവളക്കമ്പനി ഡയറക്ടറും എയര് കേരള ഇന്റര്നാഷണല് സര്വീസസ് ബോര്ഡ് അംഗവുമാണ് യൂസഫലി.