2026 ഫിഫ ലോകകപ്പിന് ശേഷം ക്ലബ്ബ് ഫുട്ബോളില് വീണ്ടും ആധിപത്യം തുടര്ന്നിരിക്കുകയാണ് അര്ജന്റൈന് ഇതിഹാസം ലയണല് മെസി. ലീഗ്സ് കപ്പില് സാന് ലൂയിസിനെതിരെയുള്ള മത്സരത്തില് ഇന്റര് മയാമിക്ക് വേണ്ടി ഇരട്ട ഗോളും ഒരു അസിസ്റ്റും നേടിയാണ് മെസി കളംനിറഞ്ഞു കളിച്ചത്. മെസിയുടെ മിന്നും പ്രകടനത്തിന്റെ കരുത്തില് മയാമി 4-2ന്റെ വമ്പന് വിജയമായിരുന്നു സ്വന്തമാക്കിയത്.
മത്സരത്തില് നേടിയ ഇരട്ട ഗോളിന് പിന്നാലെ ഫുട്ബോളിലെ തന്റെ ഗോള് നേട്ടം 921 ആക്കി ഉയര്ത്താനും മയാമി നായകന് സാധിച്ചു. ഫുട്ബോളില് ഇത്രയധികം ഗോള് നേട്ടത്തില് എത്തുന്ന പ്രായം കുറഞ്ഞ താരമാണ് മെസി. 39 വയസും 42 ദിവസവും പ്രായമുള്ളപ്പോഴാണ് മെസിയുടെ ഈ നേട്ടം.
പോര്ച്ചുഗീസ് ഇതിഹാസം ക്രിസ്റ്റ്യാനോ റൊണാള്ഡോയെ മറികടന്നുകൊണ്ടാണ് മെസിയുടെ കുതിപ്പ്. ഇതുവരെ ഫുട്ബോളില് 976 ഗോളുകള് അടിച്ചുകൂട്ടിയ റൊണാള്ഡോ 39 വയസും 356 ദിവസവും പ്രായമുള്ളപ്പോഴായിരുന്നു 920 എന്ന ഗോളുകളെന്ന നേട്ടത്തില് എത്തിയിരുന്നത്.
ഫുട്ബോളില് ഏറ്റവും വേഗത്തില് 920 ഗോളുകള് പൂര്ത്തിയാക്കുന്ന താരവും മെസി തന്നെയാണ്. 1166 മത്സരങ്ങളില് നിന്നുമാണ് മെസിയുടെ ഈ നേട്ടം. മറുവശത്ത് പോര്ച്ചുഗീസ് ഇതിഹാസം 1259 മത്സരങ്ങളില് നിന്നുമായിരുന്നു 920 ഗോളുകള് അടിച്ചുകൂട്ടിയത്. റൊണാള്ഡോയെക്കാള് 93 മത്സരങ്ങള് കുറവ് മാത്രം കളിച്ചാണ് മെസി ഈ നേട്ടം കൈപ്പിടിയിലാക്കിയതെന്നും ശ്രദ്ധേയമാണ്.
നിലവില് ഇരു ഇതിഹാസതാരങ്ങളും ആയിരം ഗോളുകള് എന്ന ചരിത്ര നേട്ടത്തിലേക്കാണ് കണ്ണുവെക്കുന്നത്. 24 ഗോളുകള് കൂടി സ്വന്തമാക്കിയാല് റൊണാള്ഡോക്ക് ഫുട്ബോളിലെ ഈ മാന്ത്രിക സംഖ്യയിലേക്ക് നടന്നുകയറാന് സാധിക്കും. മറുഭാഗത്ത് മെസിക്ക് ആയിരം ഗോളുകള് എന്ന വലിയ ലക്ഷ്യത്തിലേക്ക് എത്താന് ഇനി 79 ഗോളുകള് കൂടി ആവശ്യമാണ്.
അതേസമയം തുടര്ച്ചയായ രണ്ടാം ലോകകപ്പ് നേടുകയെന്ന മെസിയുടെ സ്വപ്നം ഫൈനലില് അവസാനിച്ചിരുന്നു. കലാശപോരാട്ടത്തില് സ്പെയ്നിനോട് പരാജയപ്പെട്ടതാണ് അര്ജന്റീനക്ക് കിരീടം നഷ്ടമായത്.
എങ്കിലും ഈ ലോകകപ്പില് മിന്നും പ്രകടനം നടത്തി ആരാധകരുടെ ഹൃദയം കീഴടക്കിയാണ് മെസി മടങ്ങിയത്. ഒരു ഹാട്രിക് ഉള്പ്പടെ എട്ട് ഗോളുകളും നാല് അസിസ്റ്റുകളും നേടിയാണ് മെസി ഈ ലോകകപ്പ് അവസാനിപ്പിച്ചത്. ലോകകപ്പ് ചരിത്രത്തില് 21 ഗോളുകളാണ് മെസിയുടെ സമ്പാദ്യം.
മറുഭാഗത്ത് ലോകകപ്പില് റൊണാള്ഡോക്ക് പ്രീ ക്വാര്ട്ടര് വരെയാണ് മുന്നേറാന് സാധിച്ചത്. ചാമ്പ്യന്മാരായ സ്പെയ്നിനോട് പരാജയപ്പെട്ടായിരുന്നു പോര്ച്ചുഗലിന്റെ മടക്കം. 41ാം വയസില് തന്റെ ആറാം ലോകകപ്പിനിറങ്ങിയ റൊണാള്ഡോ ടൂര്ണമെന്റില് മൂന്ന് ഗോളുകള് നേടി ശ്രദ്ധേയമായ പ്രകടനമാണ് പുറത്തെടുത്തത്.
ഗ്രൂപ്പ് ഘട്ടത്തില് ഉസ്ബെക്കിസ്ഥാനെതിരെ ഇരട്ടഗോള് നേടിയ റൊണാള്ഡോ പിന്നീട് ക്രൊയേഷ്യക്കെതിരെയും ലക്ഷ്യം കണ്ടു. ഈ ടൂര്ണമെന്റിലും ഗോള് നേടിയതോടെ ലോകകപ്പ് ചരിത്രത്തില് ആറ് വ്യത്യസ്ത പതിപ്പുകളില് ഗോള് നേടുന്ന ആദ്യ താരമെന്ന നേട്ടവും പോര്ച്ചുഗലിന്റെ എക്കാലത്തെയും മികച്ച ലോകകപ്പ് ഗോള് വേട്ടക്കാരനെന്ന റെക്കോഡും റൊണാള്ഡോ സ്വന്തമാക്കി.
Content Highlight: Lionel Messi break Cristiano Ronaldo record in football