തിരുവനന്തപുരം: കേരളത്തില് അതിതീവ്ര മഴയ്ക്ക് സാധ്യതയെന്ന് കേന്ദ്ര കാലാവസ്ഥ വകുപ്പിന്റെ അറിയിപ്പ്. ബംഗാള് ഉള്ക്കടലിലും അറബിക്കടലിലും അതിതീവ്ര ന്യൂനമര്ദം രൂപപ്പെട്ട സാഹചര്യത്തിലാണ് സംസ്ഥാനത്ത് മഴ കനക്കുന്നത്.
മഴ ശക്തമാകുന്ന സാഹചര്യത്തിൽ നാളെ (ബുധന്) മൂന്ന് ജില്ലകളില് കേന്ദ്ര കാലാവസ്ഥ വകുപ്പ് റെഡ് അലേര്ട്ട് പ്രഖ്യാപിച്ചു. ഇടുക്കി, പാലക്കാട്, മലപ്പുറം ജില്ലകളിലാണ് റെഡ് അലേര്ട്ട്. ഈ ജില്ലകളില് അതിതീവ്ര മഴയ്ക്കാണ് സാധ്യത.
അതേസമയം ഇന്നത്തെ മഴ മുന്നറിയിപ്പിലും മാറ്റമുണ്ട്. എറണാകുളം, ഇടുക്കി, തൃശൂര്, പാലക്കാട്, മലപ്പുറം ജില്ലകളില് ഇന്ന് അതിശക്തമായ മഴയ്ക്കാണ് സാധ്യത. അഞ്ച് ജില്ലകളിലും ഓറഞ്ച് അലേര്ട്ട് പ്രഖ്യാപിച്ചിട്ടുണ്ട്.
ബാക്കിയുള്ള മുഴുവന് ജില്ലകളിലും ഇന്ന് യെല്ലോ അലേർട്ട് നിലവിലുണ്ട്. മലയോര മേഖലയിലുള്ളവര് ജാഗ്രത പുലര്ത്തണമെന്ന് അറിയിപ്പുണ്ട്.
ഉരുള്പൊട്ടല്, മണ്ണിടിച്ചില്, മലവെള്ളപ്പാച്ചില് എന്നിവയ്ക്ക് സാധ്യതയുള്ള പ്രദേശങ്ങളില് താമസിക്കുന്നവര് അധികൃതരുടെ നിര്ദേശാനുസരണം സുരക്ഷിതമായ സ്ഥലങ്ങളിലേക്ക് മാറി താമസിക്കണമെന്നും കാലാവസ്ഥ വകുപ്പിന്റെ നിര്ദേശമുണ്ട്.
തുലാവര്ഷം ശക്തമാകുന്നത് കണക്കിലെടുത്ത് കേരള തീരത്ത് 24/10/2025 വരെ മത്സ്യബന്ധനത്തിന് വിലക്ക് ഏര്പ്പെടുത്തിയിട്ടുണ്ട്. കേരള-കര്ണാടക-ലക്ഷദ്വീപ് തീരങ്ങളില് 24/10/2025 വരെ മത്സ്യബന്ധനത്തിന് പോകാന് പാടില്ലെന്നാണ് കേന്ദ്ര കാലാവസ്ഥ വകുപ്പിന്റെ അറിയിപ്പ്.
24 വരെ കേരള-കര്ണാടക അതിനോട് ചേര്ന്ന കടല് പ്രദേശങ്ങളിലും ലക്ഷദ്വീപ് തീരങ്ങളിലും മണിക്കൂറില് 35 മുതല് 45 കിലോമീറ്റര് വരെയും ചില അവസരങ്ങളില് 55 കിലോമീറ്റര് വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്.
കേരളത്തില് എല്ലാ ജില്ലകളിലും താലൂക്ക്, ജില്ലാ തലത്തില് 24 മണിക്കൂറും പ്രവര്ത്തിക്കുന്ന കണ്ട്രോള് റൂമുകള് സജീവമാണ്. അപകട സാധ്യത മുന്നില് കാണുന്ന ഘട്ടത്തിലും സഹായങ്ങള്ക്കുമായി 1077, 1070 എന്നീ ടോള് ഫ്രീ നമ്പറുകളില് ബന്ധപ്പെടാവുന്നതാണ്.
Content Highlight: latest weather updates in kerala, today