തിരുവനന്തപുരം: സംസ്ഥാനത്ത് ഇന്ന് (ചൊവ്വ) നാല് ജില്ലകളില് യെല്ലോ അലേര്ട്ട്. പത്തനംതിട്ട, ഇടുക്കി, എറണാകുളം, കണ്ണൂര് ജില്ലകളിലാണ് കേന്ദ്ര കാലാവസ്ഥ വകുപ്പ് യെല്ലോ അലേര്ട്ട് പ്രഖ്യാപിച്ചിരിക്കുന്നത്. ഈ ജില്ലകളില് ശക്തമായ മഴയ്ക്ക് സാധ്യതയെന്നും കാലാവസ്ഥ വകുപ്പ് അറിയിച്ചു.
24 മണിക്കൂറില് 64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നതുകൊണ്ട് അര്ത്ഥമാക്കുന്നത്. അതേസമയം നാളെ (ബുധന്)യും സംസ്ഥാനത്ത് ശക്തമായ മഴയ്ക്ക് സാധ്യതയുണ്ട്.
തിരുവനന്തപുരം, പത്തനംതിട്ട, കോഴിക്കോട്, വയനാട് എന്നീ ജില്ലകളിലാണ് കേന്ദ്ര കാലാവസ്ഥ വകുപ്പ് നാളെ യെല്ലോ അലേര്ട്ട് പ്രഖ്യാപിച്ചിരിക്കുന്നത്. ഈ ജില്ലകളില് ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിച്ചിട്ടുള്ളത്.
അടുത്ത മൂന്ന് മണിക്കൂറില് ഇടുക്കി, പാലക്കാട്, മലപ്പുറം കോഴിക്കോട്, കണ്ണൂര്, കാസര്ഗോഡ് ജില്ലകളില് ഒറ്റപ്പെട്ടയിടങ്ങളില് ഇടിമിന്നലോട് കൂടിയ ഇടത്തരം മഴയ്ക്കും മണിക്കൂറില് 40 കിലോമീറ്റര് വരെ വേഗതയില് ശക്തമായ കാറ്റിനും സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് അറിയിച്ചു.
കൂടാതെ സംസ്ഥാനത്ത് കള്ളക്കടല് പ്രതിഭാസത്തിനും സാധ്യതയുണ്ട്. ഇതിന്റെ ഭാഗമായി കേരളാ തീരത്ത് 14/05/2025ന് രാത്രി 11.30 വരെ 0.4 മുതല് 0.8 മീറ്റര് വരെ ഉയര്ന്ന തിരമാലകള് ഉണ്ടാകാനിടയുണ്ടെന്ന് ദേശീയ സമുദ്രസ്ഥിതിപഠന ഗവേഷണ കേന്ദ്രം അറിയിച്ചു. കടലാക്രമണത്തിന് സാധ്യതയുള്ളതിനാല് മത്സ്യത്തൊഴിലാളികളും തീരദേശവാസികളും ജാഗ്രത പാലിക്കണമെന്നും അറിയിപ്പുണ്ട്.
ബീച്ചിലേക്കുള്ള യാത്രകളും കടലില് ഇറങ്ങിയുള്ള വിനോദങ്ങളും പൂര്ണമായും ഒഴിവാക്കണമെന്നും ചെറിയ വള്ളങ്ങളും ബോട്ടുകളും കടലിലേക്ക് ഇറക്കുന്നത് ഈ സമയത്ത് ഒഴിവാക്കേണ്ടതാണെന്നും നിര്ദേശമുണ്ട്.
തെക്കന് ആന്ഡമാന് കടല്, വടക്കന് ആന്ഡമാന് കടല്, തെക്കന് ബംഗാള് ഉള്ക്കടല്, നിക്കോബാര് ദ്വീപ് എന്നിവയുടെ ചില മേഖലകളില് കാലവര്ഷം ഇന്ന് (മെയ് 13) എത്തിച്ചേര്ന്നതായും കേന്ദ്ര കാലാവസ്ഥാ വകുപ്പ് അറിയിച്ചു.
അടുത്ത മൂന്ന് മുതല് നാല് ദിവസത്തിനുള്ളില്, തെക്കന് അറബിക്കടല്, മാലിദ്വീപ്, കൊമോറിന് മേഖല, തെക്കന് ബംഗാള് ഉള്ക്കടലിന്റെ ചില ഭാഗങ്ങള്, ആന്ഡമാന്-നിക്കോബാര് ദ്വീപുകള് മുഴുവനായും, ആന്ഡമാന് കടലിന്റെ ബാക്കി ഭാഗങ്ങള്, മധ്യ ബംഗാള് ഉള്ക്കടലിന്റെ ചില ഭാഗങ്ങള് എന്നിവിടങ്ങളിലേക്ക് കാലവര്ഷം വ്യാപിക്കാന് സാധ്യതയുണ്ടെന്നും കാലാവസ്ഥാ കേന്ദ്രത്തിന്റെ അറിയിപ്പുണ്ട്.
Content Highlight: latest weather updates in kerala