ആ മൂന്ന് ചിത്രങ്ങളിലെയും ഫഹദ് ഫാസില്‍ കഥാപാത്രങ്ങള്‍ എനിക്ക് പ്രിയപ്പെട്ടത്: കല്യാണി

വിക്രം കുമാര്‍ സംവിധാനം ചെയ്ത ഹലോ എന്ന തെലുങ്ക് ചിത്രത്തിലൂടെ തന്റെ കരിയര്‍ ആരംഭിച്ച നടിയാണ് കല്യാണി പ്രിയദര്‍ശന്‍. പിന്നീട് തെലുങ്ക്, തമിഴ് സിനിമകളില്‍ ഭാഗമായിരുന്ന നടി വരനെ ആവശ്യമുണ്ട് എന്ന ചിത്രത്തിലൂടെയാണ് മലയാള സിനിമയിലേക്ക് എത്തുന്നത്.

ഇപ്പോള്‍ ഓണം റിലീസായി കല്യാണിയുടേതായി എത്തിയ രണ്ട് മലയാള ചിത്രങ്ങളാണ് ലോകഃ ചാപ്റ്റര്‍ വണ്‍ ചന്ദ്ര, ഓടും കുതിര ചാടും കുതിര എന്നിവ. ഇതില്‍ അല്‍ത്താഫ് സലിം സംവിധാനം ചെയ്‌തെത്തിയ ഓടും കുതിരയില്‍ ഫഹദ് ആയിരുന്നു നായകന്‍.

കല്യാണി പ്രിയദര്‍ശന്‍- ഫഹദ് ഫാസില്‍ കോമ്പോ ആദ്യമായാണ് ഒരു സിനിമക്കായി ഒന്നിക്കുന്നത്. ഇപ്പോള്‍ ഫഹദിന്റെ കഥാപാത്രങ്ങളില്‍ തനിക്ക് ഏറ്റവും ഇഷ്ടമുള്ളത് ഏതാണെന്ന് പറയുകയാണ് കല്യാണി. തനിക്ക് ഇഷ്ടമുള്ള ഒരുപാട് കഥാപാത്രങ്ങളുണ്ടെന്നും മറുപടി പറയാന്‍ വളരെ പ്രയാസമുള്ള ചോദ്യമാണ് ഇതെന്നും നടി പറയുന്നു.

‘മഹേഷിന്റെ പ്രതികാരം, ഞാന്‍ പ്രകാശന്‍, തൊണ്ടിമുതലും ദൃക്‌സാക്ഷിയും എന്നീ സിനിമകള്‍ എനിക്ക് വളരെ ഇഷ്ടമാണ്. അതിലെ ഫഹദിന്റെ കഥാപാത്രങ്ങള്‍ ഒരുപാട് മികച്ചതാണ്. ആ കഥാപാത്രങ്ങളാണ് എനിക്ക് ഫഹദ് ചിത്രങ്ങളില്‍ ഇഷ്ടമുള്ളതെന്ന് പറയാം,’ കല്യാണി പ്രിയദര്‍ശന്‍ പറയുന്നു.

ഓടും കുതിര ചാടും കുതിര:

ഞണ്ടുകളുടെ നാട്ടില്‍ ഒരിടവേള എന്ന ഒരൊറ്റ ചിത്രത്തിലൂടെ തന്റെ സംവിധാനത്തിലെ കഴിവ് തെളിയിച്ച അല്‍ത്താഫ് സലിം സംവിധാനം ചെയ്ത സിനിമയാണ് ഓടും കുതിര ചാടും കുതിര. ആവേശത്തിന് ശേഷമെത്തുന്ന ഫഹദ് ഫാസില്‍ ചിത്രം കൂടിയാണ് ഇത്.

കല്യാണി പ്രിയദര്‍ശനും ഫഹദ് ഫാസിലിനും പുറമെ വിനയ് ഫോര്‍ട്ട്, ധ്യാന്‍ ശ്രീനിവാസന്‍, ലാല്‍, രേവതി പിള്ള, രണ്‍ജി പണിക്കര്‍, സുരേഷ് കൃഷ്ണ, നന്ദു, അനുരാജ്, ഇടവേള ബാബു, ബാബു ആന്റണി, വിനീത് ചാക്യാര്‍, സാഫ് ബോയ്, ലക്ഷ്മി ഗോപാലസ്വാമി, ആതിര നിരഞ്ജന തുടങ്ങി വലിയൊരു താരനിര തന്നെ ചിത്രത്തില്‍ അണിനിരന്നിട്ടുണ്ട്.

Content Highlight: Kalyani Priyadarshan Talks About Her Fav Characters Of Fahadh Faasil