തിരുവനന്തപുരം: കേരളത്തെ പ്രകീര്ത്തിച്ച് ബ്രിട്ടീഷ് പ്രസിദ്ധീകരണമായ ദി എക്കോണമിസ്റ്റില് പങ്കുവെച്ച ലേഖനത്തില് പ്രതികരണവുമായി ധനകാര്യവകുപ്പ് മന്ത്രി കെ.എന്. ബാലഗോപാല്.
സാമൂഹ്യക്ഷേമത്തെ കുറിച്ച് ചില കാര്യങ്ങള് കേരളത്തിന് ഇന്ത്യയെ പഠിപ്പിക്കാന് സാധിക്കും (Kerala Can Teach India a Thing Or Two About Social Welfare) എന്ന തലക്കെട്ടില് പ്രസിദ്ധീകരിച്ച ലേഖനത്തില് സംസ്ഥാനത്തെ അതിദാരിദ്ര്യ വിമുക്തമാക്കി മാറ്റിയതും ആരോഗ്യം, വിദ്യാഭ്യാസം, ജീവിത നിലവാരം എന്നിവയുള്പ്പെടുന്ന 12 സൂചകങ്ങളില് കേരളം നടത്തിയ മുന്നേറ്റത്തെ കുറിച്ചും വിശദമായി വിലയിരുത്തുന്നുണ്ട്.
ലോകത്തിന് സ്കാന്ഡിനേവിയ എങ്ങനെയാണ്, ഇന്ത്യയെ സംബന്ധിച്ച് കേരളം അങ്ങനെയാണെന്നും ലേഖനത്തില് എഴുതിയിരുന്നു. ഈ ലേഖനത്തോട് പ്രതികരിക്കുകയായിരുന്നു അദ്ദേഹം.
‘ലോകത്തിന് സ്കാന്ഡിനേവിയ പോലെയാണ് ഇന്ത്യയ്ക്ക് കേരളം എന്ന് പറഞ്ഞിരിക്കുന്നത് മാര്ക്സിസത്തെയും കമ്മ്യൂണിസത്തെയും നിരന്തരം വിമര്ശിക്കുന്ന മുതലാളിത്തത്തിലധിഷ്ടിതമായ സാമ്പത്തികസിദ്ധാന്തങ്ങളെ പിന്തുണയ്ക്കുന്ന ബ്രിട്ടീഷ് പ്രസിദ്ധീകരണമായ ദി എക്കണോമിസ്റ്റ് ആണ്.
ലോകത്തെ തന്നെ ഏറ്റവും മികച്ച ജീവിതനിലവാരവും സാമൂഹികവികസന സൂചികകളുമുള്ള സ്കാന്ഡിനേവിയന് രാജ്യങ്ങള്ക്കൊപ്പമാണ് ദി എക്കണോമിസ്റ്റ് പോലെ ഒരു മാഗസിന് നമ്മുടെ കൊച്ചുകേരളത്തെ ചേര്ത്ത് വെച്ചിരിക്കുന്നത്,’ ഫേസ്ബുക്കില് പങ്കുവെച്ച കുറിപ്പില് അദ്ദേഹം പറഞ്ഞു.
അതിദാരിദ്ര്യവിമുക്ത സംസ്ഥാനമായി കേരളത്തെ പ്രഖ്യാപിച്ചതിനെക്കുറിച്ച് പരാമര്ശിക്കുന്നതിനോടൊപ്പം ഇന്ത്യന് സര്ക്കാരിന്റെ ബഹുമുഖ ദാരിദ്ര്യ സൂചികയിലെ ആരോഗ്യം, വിദ്യാഭ്യാസം തുടങ്ങിയ എല്ലാ സൂചകങ്ങളിലും കേരളത്തിന്റെ റാങ്ക് രാജ്യത്ത് തന്നെ മികച്ചതാണെന്നും ലേഖനം വ്യക്തമാക്കുന്നു.
ജാതിമതരാഷ്ട്രീയത്തിന്റേതല്ലാത്ത, ക്ഷേമപദ്ധതികളുടെ പുനര്വിതരണത്തിനായി മത്സരിക്കുന്ന തരം സവിശേഷവും അതുല്യവുമായ ഒരു രാഷ്ട്രീയമാണ് കേരളത്തിനുള്ളതെന്നും ഈ മുന്നേറ്റങ്ങള്ക്കെല്ലാം കാരണം ഇതാണെന്നും ലേഖനത്തില് വ്യക്തമാക്കുന്നതായും കെ.എന്. ബാലഗോപാല് ഫേസ്ബുക്കില് പങ്കുവെച്ച കുറിപ്പില് പറയുന്നു.
ലോകമെന്നാകെ കേരളത്തെ ഉറ്റുനോക്കുകയാണെന്നും മുതലാളിത്തത്തിന്റെ വക്താക്കള് പോലും കേരളത്തില് നിന്നും പഠിക്കാനുണ്ടെന്നും പറയുന്നു. കേരളമെന്ന് കേട്ടാല് ഞെരമ്പുകളില് ചോര തിളയ്ക്കുന്നതില് തെറ്റില്ലെന്ന് പറയാമെന്നും ഫേസ്ബുക്ക് കുറിപ്പില് കൂട്ടിച്ചേര്ത്തു.
ഫേസ്ബുക്ക് പോസ്റ്റിന്റെ പൂര്ണരൂപം
ലോകത്തിന് സ്കാന്ഡിനേവിയ പോലെയാണ് ഇന്ത്യയ്ക്ക് കേരളം എന്ന് പറഞ്ഞിരിക്കുന്നത് മാര്ക്സിസത്തെയും കമ്യൂണിസത്തെയും നിരന്തരം വിമര്ശിക്കുന്ന മുതലാളിത്തത്തിലധിഷ്ടിതമായ സാമ്പത്തികസിദ്ധാന്തങ്ങളെ പിന്തുണയ്ക്കുന്ന ബ്രിട്ടീഷ് പ്രസിദ്ധീകരണമായ ദി എക്കണോമിസ്റ്റ് ആണ്.
ലോകത്തെ തന്നെ ഏറ്റവും മികച്ച ജീവിതനിലവാരവും സാമൂഹികവികസന സൂചികകളുമുള്ള സ്കാന്ഡിനേവിയന് രാജ്യങ്ങള്ക്കൊപ്പമാണ് ദി എക്കണോമിസ്റ്റ് പോലെ ഒരു മാഗസിന് നമ്മുടെ കൊച്ചുകേരളത്തെ ചേര്ത്ത് വെച്ചിരിക്കുന്നത്. കേരളം ഇന്ത്യയുടെ വികസന ചാമ്പ്യനാണെന്നത് അനിഷേധ്യമായ സംഗതിയാണെന്ന് സാമൂഹ്യക്ഷേമത്തെക്കുറിച്ച് ഇന്ത്യയ്ക്ക് കേരളത്തില് നിന്നും ചിലത് പഠിക്കാനുണ്ടെന്ന തലക്കെട്ടില് പ്രസിദ്ധീകരിച്ച ലേഖനത്തില് ദി എക്കണോമിസ്റ്റ് പറയുന്നു.
അതിദാരിദ്ര്യവിമുക്ത സംസ്ഥാനമായി കേരളത്തെ പ്രഖ്യാപിച്ചതിനെക്കുറിച്ച് പരാമര്ശിക്കുന്നതിനോടൊപ്പം ഇന്ത്യന് സര്ക്കാരിന്റെ ബഹുമുഖ ദാരിദ്ര്യ സൂചികയിലെ ആരോഗ്യം, വിദ്യാഭ്യാസം തുടങ്ങിയ എല്ലാ സൂചകങ്ങളിലും കേരളത്തിന്റെ റാങ്ക് രാജ്യത്ത് തന്നെ മികച്ചതാണെന്നും ലേഖനത്തില് പറയുന്നുണ്ട്.
ഇതിനെല്ലാം കാരണം, ജാതിമതരാഷ്ട്രീയത്തിന്റേതല്ലാത്ത, ക്ഷേമപദ്ധതികളുടെ പുനര്വിതരണത്തിനായി മത്സരിക്കുന്ന തരം സവിശേഷവും അതുല്യവുമായ ഒരു രാഷ്ട്രീയം നമ്മുടെ കൊച്ചുകേരളത്തിനുള്ളതാണെന്നും ലേഖനം വിലയിരുത്തുന്നുണ്ട്.
സമത്വമുള്ള ഒരു സമൂഹമായി വളരുമ്പോഴും ലിബറല് സാമ്പത്തികനയങ്ങള് പിന്തുടരാത്ത ഇടത് രാഷ്ട്രീയം കേരളത്തെ വ്യാവസായിക വളര്ച്ചയില് പിന്നോട്ടടിച്ചു എന്ന സ്ഥിരം മുതലാളിത്തപക്ഷ വിമര്ശനം ഈ ലേഖനവും ഉന്നയിക്കുന്നുണ്ട്. എന്നാല് അതേ വാചകത്തിനൊപ്പം, ഇക്കഴിഞ്ഞ വര്ഷങ്ങളില് കേരളത്തിന്റെ വ്യാവസായിക അന്തരീക്ഷത്തില് കാര്യമായ മുന്നേറ്റമുണ്ടാക്കാന് കഴിഞ്ഞെന്നും തങ്ങളുടെ സഹോദരസ്ഥാപനമായ എക്കണോമിക് ഇന്റലിജന്സ് യൂണിറ്റിന്റെ (EIU) പഠനത്തെ അധികരിച്ച് എഴുതിയിട്ടുണ്ട്.
നമ്മുടെ കേരളത്തെ ലോകം ഉറ്റുനോക്കുകയാണ്. മുതലാളിത്തത്തിന്റെ വക്താക്കള് പോലും നമ്മില് നിന്നും പഠിക്കാനുണ്ടെന്ന് പറയുന്നു. കേരളമെന്ന് കേട്ടാല് ഞരമ്പുകളില് ചോര അല്പം തിളയ്ക്കുന്നതില് തെറ്റില്ലെന്ന് പറയാം…
Content highlight: K.N. Balagopal responds to The Economist article praising Kerala