എന്നെ ഞാൻ ഉപേക്ഷിച്ചില്ല; അമ്മയാവണം എന്നുള്ളതാണ് ജീവിതത്തിലെ ഏറ്റവും വലിയ ആഗ്രഹം: ജുവൽ മേരി

ടെലിവിഷൻ അവതാരകയായി വന്ന് പിന്നീട് മലയാള സിനിമയിലും സജീവമായ നടിയാണ് ജുവൽ മേരി. മമ്മൂട്ടി നായകനായി അഭിനയിച്ച പത്തേമാരി എന്ന സിനിമയിലെ നളിനി എന്ന നായിക കഥാപാത്രം ചെയ്തു കൊണ്ട് ആണ് ജുവൽ മലയാള സിനിമയിലേക്ക് കടന്നു വന്നത്. നളിനി, ഉട്ടോപ്യയിലെ രാജാവ്, ഞാൻ മേരിക്കുട്ടി തുടങ്ങിയവയാണ് മറ്റു പ്രധാന സിനിമകൾ.

ജീവിതത്തിൽ ഒരുപാട് പരീക്ഷണങ്ങളിലൂടെ കടന്നുപോയ വ്യക്തിയാണ് താനെന്ന് ജുവൽ മേരി പറയുന്നു.

അമ്മയാകണം എന്നതാണ് ജീവിതത്തിലെ ഏറ്റവും വലിയ ആഗ്രഹം. എന്നാൽ അതിന് സാധിച്ചില്ലെന്നും പിങ്ക് പോഡ്കാസ്റ്റ് മലയാളത്തിന് നൽകിയ അഭിമുഖത്തിൽ സംസാരിക്കവെ താരം പറഞ്ഞു.

‘ജീവിതത്തിൽ ഒരുപാട് പരീക്ഷണങ്ങളിലൂടെ കടന്നുപോയ വ്യക്തിയാണ് ഞാൻ. കുറെ ആഗ്രഹങ്ങൾ നടക്കുകയും കുറെ ആഗ്രഹങ്ങൾ നടക്കാതെ ഇന്നും ഒരു സ്വപ്നമായി അവശേഷിക്കുകയുമാണ്. അതിലൊന്നാണ് അമ്മയാകാൻ കഴിയാത്തത്. എനിക്ക് ഇതുവരെ ഒരു കുഞ്ഞുണ്ടായിട്ടില്ല. ഉള്ളിലിന്റെ ഉള്ളിൽ വളരെ ആഗ്രഹമുള്ള കാര്യമായിരുന്നു എന്നാൽ അത് നടന്നില്ല. ഇത് നടക്കാത്തതിന്റെ സങ്കടം ഫീൽ ചെയ്യുമ്പോൾ ലാലീ ലാലീലെ പാട്ട് കേട്ട് കരയുകയും ചെയ്യും,’ ജുവൽ പറഞ്ഞു.

പലരും മദർഹുഡിന് വേണ്ടിയാണ് അമ്മയാകുന്നത്. എനിക്കും ഒരു പോയിന്റ് വരെ അങ്ങനെ തന്നെയായിരുന്നു. എന്നാൽ ഇപ്പോൾ എനിക്കുണ്ടാകാൻ പോകുന്ന കുഞ്ഞിനെ കാണണം എന്നാണ് ഏറ്റവും വലിയ ആഗ്രഹമെന്നും താരം കൂട്ടിച്ചേർത്തു.

ഏതൊരു വ്യക്തിയും ഒറ്റക്കിരിക്കുമ്പോൾ തന്റെ വിഷമങ്ങൾ മറക്കാൻ പാട്ടുകൾ കേൾക്കും. താൻ കളിമണ്ണ് സിനിമയിലെ ലാലീ ലാലീലെ പാട്ട് കേട്ട് കൂടുതൽ സങ്കടപ്പെടുകയാണ് ചെയ്യുക, താരം പറഞ്ഞു.

ജീവിതത്തിൽ ഏറ്റവും മോശം അവസ്ഥകളിലൂടെ താൻ കടന്നു പോയിട്ടുണ്ട്. എന്നാൽ അവിടെയൊന്നും തളരാതെ പിടിച്ചു നിന്നു. ഒരുപക്ഷെ താൻ തന്നെ ഉപേക്ഷിച്ചിരുന്നെങ്കിൽ ഇന്ന് കാണുന്ന ഈ ജുവൽ മേരി ഉണ്ടാകില്ലായിരുന്നെന്നും താരം കൂട്ടിച്ചേർത്തു.

Content Highlight: Jewel Mary says her biggest wish in life is to become a mother