സൗദിയെ നിരീക്ഷിക്കുക, എപ്സ്റ്റീനോട് അജ്ഞാതന്‍ ആവശ്യപ്പെട്ട ഇ- മെയില്‍ പുറത്ത്

സൗദി അറേബ്യ: ബാലപീഡനകേസില്‍ ശിക്ഷിക്കപ്പെട്ട ജെഫ്രി എപ്സ്റ്റീന്റെ ഫയലിലെ കൂടുതല്‍ രേഖകള്‍ പുറത്ത്. സൗദി അറേബ്യയിലെ രാജകുടുംബത്തെ എപ്സ്റ്റീന്‍ സൂക്ഷ്മമായി നിരീക്ഷിച്ചിരുന്നു എന്ന് തെളിയിക്കുന്ന ഇ- മെയിലാണ് കഴിഞ്ഞദിവസം പുറത്തുവന്നത്. 2017ല്‍ സൗദി കിരീടവകാശി മുഹമ്മദ് ബിന്‍ സല്‍മാന്‍ രാജകുടുംബത്തെയും സാമ്പത്തിക ഉന്നതരെയും ജയിലിലടച്ചതിന് പിന്നാലെ നടന്ന സംഭാഷണമാണ് യു.എസ്. നീതിന്യായ വകുപ്പ് പുറത്തുവിട്ടത്.

2017 നവംബര്‍ നാലിന് ‘സൗദിയില്‍ ഇപ്പോള്‍ എന്താണ് സംഭവിക്കുന്നതെന്ന് സസൂക്ഷ്മമായി നിരീക്ഷിക്കുക’ എന്നാവശ്യപ്പെട്ടുകൊണ്ട് അജ്ഞാത ഇ-മെയില്‍ എപ്സ്റ്റീന് ലഭിച്ചു. ‘മിസൈല്‍ അല്ലെങ്കില്‍ അഴിമതി വിരുദ്ധം’ എന്നായിരുന്നു ഇതിന് എപ്സ്റ്റീന്‍ നല്‍കിയ മറുപടി. സൗദി രാജകുമാരന്‍ മുഹമ്മദ് ബിന്‍ സല്‍മാന്‍ തന്റെ കുടുംബാംഗങ്ങള്‍ക്കും മറ്റ് ബിസിനസുകാര്‍ക്കുമെതിരെ നടപടിയെടുത്തതിന് തൊട്ടുപിന്നാലെയാണ് ഇ-മെയില്‍ കൈമാറ്റം നടന്നത്.

2017 നവംബര്‍ ആദ്യത്തില്‍ സമ്പന്നരായ നിരവധി സൗദി അറേബ്യക്കാരെയും രാജകുടുംബാംഗങ്ങളെയും റിയാദ് റിറ്റ്സ്-കാള്‍ട്ടണില്‍ തടവിലാക്കിയിരുന്നു. അഴിമതി ശുദ്ധീകരണത്തിന്റെ ഭാഗമായിട്ടാണ് ഈ നടപടിയെ കിരീടാവകാശി വിശേഷിപ്പിച്ചത്. രാജ്യത്തിന് കോടിക്കണക്കിന് ഡോളര്‍ നഷ്ടപരിഹാരം നല്‍കാന്‍ ഇവരോട് ഉത്തരവിടുകയും ചെയ്തു.

ശതകോടീശ്വരന്‍ അല്‍വലീദ് ബിന്‍ തലാല്‍ തുടങ്ങിയ ഉന്നത വ്യക്തികളും ചില രാജകീയ അംഗങ്ങളും പട്ടികയില്‍ ഉള്‍പ്പെട്ടിരുന്നു. പണം നല്‍കാത്തവരെ ജയിലിലടക്കുകയും ചെയ്തു. ചിലരെ ആവര്‍ത്തിച്ച് മര്‍ദിച്ചതായി വാള്‍ സ്ട്രീറ്റ് ജേണല്‍ റിപ്പോര്‍ട്ട് ചെയ്യുന്നു. ഗള്‍ഫ് മേഖലയെ എപ്സ്റ്റീന്‍ എത്ര സൂക്ഷ്മമായാണ് നിരീക്ഷിച്ചിരുന്നതെന്ന് ഈ നീക്കം അടിവരയിടുന്നു. സൗദി സര്‍ക്കാരിന്റെ ഉന്നത തലങ്ങളില്‍ വരെ എപ്സ്റ്റീന് എത്താന്‍ കഴിഞ്ഞുവെന്നും അടുത്തിടെ പുറത്തുവന്ന രേഖകള്‍ സൂചിപ്പിക്കുന്നു.

റിറ്റ്‌സ് കാള്‍ട്ടണ്‍ ശുദ്ധീകരണത്തിന് മുമ്പ് സൗദി ഉദ്യോഗസ്ഥരുമായി കൂടുതല്‍ അടുത്ത ബന്ധം സ്ഥാപിക്കാനുള്ള ശ്രമത്തിലാണെന്നും, സൗദി കിരീടാവകാശിയുമായുള്ള തന്റെ ബന്ധത്തെക്കുറിച്ചും എപ്സ്റ്റീന്‍ പരാമര്‍ശിക്കുന്നതായി കാണപ്പെട്ടു. അന്നത്തെ ന്യൂയോര്‍ക്ക് ടൈംസ് റിപ്പോര്‍ട്ടര്‍ തോമസ് ലാന്‍ഡന്‍ ജൂനിയറുമായുള്ള ഒരു ആശയവിനിമയത്തിലാണ് ഈ രേഖയുള്ളത്.

‘മാസ ജനക്കൂട്ടത്തിലേക്ക് നിങ്ങളെ എത്തിക്കാന്‍ ശ്രമിക്കുകയാണ്. എന്നിരുന്നാലും, എല്ലാ തലക്കെട്ടുകളും/വിവാദങ്ങളും കാരണം ചില എതിര്‍പ്പുകള്‍ – നിങ്ങള്‍ പ്രതീക്ഷിക്കുന്നതുപോലെ. സൗദികളുമായും/ഗേറ്റ്സുമായും/ട്രംപ് ജനക്കൂട്ടവുമായും ഉള്ള നിങ്ങളുടെ ബന്ധത്തെക്കുറിച്ച് ഞാന്‍ അവരോട് പറയുന്നു, പക്ഷേ ഇപ്പോഴും സംശയങ്ങളുണ്ട്. അതില്‍ പ്രവര്‍ത്തിച്ചുകൊണ്ടിരിക്കുകയാണ്!” ലാന്‍ഡന്‍ എപ്സ്റ്റീനിന് എഴുതി.

സൗദി അറേബ്യയുടെ നിക്ഷേപ മന്ത്രാലയത്തിന്റെ ചുരുക്കപ്പേരായ മിസയുടെ അക്ഷരത്തെറ്റാണ് മാസ എന്ന് തോന്നുന്നെന്ന് മിഡില്‍ ഈസ്റ്റ് ഐ റിപ്പോര്‍ട്ട് ചെയ്യുന്നു.

Content Highlight: Jeffrey Epstien files new mail about Saudi Arabia out now