രണ്ടര വര്ഷത്തെ ഇടവേളക്ക് ശേഷം മലയാളത്തിലേക്കുള്ള ദുല്ഖറിന്റെ തിരിച്ചുവരവിനായി കാത്തിരിക്കുകയാണ് ആരാധകര്. 2023ല് കിങ് ഓഫ് കൊത്ത എന്ന ബിഗ് ബജറ്റ് ചിത്രത്തിന്റെ പരാജയത്തിന് ശേഷം ദുല്ഖര് മലയാളത്തില് നായകനായിട്ടില്ല. ഈ സമയങ്ങളില് അന്യഭാഷാ സിനിമകളിലായിരുന്നു താരം ശ്രദ്ധ നല്കിയിരുന്നത്.
രണ്ടര വര്ഷത്തിന് ശേഷം ഡി.ക്യുവിന്റെ ഹോംകമിങ് ആഘോഷമാക്കാനൊരുങ്ങുകയാണ് സിനിമാലോകം. ആര്.ഡി.എക്സിന് ശേഷം നഹാസ് ഹിദായത്ത് അണിയിച്ചൊരുക്കുന്ന ഐ ആം ഗെയിമിലൂടെയാണ് മോളിവുഡിലേക്ക് ദുല്ഖര് റീ എന്ട്രി നടത്തുന്നത്. വന് ബജറ്റിലൊരുങ്ങുന്ന ചിത്രത്തിന്റെ അപ്ഡേറ്റുകളെല്ലാം സോഷ്യല് മീഡിയയില് വലിയ ചര്ച്ചയാകുന്നുണ്ട്.
ഓഗസ്റ്റ് 20ന് ഓണം റിലീസായാണ് ഐ ആം ഗെയിം തിയേറ്ററുകളിലെത്തുന്നത്. കേരളത്തിലെ പല കിങ് സൈസ് തിയേറ്ററുകളിലും ഐ ആം ഗെയിം ചാര്ട്ട് ചെയ്തുകഴിഞ്ഞു. കേരളത്തിലും പുറത്തും ചിത്രത്തിന് വെല്ലുവിളിയായി ക്ലാഷ് റിലീസുകളുള്ളത് ആരാധകരില് ചെറിയ ടെന്ഷനുണ്ടാക്കിയിരുന്നു. പൃഥ്വിരാജ് നായകനാകുന്ന ഖലീഫ, നിവിന് പോളിയുടെ ബത്ലഹേം കുടുംബ യൂണിറ്റ് എന്നീ ചിത്രങ്ങള് ഓണം റിലീസായി എത്തുന്നുണ്ട്.
കേരളത്തിന് പുറത്ത് ഐ ആം ഗെയിമിന് വെല്ലുവിളിയുയര്ത്തുന്ന ചില ചിത്രങ്ങള് ഇപ്പോള് റിലീസ് മാറ്റിയെന്നതാണ് പുതിയ വാര്ത്ത. തെലുങ്കില് നാനിയുടെ പാരഡൈസ്, തമിഴില് രജിനിയുടെ ജയിലര് 2 എന്നിവയുടെ റിലീസ് ഐ ആം ഗെയിമിനെ ബാധിക്കുമെന്നായിരുന്നു പലരും കരുതിയത്. എന്നാല് ഈ രണ്ട് ചിത്രങ്ങളുടെയും റിലീസ് മാറ്റിയിരിക്കുകയാണ്.
റീഷൂട്ട് ചെയ്യേണ്ടി വന്നതിനാല് ജയിലര് 2 സെപ്റ്റംബര് റിലീസില് നിന്ന് പിന്മാറിയെന്നാണ് പുതിയ റിപ്പോര്ട്ട്. ഒരു മാസത്തോളം നീണ്ടുനില്ക്കുന്ന റീഷൂട്ടിനൊടുവില് ഒക്ടോബറിലാകും ചിത്രം തിയേറ്ററുകളിലെത്തുക എന്നാണ് കരുതുന്നത്. അതേസമയം ഷൂട്ട് പൂര്ത്തിയാകാത്തതാണ് പാരഡൈസിന്റെ റിലീസ് വൈകുന്നതിന് പിന്നിലെന്നും റിപ്പോര്ട്ടില് പറയുന്നു. മാര്ച്ചില് തിയേറ്ററുകളിലെത്തുമെന്ന് കരുതിയ ചിത്രമായിരുന്നു പാരഡൈസ്.
ഈ രണ്ട് ചിത്രങ്ങളും റിലീസ് മാറ്റിയതോടെ ദുല്ഖറിന് കാര്യങ്ങള് കൂടുതല് എളുപ്പമായിരിക്കുകയാണ്. പോസിറ്റീവ് റിപ്പോര്ട്ട് ലഭിച്ചാല് തമിഴ്നാട്ടിലും ആന്ധ്ര/ തെലങ്കാന എന്നിവിടങ്ങളിലും ഐ ആം ഗെയിം വന് മുന്നേറ്റം നടത്തുമെന്നാണ് പ്രതീക്ഷ. എല്ലാം ഒത്തുവന്നാല് കേരളത്തില് നിന്ന് മാത്രം 100 കോടി നേടുന്ന അടുത്ത ചിത്രമായി ഐ ആം ഗെയിം മാറും.
Content Highlight: Jailer 2 and Paradise movie backed out from clash with I’m Game movie
സിനിമാലോകം ഇനി നിങ്ങളുടെ വാട്സ്ആപ്പിലും. അംഗമാകാം MOVIE DAY വാട്സ്ആപ്പ് ചാനലിൽ