ഐ.പി.എല്ലിലെ സൂപ്പര് സണ്ഡേ ഡബിള് ഹെഡ്ഡറിലെ രണ്ടാം മത്സരത്തില് ലഖ്നൗ സൂപ്പര് ജയന്റ്സിനെതിരെ വിജയം സ്വന്തമാക്കിയിരിക്കുകയാണ് പഞ്ചാബ് കിങ്സ്. പഞ്ചാബിന്റെ ഹോം ഗ്രൗണ്ടായ ധര്മശാലയില് നടന്ന മത്സരത്തില് 37 റണ്സിന്റെ തകര്പ്പന് വിജയമാണ് പഞ്ചാബ് സ്വന്തമാക്കിയത്. ഇതോടെ പോയിന്റ് ടേബിളില് രണ്ടാം സ്ഥാനത്ത് എത്താനും ശ്രേയസ് അയ്യര്ക്കും സംഘത്തിനും സാധിച്ചു.
പഞ്ചാബ് ഉയര്ത്തിയ 237 റണ്സിന്റെ വിജയലക്ഷ്യം പിന്തുടര്ന്നിറങ്ങിയ ലഖ്നൗവിന് നിശ്ചിത ഓവറില് ഏഴ് വിക്കറ്റ് നഷ്ടത്തില് 199 റണ്സ് മാത്രമാണ് നേടാന് സാധിച്ചത്. മത്സരത്തില് ലഖ്നൗ ക്യാപ്റ്റന് റിഷബ് പന്ത് വീണ്ടും മോശം ഫോമിലാണ് ബാറ്റ് ചെയ്യുന്നത്. 17 പന്തില് ഒരു സിക്സും രണ്ട് ഫോറും ഉള്പ്പെടെ 18 റണ്സാണ് താരം നേടിയത്. 105.88 എന്ന സ്ട്രൈക്ക് റേറ്റിലാണ് താരം ബാറ്റ് വീശിയത്.
മാത്രമല്ല പതിനെട്ടാം സീസണില് 27 കോടി രൂപയ്ക്ക് ലഖ്നൗ സ്വന്തമാക്കിയ റിഷബ് പന്ത് സീസണില് ഒരു അര്ധ സെഞ്ച്വറി ഒഴിച്ചാല് വളരെ മോശം പ്രകടനമാണ് കാഴ്ചവെക്കുന്നത്. സീസണിലെ ഏറ്റവും വിലകൂടിയ താരമായിരുന്നിട്ടും ആകെ 12.80 ശരാശരിയില് 128 റണ്സും 99.22 സ്ട്രൈക്ക് റേറ്റുമാണ് താരത്തിനള്ളത്. 0, 15, 2, 2, 21, 63, 3, 0, 4, 18 എന്ന സ്കോറിലാണ് താരം സീസണില് ബാറ്റ് ചെയ്തത്.
ഇപ്പോള് പന്തിനെക്കുറിച്ച് സംസാരിക്കുകയാണ് മുന് ഇന്ത്യന് താരം സുരേഷ് റെയ്ന. പത്ത് പന്തില് അഞ്ച് സിക്സ് അടിക്കാന് കഴിയുന്ന താരമാണ് പന്തെന്നും എന്നാല് 2025 സീസണില് ലഖ്നൗവിന്റെ പരാജയങ്ങള്ക്ക് കാരണവും പന്താണെന്നാണ് റെയ്ന പറഞ്ഞത്.
‘പന്ത് തന്റെ ചിന്താഗതി മാറ്റേണ്ടിവരും. പത്ത് പന്തുകളില് അഞ്ച് സിക്സറുകള് അടിക്കാന് കഴിയുന്ന ബാറ്ററാണ് അവന്. എന്നിരുന്നാലും മധ്യനിരയില് സമയം ചെലവഴിക്കുകയും വിക്കറ്റിനനുസരിച്ച് കളിക്കുകയും വേണം. പഞ്ചാബിനെതിരായ മത്സരത്തില് പന്ത് ദേഷ്യപ്പെട്ടിരുന്നു, അത് അദ്ദേഹത്തിന്റെ പുറത്താകലിന് കാരണമായി.
പന്തിന് വ്യത്യസ്ത തരത്തിലുള്ള കഴിവുകളുണ്ട്, കൂടാതെ അദ്ദേഹം ആറ് ടെസ്റ്റ് സെഞ്ച്വറികള് നേടിയിട്ടുണ്ടെന്ന കാര്യം മറക്കരുത്. 2025ലെ ഐ.പി.എല്ലില് ലഖ്നൗ സൂപ്പര് ജയന്റ്സിന്റെ പരാജയങ്ങള്ക്ക് കാരണം പന്തിന്റെ ബാറ്റിങ് ആണ്,.ബാറ്റിങ് ഓര്ഡറില് നാലാം സ്ഥാനം വളരെ പ്രധാനമായതിനാല് അദ്ദേഹം തന്റെ പ്രകടനം മെച്ചപ്പെടുത്തേണ്ടതുണ്ട്,’ റെയ്ന പറഞ്ഞു.
11 മത്സരങ്ങളില് നിന്ന് അഞ്ച് വിജയവും ആറ് തോല്വിയും ഉള്പ്പെടെ 10 പോയിന്റുമായി ഏഴാം സ്ഥാനത്താണ് ലഖ്നൗ. മാത്രമല്ല പ്ലേ ഓഫ് സാധ്യതകള് മങ്ങിയ പന്തിനും കൂട്ടര്ക്കും വരും മത്സരങ്ങള് നിര്ണായകമാണ്. മെയ് ഒമ്പതിന് റോയല് ചലഞ്ചേഴ്സ് ബെംഗളൂരുവിനെതിരെയാണ് ലഖ്നൗവിന്റെ അടുത്ത മത്സരം. എകാന ക്രിക്കറ്റ് സ്റ്റേഡിയത്തിലാണ് മത്സരം.
Content Highlight: IPL 2025: Suresh Raina Criticize Rishabh Pant’s Poor Performance In 2025 IPL