ഐ.പി.എല്ലില് കഴിഞ്ഞ ദിവസം നടന്ന മത്സരത്തില് റോയല് ചലഞ്ചേഴ്സ് ബെംഗളൂരുവിനോട് ലഖ്നൗ സൂപ്പര് ജയന്റ്സ് പരാജയപ്പെട്ടിരുന്നു. സ്വന്തം തട്ടകത്തില് നടന്ന മത്സരത്തില് ആറ് വിക്കറ്റിന്റെ തോല്വിയാണ് ലഖ്നൗ വഴങ്ങിയത്.
മത്സരത്തില് ആദ്യം ബാറ്റ് ചെയ്ത ലഖ്നൗ നായകന് റിഷബ് പന്തിന്റെ സെഞ്ച്വറി കരുത്തില് നിശ്ചിത ഓവറില് 227 റണ്സെടുത്തിരുന്നു. എന്നാല് എട്ട് പന്ത് ബാക്കി നില്ക്കെ ബെംഗളൂരു വിജയം സ്വന്തമാക്കുകയായിരുന്നു. അതോടെ അവസാന അങ്കത്തില് തോല്വിയോടെ പന്തിനും സംഘത്തിനും മടങ്ങേണ്ടി വന്നു.
ഫോമില്ലാതിരുന്ന ലഖ്നൗ നായകന് റിഷബ് പന്തിന്റെ തിരിച്ച് വരവിനാണ് ആരാധകര് സാക്ഷ്യം വഹിച്ചത്. 61 പന്തില് 118 റണ്സെടുത്തതാണ് താരം താന് കളി മറന്നിട്ടില്ലെന്ന് തെളിയിച്ചത്. എട്ട് സിക്സും 11 ഫോറും അടക്കം 193.44സ്ട്രൈക്ക് റേറ്റിലാണ് പന്ത് ബെംഗളൂരുവിനെതിരെ ബാറ്റ് ചെയ്തത്.
വിജയിക്കാന് കഴിഞ്ഞില്ലെങ്കിലും സൂപ്പര് ജയന്റ്സിന് വേണ്ടി മറ്റൊരു തകര്പ്പന് റെക്കോര്ഡാണ് ക്യാപ്റ്റന് സ്വന്തമാക്കിയത്. ഐ.പി.എല്ലില് ബെംഗളൂരുവിനെതിരെ ഏറ്റവും ഉയര്ന്ന സ്കോര് നേടുന്ന രണ്ടാമത്തെ ക്യാപ്റ്റന് എന്ന നേട്ടമാണ് പന്ത് സ്വന്തമാക്കിയത്. ഈ നേട്ടത്തില് ഒന്നാമത് ഉള്ളത് കെ.എല്. രാഹുലാണ് 2020 ദുബായില് നടന്ന ഐ.പി.എല്ലില് 132* റണ്സാണ് രാഹുല് അടിച്ചെടുത്തത്. 2011ല് ആദംഗില്ക്രിസ്റ്റ് നേടിയ 106 റണ്സിന്റെ ഉയര്ന്ന സ്കോര് മറികടന്നാണ് പന്ത് ഈ നേട്ടത്തില് രണ്ടാമനായത്.
കെ.എല്. രാഹുല് – 132* – ദുബായ് – 2020
റിഷബ് പന്ത് – 118* – ലഖ്നൗ – 2025
ആദം ഗില്ക്രിസ്റ്റ് – 106 – ധര്മശാല – 2011 സ്ട്രൈക്ക് റേറ്റ്
അതേസമയം മത്സരത്തില് ബെംഗളൂരുവിനായി മിന്നും പ്രകടനം നടത്തിയത് ക്യാപ്റ്റന് ജിതേഷ് ശര്മയാണ്. 33 പന്തില് ആറ് സിക്സും എട്ട് ഫോറും അടക്കം 85 റണ്സാണ് താരം നേടിയത്. ക്യാപ്റ്റന് പുറമെ വിരാട് കോഹ്ലി 30 പന്തില് 54 റണ്സും മായങ്ക് അഗര്വാള് 23 പന്തില് പുറത്താവാതെ 41 റണ്സുമെടുത്ത് വിജയത്തില് നിര്ണായകമായി.
Content Highlight: IPL 2025: Rishabh Pant In Great Record Achievement In IPL History