ചാമ്പ്യന്‍മാരുടെ ക്യാപ്റ്റനേയും വെട്ടിയാണ് ഇവന്റെ കുതിപ്പ്; രണ്ടാം ടെസ്റ്റിലും പന്ത് മിന്നിക്കും!

ടെന്‍ഡുല്‍ക്കര്‍ – ആന്‍ഡേഴ്സണ്‍ ട്രോഫിയിലെ രണ്ടാം ടെസ്റ്റിനായുള്ള കാത്തിരിപ്പിലാണ് ആരാധകര്‍. എഡ്ജ്ബാസ്റ്റണിലാണ് ഇന്ത്യയും ഇംഗ്ലണ്ടും തമ്മിലുള്ള രണ്ടാം ടെസ്റ്റ് നടക്കുന്നത്. ആദ്യ ടെസ്റ്റിലെ പരാജയത്തെ മറികടക്കാനാണ് ഇന്ത്യ ലക്ഷ്യം വെക്കുന്നത്. നിലവില്‍ അഞ്ച് മത്സരങ്ങളുള്ള പരമ്പരയില്‍ ആതിഥേയരായ ത്രീ ലയണ്‍സ് മുന്നിലാണ്.

ആദ്യ ടെസ്റ്റില്‍ മിന്നും പ്രകടനം കാഴ്ചവെച്ച ഇന്ത്യന്‍ വിക്കറ്റ് കീപ്പര്‍ ബാറ്ററും വൈസ്‌ ക്യാപ്റ്റനുമായ റിഷബ് പന്തില്‍ വലിയ പ്രതീക്ഷയാണ് ഇന്ത്യയ്ക്കുള്ളത്. ഇതിനെല്ലാം പുറമെ ടെസ്റ്റ് റാങ്കിങ്ങില്‍ ഒരു തകര്‍പ്പന്‍ നേട്ടം സ്വന്തമാക്കാനും പന്തിന് സാധിച്ചിരിക്കുകയാണ്. ടെസ്റ്റ് ക്രിക്കറ്റില്‍ ഒരു ഇന്ത്യന്‍ വിക്കറ്റ് കീപ്പര്‍ ബാറ്ററുടെ ഏറ്റവും ഉയര്‍ന്ന റാങ്കിങ് പോയിന്റ് സ്വന്തമാക്കാനാണ് പന്തിന് സാധിച്ചത്.

നിലവില്‍ ടെസ്റ്റ് ബാറ്റിങ് റാങ്കിങ്ങില്‍ ആറാമനാണ് പന്ത്. 801 റേറ്റിങ് പോയിന്റാണ് പന്തിന് നേടാന്‍ സാധിച്ചത്. മുന്‍ ഇന്ത്യന്‍ താരം സാക്ഷാല്‍ എം.എസ്. ധോണിക്ക് പോലും നേടാന്‍ സാധിക്കാത്ത റെക്കോഡാണ് റാങ്കിങ്ങില്‍ പന്ത് 2025ല്‍ ആദ്യമായി സ്വന്തമാക്കിയത്. മാത്രമല്ല റാങ്കിങ്ങില്‍ 2024-25 ടെസ്റ്റ് ചാമ്പ്യന്‍മാരായ സൗത്ത് ആഫ്രിക്കയുടെ ക്യാപ്റ്റന്‍ തെംമ്പ ബാവുമയെ പിന്നിലാക്കിയാണ് പന്ത് റേറ്റിങ്ങില്‍ ആറാം സ്ഥാനത്തേക്ക് നീങ്ങിയത്. ബാവുമ 798 പോയിന്റുമായി അഞ്ചാം സ്ഥാനത്താണുള്ളത്.

നിലവില്‍ ബാറ്റിങ് റാങ്കില്‍ ഒന്നാം സ്ഥാനത്തുള്ളത് ജോ റൂട്ടാണ്. 889 പോയിന്റാണ് താരം നേടിയത്. രണ്ടാം സ്ഥാനത്ത് 874 പോയിന്റുമായി ഹാരി ബ്രൂക്കും മൂന്നാം സ്ഥാനത്ത് കിവീസിന്റെ കെയ്ന്‍ വില്യംസന്‍ 867 പോയിന്റുമായി നിലയുറപ്പിച്ചിട്ടുണ്ട്. അതേസമയം റേറ്റിങ്ങില്‍ നാലാമനായിട്ടാണ് ഇന്ത്യയുടെ യശസ്വി ജെയ്സ്വാള്‍ ഇടം നേടിയത്. 851 പോയിന്റാണ് താരത്തിനുള്ളത്.

അതേസമയം ആദ്യ ടെസ്റ്റിലെ രണ്ട് ഇന്നിങ്‌സിലും സെഞ്ച്വറി നേടിയാണ് പന്ത് തിളങ്ങിയത്. ആദ്യ ഇന്നിങ്‌സില്‍ പന്ത് 134 (178) റണ്‍സാണ് സ്വന്തമാക്കിയത്. ആറ് സിക്‌സും 12 ഫോറും ഉള്‍പ്പെടെയാണ് പന്ത് തന്റെ സെഞ്ച്വറി പൂര്‍ത്തിയാക്കിയത്.

നിര്‍ണായകമായ രണ്ടാം ഇന്നിങ്‌സില്‍ 140 പന്തില്‍ നിന്ന് മൂന്ന് സിക്‌സും 15 ഫോറും ഉള്‍പ്പെടെ 118 റണ്‍സാണ് താരം നേടിയത്. ഇതോടെ പന്തിന് എട്ടാം ടെസ്റ്റ് സെഞ്ച്വറി നേടാനും ഒരു ടെസ്റ്റില്‍ തുടര്‍ച്ചയായി രണ്ട് സെഞ്ച്വറി നേടുന്ന ആദ്യ ഇന്ത്യ ആദ്യ ഇന്ത്യന്‍ വിക്കറ്റ് കീപ്പറാകാനും പന്തിന് സാധിച്ചിരുന്നു.

Content Highlight: India VS England: Rishabh Pant In Sixth Position Of ICC Test Batting Ranking