ഇന്ത്യ – ഇംഗ്ലണ്ട് ടെസ്റ്റ് പരമ്പരയിലെ മൂന്നാം ടെസ്റ്റിലെ മൂന്നാം ദിനം ലോര്ഡ്സില് പുരോഗമിക്കുകയാണ്. ടോസ് നേടി ബാറ്റിങ് തെരഞ്ഞെടുത്ത ഇംഗ്ലണ്ടിനെ 387 റണ്സിന് ഇന്ത്യ ഓള് ഔട്ട് ചെയ്തിരുന്നു. നിലവില് തുടര് ബാറ്റിങ്ങില് 99 ഓവറില് ആറ് വിക്കറ്റ് നഷ്ടത്തില് 335 റണ്സാണ് ഇന്ത്യ നേടിയത്.
ഇന്ത്യയ്ക്ക് വേണ്ടി ക്രീസിലുള്ളത് 94 പന്തില് 50 റണ്സ് നേടി അര്ധ സെഞ്ച്വറി പൂര്ത്തിയാക്കിയ രവീന്ദ്ര ജഡേജയും 11 പന്തില് 2 റണ്സ് നേടിയ വാഷിങ്ടണ് സുന്ദറുമാണ്. 91 പന്തില് നിന്ന് 30 റണ്സ് നേടി ജഡേജയുമായി മികച്ച കൂട്ടുകെട്ട് നേടിയ നിതീഷ് കുമാര് റെഡ്ഡിയേയാണ് ഇന്ത്യയ്ക്ക് അവസാനമായി നഷ്ടമായത്.
മാത്രമല്ല 177 പന്തില് 13 ഫോര് ഉള്പ്പെടെ 100 റണ്സ് നേടി മിന്നും പ്രകടനം കാഴ്ചവെച്ചാണ് കെ.എല്. രാഹുലിനെ ഇന്ത്യയ്ക്ക് നേരത്തെ നഷ്ടപ്പെട്ടിരുന്നു. രാഹുലിന് പുറമെ ഇന്ത്യയ്ക്ക് വേണ്ടി മിന്നും പ്രകടനം കാഴ്ചവെച്ചത് വൈസ് ക്യാപ്റ്റന് റിഷബ് പന്താണ്. 112 പന്തില് രണ്ട് സിക്സും എട്ട് ഫോറും ഉള്പ്പെടെ 74 റണ്സാണ് താരം നേടിയത്. ബെന് സ്റ്റോക്സിന്റെ ത്രോയില് ഒരു റണ് ഔട്ടിലാണ് താരം പുറത്തായത്.
പുറത്തായെങ്കിലും ഒരു വെടിക്കെട്ട് റെക്കോഡും തൂക്കിയാണ് പന്ത് കളം വിട്ടത്. ടെസ്റ്റ് ക്രിക്കറ്റില് ഇംഗ്ലണ്ടിനെതിരെ ഏറ്റവും കൂടുതല് സിക്സര് നേടുന്ന താരമാകാനാണ് പന്തിന് സാധിച്ചത്. ഈ നേട്ടത്തില് വിന്ഡീസ് ഇതിഹാസം വിവിയന് റിച്ചാര്ഡ്സിനെ മറികടക്കാനാണ് പന്തിന് സാധിച്ചത്.
റിഷബ് പന്ത് – ഇന്ത്യ – 36
വിവിയന് റിച്ചാര്ഡ്സ് – വെസ്റ്റ് ഇന്ഡീസ് – 34
ടിം സൗത്തി – ന്യൂസിലാന്ഡ് – 30
യശസ്വി ജെയ്സ്വാള് -ഇന്ത്യ – 27
മത്സരത്തിലെ രണ്ടാം ദിനം അവസാനിക്കുമ്പോള് ഇന്ത്യക്ക് ഓപ്പണര് യശസ്വി ജെയ്സ്വാളിനെയും (13) കരുണ് നായരേയും (40) ക്യാപ്റ്റന് ശുഭ്മന് ഗില്ലിനെയും (16) ഇന്ത്യയ്ക്ക് നഷ്ടമായിരുന്നു. നിലവില് ഇംഗ്ലണ്ടിന് വേണ്ടി ബെന് സ്റ്റോക്സ് രണ്ട് വിക്കറ്റ് നേടിയപ്പോള് ക്രിസ് വേക്സ്, ജോഫ്ര ആര്ച്ചര്, ഷൊയ്ബ് ബഷീര് എന്നിവരാണ് വിക്കറ്റുകള് നേടിയത്.
Content Highlight: India VS England: Rishabh Pant In Great Record Achievement Against England In Test