പ്രഥമ ടെന്ഡുല്ക്കര് – ആന്ഡേഴ്സണ് ട്രോഫിയിലെ ആദ്യ ടെസ്റ്റില് ഇന്ത്യയെ ഇംഗ്ലണ്ട് പരാജയപ്പെടുത്തിയിരുന്നു. ലീഡ്സിലെ ഹെഡിങ്ലിയില് നടന്ന മത്സരത്തില് അഞ്ച് വിക്കറ്റിന്റെ തോല്വിയാണ് ഇന്ത്യ വഴങ്ങിയത്. ഇന്ത്യ ഉയര്ത്തിയ 371 റണ്സിന്റെ വിജയലക്ഷ്യം ബെന് ഡക്കറ്റിന്റെ സെഞ്ച്വറി കരുത്തില് ഇംഗ്ലണ്ട് മറികടക്കുകയായിരുന്നു. ഇതോടെ അഞ്ച് മത്സരങ്ങളുള്ള പരമ്പരയില് ആതിഥേയര് മുമ്പിലെത്തി.
രണ്ട് ഇന്നിങ്സിലും ഇന്ത്യന് പേസ് ബൗളര് മുഹമ്മദ് സിറാജിന് പ്രതീക്ഷിച്ച പോലെ മികവ് പുലര്ത്താന് സാധിച്ചില്ലായിരുന്നു. ആദ്യ ഇന്നിങ്സില് 27 ഓവര് എറിഞ്ഞ് 122 റണ്സ് വിട്ടുകൊടുത്ത് രണ്ട് വിക്കറ്റുകളാണ് താരം നേടിയത്. 4.52 എന്ന എക്കോണമിയിലാണ് തോരത്തിന്റെ ബൗളിങ്.
രണ്ടാം ഇന്നിങ്സില് 14 ഓവര് എറിഞ്ഞ പേസര് വിക്കറ്റ് നേടാതെ 51 റണ്സ് വഴങ്ങി. നിര്ണായക ഘട്ടങ്ങളില് വിക്കറ്റ് നേടാന് സാധിക്കാത്തതും അധിക റണ്സ് വിട്ടുകൊടുക്കുകയും ചെയ്ത സിറാജിനെ വിമര്ശിച്ച് സംസാരിക്കുകയാണ് മുന് ഇന്ത്യന് താരം ആര്. അശ്വിന്. റണ്സ് നഷ്ടപ്പെടുന്നത് തടയാന് കഴിഞ്ഞില്ലെങ്കില് ക്യാപ്റ്റന് ബുംറയെ കൊണ്ടുവരേണ്ടിവരുമെന്നും, ഇത് ബുംറ പെട്ടന്ന് ക്ഷീണിതനാക്കുമെന്നും അശ്വിന് പറഞ്ഞു.
‘മുഹമ്മദ് സിറാജ് എങ്ങനെയാണ് അധിക റണ്സ് വഴങ്ങുന്നത്? എല്ലായിപ്പോഴും വിക്കറ്റ് വീഴ്ത്തുന്നില്ല. ഓരോ ഓവറിലും 4-5 റണ്സ് വിട്ടുകൊടുക്കുന്നത് നിര്ത്താന് നിങ്ങള്ക്ക് കഴിയുമോ? റണ്സ് നഷ്ടപ്പെട്ടുകൊണ്ടിരിക്കുകയാണെങ്കില് ക്യാപ്റ്റന് ബുംറയെ തിരികെ കൊണ്ടുവരേണ്ടി വരും. അദ്ദേഹത്തിന് എത്ര സമയം പിടിച്ചുനില്ക്കാന് കഴിയും?
ബുംറ ക്ഷീണിതനാകും, അവന്റെ ബൗളിങ് സ്പെല്ലുകള് സമ്മര്ദത്തിലാകുന്നു. പിന്നെ റണ്സിന്റെ ഒഴുക്ക് തടയാന് നിങ്ങള് ജഡേജയുടെ അടുത്തേക്ക് പോകണം. പ്രസിദ്ധ് കൃഷ്ണ ആദ്യമായി കളിക്കുകയാണ്, അദ്ദേഹത്തിന് അനുഭവപരിചയമില്ല. മുഹമ്മദ് സിറാജ് മോര്ണി മോര്ക്കലില് നിന്ന് ഉപദേശങ്ങള് സ്വീകരിക്കണം,’ ആര്. അശ്വിന്
Content Highlight: India VS England: R. Ashwin Criticize Mohammad Siraj’s Poor Performance