പ്രഥമ ടെന്ഡുല്ക്കര് – ആന്ഡേഴ്സണ് ട്രോഫിയിലെ ആദ്യ ടെസ്റ്റില് ഇന്ത്യയെ ഇംഗ്ലണ്ട് പരാജയപ്പെടുത്തിയിരുന്നു. ലീഡ്സിലെ ഹെഡിങ്ലിയില് നടന്ന മത്സരത്തില് അഞ്ച് വിക്കറ്റിന്റെ തോല്വിയാണ് ഇന്ത്യ വഴങ്ങിയത്. ഇന്ത്യ ഉയര്ത്തിയ 371 റണ്സിന്റെ വിജയലക്ഷ്യം ബെന് ഡക്കറ്റിന്റെ സെഞ്ച്വറി കരുത്തില് ഇംഗ്ലണ്ട് മറികടക്കുകയായിരുന്നു. ഇതോടെ അഞ്ച് മത്സരങ്ങളുള്ള പരമ്പരയില് ആതിഥേയര് മുമ്പിലെത്തി.
ഇന്ത്യയ്ക്ക് വേണ്ടി ആദ്യ രണ്ട് ഇന്നിങ്സിലും മിന്നും പ്രകടനമാണ് വൈസ് ക്യാപ്റ്റന് റിഷബ് പന്ത് കാഴ്ചവെച്ചത്. ആദ്യ ഇന്നിങ്സില് പന്ത് 134 (178) റണ്സാണ് സ്വന്തമാക്കിയത്. ആറ് സിക്സും 12 ഫോറും ഉള്പ്പെടെയാണ് പന്ത് സെഞ്ച്വറിയടിച്ചത്.
രണ്ടാം ഇന്നിങ്സിലും താരം സെഞ്ച്വറിയടിച്ച് കരുത്ത് തെളിയിച്ചു. 140 പന്തില് നിന്ന് മൂന്ന് സിക്സും 15 ഫോറും ഉള്പ്പെടെ 118 റണ്സാണ് താരം നേടിയത്. അഗ്രസീവ് ഷോട്ടുകള് കളിച്ച് ഇന്ത്യയുടെ സ്കോര് ഉയര്ത്തുന്നതില് പന്ത് നിര്ണായക പങ്കാണ് വഹിച്ചത്.
ഇപ്പോള് പന്തിന്റെ പ്രകടനത്തെ പ്രശംസിച്ച് സംസാരിക്കുകയാണ് ഓസ്ട്രേലിയന് ഇതിഹാസ താരം ഗ്രെഗ് ചാപ്പല്. മികച്ച താരത്തെയാണ് ഇന്ത്യയ്ക്ക് ലഭിച്ചതെന്നും പന്ത് ആദം ഗില്ക്രിസ്റ്റിനെ ഓര്മിപ്പിക്കുന്നുവെന്നും ചാപ്പല് പറഞ്ഞു. പന്ത് വളരെ പെട്ടെന്ന് റണ്സ് നേടുന്നതാണ് ഭംഗിയെന്നും പന്ത് കളിച്ച ചില ഷോട്ടുകള് എം.സി.സി കോച്ചിങ് മാനുവലില് പോലും ഇല്ലായിരുന്നെന്നും ഇതിഹാസം കൂട്ടിച്ചേര്ത്തു.
‘എന്തൊരു എക്സൈറ്റിങ്ങായ ക്രിക്കറ്റ് കളിക്കാരന്! നിങ്ങള്ക്ക് എത്ര മികച്ച ഒരു കളിക്കാരനേയാണ് ടീമില് കിട്ടിയിരിക്കുന്നത്. അവന് ആദം ഗില്ക്രിസ്റ്റിനെ ഓര്മിപ്പിച്ചു. ഒരു ടീമിന് ഉണ്ടാക്കാന് കഴിയുന്ന വ്യത്യാസം, ആ നിലയില് ബാറ്റ് ചെയ്യാനും വേഗത്തില് റണ്സ് നേടാനും കഴിയുന്ന ഒരു വിക്കറ്റ് കീപ്പറെ കണ്ടെത്തുക എന്നതാണ്.
റിഷബ് വളരെ വേഗത്തില് റണ്സ് നേടുന്നതാണ് അവന്റെ ഭംഗി. അത് ക്രിക്കറ്റ് മത്സരങ്ങള് ജയിക്കാന് നിങ്ങള്ക്ക് സമയം നല്കുന്നു. അവന് ഒരു അസാധാരണ പ്രകടനമായിരുന്നു ഹെഡിങ്ലിയില് നടത്തിയത്. അവന് കളിച്ച ചില ഷോട്ടുകള് ഞാന് അവസാനമായി നോക്കിയപ്പോള് എം.സി.സി കോച്ചിങ് മാനുവലില് പോലും ഇല്ലായിരുന്നു,’ 76 ഗ്രെഗ് ചാപ്പവല് പറഞ്ഞതായി സ്പോര്ട്സ്റ്റാര് റിപ്പോര്ട്ട് ചെയ്തു.
Content Highlight: India VS England: Greg Chappell Praises Rishabh Pant