ടെന്ഡുല്ക്കര് – ആന്ഡേഴ്സണ് ട്രോഫിയിലെ മൂന്നാം മത്സരത്തില് ഇന്ത്യ പരാജയമേറ്റുവാങ്ങിയിരിക്കുകയാണ്. ലോര്ഡ്സില് നടന്ന മത്സരത്തില് 22 റണ്സിന്റെ തോല്വിയാണ് ഇന്ത്യയ്ക്ക് നേരിടേണ്ടി വന്നത്. ഇംഗ്ലണ്ട് ഉയര്ത്തിയ 193 റണ്സിന്റെ വിജയലക്ഷ്യം പിന്തുടര്ന്നിറങ്ങിയ ഇന്ത്യ 170 റണ്സിന് പുറത്തായി.
അഞ്ചാം ദിവസം അനായാസം വിജയിക്കാന് സാധിക്കുന്ന മത്സരമാണ് ഇന്ത്യ ആതിഥേയര്ക്ക് മുമ്പില് അടിയറവ് പറഞ്ഞത്. ഈ വിജയത്തോടെ അഞ്ച് മത്സരങ്ങളുടെ പരമ്പരയിലെ മൂന്ന് മത്സരങ്ങള് അവസാനിച്ചപ്പോള് ഇംഗ്ലണ്ട് 2-1ന് മുമ്പിലാണ്.
ഇംഗ്ലണ്ട്: 387 & 192
ഇന്ത്യ: 387 & 170 (T: 193)
വിജയം സ്വന്തമാക്കിയെങ്കിലും ഇംഗ്ലണ്ട് സൂപ്പര് സ്പിന്നര് ഷൊയ്ബ് ബഷീര് ഇന്ത്യയ്ക്കെതിരായ ശേഷിക്കുന്ന പരമ്പരയില് നിന്ന് പുറത്തായിരിക്കുകയാണ്. മൂന്നാം ടെസ്റ്റില് കൈ വിരിലിനേറ്റ പരിക്കിനെ തുടര്ന്നാണ് 21കാരനായ ബഷീറിനെ ടീം പുറത്ത് നിര്ത്തിയത്. മാത്രമല്ല ഈ ആഴ്ചയുടെ അവസാനം ഒടിവ് സംഭവിച്ച സ്പിന്നര്ക്ക് ശസ്ത്രക്രിയ നടത്തുമെന്ന് ഇംഗ്ലണ്ട് ക്രിക്കറ്റ് ബോര്ഡ് പറഞ്ഞു.
‘ഇംഗ്ലണ്ട് സ്പിന്നര് ഷൊയ്ബ് ബഷീറിന്റെ ഇടതുവിരലിന് ഒടിവ് സംഭവിച്ചതിനാല് ഇന്ത്യയ്ക്കെതിരായ ടെസ്റ്റ് പരമ്പരയിലെ ശേഷിക്കുന്ന മത്സരങ്ങളില് നിന്ന് അദ്ദേഹം പുറത്തായി. ഈ ആഴ്ച അവസാനം അദ്ദേഹത്തിന് ശസ്ത്രക്രിയ നടത്തും. അടുത്ത രണ്ട് ദിവസത്തിനുള്ളില് എമിറേറ്റ്സ് ഓള്ഡ് ട്രാഫോര്ഡില് നടക്കുന്ന നാലാം ടെസ്റ്റിനുള്ള ഇംഗ്ലണ്ട് ടീമിനെ പ്രഖ്യാപിക്കും,’ ഇ.സി.ബി പറഞ്ഞു.
രണ്ടാം ഇന്നിങ്സില് ഇന്ത്യയ്ക്ക് വേണ്ടി അവസാനമിറങ്ങിയ മുഹമ്മദ് സിറാജിന്റെ വിക്കറ്റ് നേടിയത് ബഷീറായിരുന്നു. മാത്രമല്ല മത്സരത്തിലെ ആദ്യ ഇന്നിങ്സില് ഇന്ത്യയ്ക്ക് വേണ്ടി സെഞ്ച്വറി നേടിയ കെ.എല്. രാഹുലിന്റെ വിക്കറ്റ് നേടിയതും ബഷീറായിരുന്നു.
മത്സരത്തിലെ രണ്ടാം ഇന്നിങ്സില് ഇന്ത്യയ്ക്ക് വേണ്ടി മികച്ച പ്രകടനം നടത്തിയത് ഓള് റൗണ്ടര് രവീന്ദ്ര ജഡേജയാണ്. 181 പന്തില് നിന്ന് ഒരു സിക്സും നാല് ഫോറും ഉള്പ്പെടെ 61 റണ്സാണ് ജഡേജ നേടിയത്. ഇംഗ്ലണ്ടിന് വേണ്ടി നിര്ണായകമായ രണ്ടാം ഇന്നിങ്സില് ക്രിസ് വോക്സ് മൂന്ന് വിക്കറ്റും ജോഫ്ര ആര്ച്ചര്, ബെന് സ്റ്റോക്സ് എന്നിവര് രണ്ട് വിക്കറ്റും നേടിയപ്പോള് ശേഷിച്ച വിക്കറ്റുകള് ബ്രൈഡന് കാഴ്സും നേടി.
Content Highlight: India VS England: England spinner Shoaib Bashir ruled out after injury