ദക്ഷിണേഷ്യയിൽ മാധ്യമ സ്വാതന്ത്ര്യം ഇല്ലാതാക്കുന്ന വ്യാപകമായ പ്രവണതയുടെ ഭാഗമാണ് ഇന്ത്യ; റിപ്പോർട്ട്

ന്യൂദൽഹി: ദക്ഷിണേഷ്യയിൽ മാധ്യമ സ്വാതന്ത്ര്യം ഇല്ലാതാക്കുന്ന വ്യാപകമായ പ്രവണതയുടെ ഭാഗമാണ് ഇന്ത്യയെന്ന് റിപ്പോർട്ട്. 23-ാമത് വാർഷിക സൗത്ത് ഏഷ്യ പ്രസ് ഫ്രീഡം തയാറാക്കിയ ‘ഫ്രണ്ട്ലൈൻ ഡെമോക്രസി: മീഡിയ ആൻഡ് പൊളിറ്റിക്കൽ ചർൺ’ എന്ന റിപ്പോർട്ടിലാണ് ഈ വിവരം പറയുന്നത്. റിപ്പോർട്ട് പ്രകാരം 2024-25 ൽ ഇന്ത്യൻ മാധ്യമങ്ങൾ വ്യവസ്ഥാപിത തന്ത്രത്തിന് വിധേയമായിട്ടുണ്ട്.

ഇന്ത്യ, പാകിസ്ഥാൻ, അഫ്ഗാനിസ്ഥാൻ, ശ്രീലങ്ക, ബംഗ്ലാദേശ്, നേപ്പാൾ, ഭൂട്ടാൻ, മാലിദ്വീപ് എന്നീ രാജ്യങ്ങളിലെ മാധ്യമ സ്വാതന്ത്ര്യത്തിന്റെ അവസ്ഥ റിപ്പോർട്ട് അവലോകനം ചെയ്യുന്നു. ജനാധിപത്യത്തിന്റെ മറവിൽ പ്രവർത്തിക്കുന്ന ഒരു സ്വേച്ഛാധിപത്യ ഭരണകൂടമാണ് പാകിസ്ഥാൻ എന്ന് പഠനം ചൂണ്ടിക്കാട്ടി. രണ്ട് പതിറ്റാണ്ടിനിടയിൽ പാകിസ്ഥാനിൽ മാധ്യമപ്രവർത്തകർ ഏറ്റവും അക്രമം നേരിട്ട വർഷമാണിതെന്നും റിപ്പോർട്ട് ചൂണ്ടിക്കാട്ടി. റിപ്പോർട്ട് അവലോകന കാലയളവിൽ എട്ട് മാധ്യമപ്രവർത്തകർ കൊല്ലപ്പെട്ടു.

ദക്ഷിണേഷ്യയിലെ മിക്ക സർക്കാരുകളും മാധ്യമപ്രവർത്തകർക്കെതിരായ കുറ്റകൃത്യങ്ങൾക്ക് പരമാവധി ശിക്ഷ ഉറപ്പാക്കുന്നതിൽ പരാജയപ്പെട്ടെന്നും റിപ്പോർട്ട് പറയുന്നു. ഇന്ത്യയിലെ ബസ്തറിലെ മുകേഷ് ചന്ദ്രകറിന്റെ ദാരുണമായ കൊലപാതകം ഇത് കൂടുതൽ വെളിവാക്കുന്നുവെന്നും റിപ്പോർട്ട് പറഞ്ഞു. അദ്ദേഹത്തെ തട്ടിക്കൊണ്ടുപോയി കൊലപ്പെടുത്തി സെപ്റ്റിക് ടാങ്കിൽ കുഴിച്ചിടുകയായിരുന്നു.

‘ഇന്ത്യ: പ്രചാരണവും മാധ്യമങ്ങളും’ എന്ന തലക്കെട്ടോടെയുള്ള ഭാഗത്തിലാണ് ഇന്ത്യയെക്കുറിച്ച് പറയുന്നത്. വിവിധ രാഷ്ട്രീയ പാർട്ടികളുടെ ഐ.ടി സെല്ലുകൾ വഴി വിദ്വേഷ പ്രസംഗങ്ങളും തെറ്റായ വിവരങ്ങളും വ്യാപകമായി പ്രചരിക്കുന്നുണ്ടെന്ന് റിപ്പോർട്ട് ചൂണ്ടിക്കാണിച്ചു. സമീപ വർഷങ്ങളിൽ മാധ്യമങ്ങൾക്കുള്ള നിയമപരമായ അന്തരീക്ഷം കൂടുതൽ ശത്രുതാപരമായിരിക്കുന്നുവെന്നും റിപ്പോർട്ടിൽ പറയുന്നു.

മാധ്യമ സ്വാതന്ത്ര്യം തടയുന്നതിന് രാജ്യദ്രോഹക്കുറ്റം, നിയമവിരുദ്ധ പ്രവർത്തനങ്ങൾ (തടയൽ) നിയമം (യു.എ.പി.എ), കള്ളപ്പണം വെളുപ്പിക്കൽ തടയൽ നിയമം (പി.എം.എൽ.എ) തുടങ്ങിയ നിയമങ്ങൾ ഉപയോഗിക്കുന്നതായി റിപ്പോർട്ട് ചൂണ്ടിക്കാട്ടി. ‘സർക്കാരിനെ വിമർശിക്കുന്ന റിപ്പോർട്ടുകൾ പ്രസിദ്ധീകരിക്കുന്നതിന് മാധ്യമപ്രവർത്തകരും മാധ്യമ സ്ഥാപനങ്ങളും നിയമപരമായ വെല്ലുവിളികൾ നേരിട്ടിട്ടുണ്ട്. ഇത് മാധ്യമങ്ങളിൽ സ്വയം സെൻസർഷിപ്പിന് കാരണമായി,’ റിപ്പോർട്ട് പറഞ്ഞു.

മാധ്യമ സ്ഥാപനങ്ങളെ നിരീക്ഷിക്കുക, മാധ്യമപ്രവർത്തകരെ ഭീഷണിപ്പെടുത്തൽ, ഉപദ്രവിക്കൽ, പൊലീസ് കേസുകൾ ഫയൽ ചെയ്യൽ, ഏകപക്ഷീയമായ തടങ്കലുകൾ, ആദായനികുതി വകുപ്പും സാമ്പത്തിക കുറ്റകൃത്യങ്ങൾ മേൽനോട്ടം വഹിക്കുന്ന എൻഫോഴ്‌സ്‌മെന്റ് ഡയറക്ടറേറ്റും നടത്തുന്ന റെയ്ഡുകൾ തുടങ്ങിയവ മാധ്യമ സ്വാതന്ത്ര്യത്തെ ഇല്ലാതാക്കുന്നുവെന്നും റിപ്പോർട്ടിൽ പറയുന്നു.

‘സർക്കാർ പരസ്യങ്ങൾ തടഞ്ഞുവയ്ക്കുന്നത് മാധ്യമ സ്ഥാപനങ്ങളെ ഉപദ്രവിക്കാനുള്ള പതിവ് വഴികളാണ്. ദേശീയ സുരക്ഷ, പൊതു ക്രമം നിലനിർത്തൽ, തെറ്റായ വിവരങ്ങൾ തടയൽ എന്നിവയുടെ അടിസ്ഥാനത്തിൽ സംസാര സ്വാതന്ത്ര്യത്തിനും ആവിഷ്‌കാര സ്വാതന്ത്ര്യത്തിനും നേരെയുള്ള നിരന്തരമായ കൈയേറ്റങ്ങൾ നടക്കുന്നുണ്ട്,’ റിപ്പോർട്ട് പറഞ്ഞു.

ആഗോളതലത്തിൽ തെറ്റായ വിവരങ്ങളുടെ ഏറ്റവും ഉയർന്ന അപകടസാധ്യത ഇന്ത്യയിലാണെന്ന് പറയുന്ന 2024 ലെ ഗ്ലോബൽ റിസ്ക് റിപ്പോർട്ടിനെക്കുറിച്ചും ഈ റിപ്പോർട്ട് പരാമർശിച്ചു.

Content Highlight: India a part of wider trend of eroding press freedom in South Asia: report