ടെന്ഡുല്ക്കര് – ആന്ഡേഴ്സണ് ട്രോഫിയിലെ രണ്ടാം മത്സരത്തില് ഇന്ത്യ വിജയം സ്വന്തമാക്കിയിരുന്നു. ബെര്മിങ്ഹാമിലെ എഡ്ജ്ബാസ്റ്റണില് നടന്ന മത്സരത്തില് 336 റണ്സിന്റെ വിജയമാണ് ഇന്ത്യ നേടിയത്. ഇതോടെ പരമ്പരയില് ഇന്ത്യ ഇംഗ്ലണ്ടിനോടൊപ്പമെത്തി.
ഇന്ത്യ ഉയര്ത്തിയ 608 റണ്സിന്റെ വിജയലക്ഷ്യം പിന്തുടര്ന്നിറങ്ങിയ ഇംഗ്ലണ്ട് 271ന് പുറത്തായി. ക്യാപ്റ്റന് ശുഭ്മന് ഗില്ലിന്റെ ബാറ്റിങ് കരുത്തിലും ആകാശ് ദീപ്, മുഹമ്മദ് സിറാജ് എന്നിവരുടെ ബൗളിങ് കരുത്തിലുമാണ് ഇന്ത്യ വിജയം പിടിച്ചടക്കിയത്.
മത്സരത്തില് സൂപ്പര് താരം ജസ്പ്രീത് ബുംറയ്ക്ക് പകരക്കാരനായി എത്തിയ യുവ താരം ആകാശ് ദീപ് ഇംഗ്ലണ്ടിന്റെ മണ്ണില് മിന്നും പ്രകടനമാണ് നടത്തിയത്. രണ്ടാം ഇന്നിങ്സില് ആറ് വിക്കറ്റുകളാണ് താരം നേടിയത്. 4.68 എക്കോണമിയില് 21.1 ഓവറുകളില് പന്തെറിഞ്ഞായിരുന്നു താരത്തിന്റെ ഈ പ്രകടനം.
ഇതിന് പുറമെ, ആകാശ് ആദ്യ ഇന്നിങ്സില് നാല് വിക്കറ്റും വീഴ്ത്തിയിരുന്നു. ഇരു ഇന്നിങ്സിലുമായി പേസ് ബൗളര് നേടിയത് പത്ത് വിക്കറ്റുകളാണ്. ഇപ്പോള് താരത്തെ പ്രശംസിക്കുകയാണ് മുന് ഇന്ത്യന് നായകന് സൗരവ് ഗാംഗുലി. മത്സരത്തില് ആകാശ് ദീപ് അതിശയകരമായ പ്രകടമാണ് കാഴ്ച വെച്ചതെന്നും അവന് തന്നെ മുഹമ്മദ് ഷമിയെ ഓര്മിപ്പിച്ചുവെന്നും അദ്ദേഹം പറഞ്ഞു.
ജോ റൂട്ടിനെ പുറത്താക്കിയ ആകാശിന്റെ ആ പന്ത് ഏതൊരു താരത്തെയും ഔട്ടാക്കാന് കെല്പ്പുള്ളതാണ് എന്ന് അദ്ദേഹം കൂട്ടിച്ചേര്ത്തു. റേവ് സ്പോര്ട്സിനോട് സംസാരിക്കുകയായിരുന്നു സൗരവ് ഗാംഗുലി.
‘മത്സരത്തില് ആകാശ് ദീപ് അതിശയകരമായ പ്രകടമാണ് കാഴ്ച വെച്ചത്. അവന് ക്രീസ് ഉപയോഗിച്ച രീതി മികച്ചതായിരുന്നു. കൂടാതെ, പന്തെറിയുന്നതിനുള്ള അവന്റെ റണ് അപ്പും ബൗളിങ്ങിലെ സ്വിങ്ങും മികച്ചതായിരുന്നു. അവന് എന്നെ മുഹമ്മദ് ഷമിയെ ഓര്മിപ്പിച്ചു.
ഷമി തന്റെ പ്രതാപ കാലത്ത് പന്തെറിയുന്നത് പോലെയാണ് ആകാശ് ബൗള് ചെയ്യുന്നത്. ജോ റൂട്ടിനെ പുറത്താക്കിയ അവന്റെ ആ പന്ത് ഏതൊരു താരത്തെയും ഔട്ടാക്കാന് കെല്പ്പുള്ളതാണ്,’ ഗാംഗുലി പറഞ്ഞു.
Content Highlight: Ind vs Eng: Sourav Ganguly praises Akash Deep