ജയ്പൂർ: ഈദ് ദിനത്തിൽ സാഹോദര്യത്തിന്റെ സന്ദേശവുമായി ജയ്പൂരിലെ വിശ്വാസി സമൂഹം, ഈദ്ഗാഹിന് നേരെ പുഷ്പാർച്ചന നടത്തുന്ന ഹിന്ദു മത വിശ്വാസികളുടെ ദൃശ്യങ്ങൾക്ക് സമൂഹ മാധ്യമങ്ങളിൽ ലഭിച്ചത് വൻ പിന്തുണ.
ഹിന്ദു – മുസ്ലിം ഏകതാ സമിതിയാണ് സാമൂഹിക ഐക്യത്തെ ഉയർത്തിപ്പിടിക്കുന്നതിന് വേണ്ടി ഇത്തരമൊരു പരിപാടി സംഘടിപ്പിച്ചത്.
‘രാമനില്ലാതെ റമദാൻ ഇല്ല, ഈദ് ഇല്ലാതെ ദീപാവലി ഇല്ല, നമ്മൾ ഒന്നാണെന്ന സന്ദേശം നൽകാനാണ് ഞങ്ങൾ ആഗ്രഹിക്കുന്നത്,’ ഹിന്ദു-മുസ്ലിം ഏകതാ സമിതി അംഗം രാജേഷ് കുമാർ ശർമ പറഞ്ഞു.
‘ഇതാണ് എന്റെ രാജസ്ഥാൻ, ഈ ഉദ്യമത്തോടൊപ്പം ഞാനും പങ്കുചേരുന്നു,’ കോൺഗ്രസ് നേതാവ് പവൻ ഖേര വീഡിയോ പങ്കുവച്ചുകൊണ്ട് പറഞ്ഞു.
നിരവധിപേരാണ് വീഡിയോ ദൃശ്യം ഇതിനോടകം പങ്കുവച്ചിട്ടുള്ളത്. സമൂഹത്തിൽ വലിയ വിഭജന ശ്രമങ്ങൾ നടക്കുന്നതിനിടയിൽ ഈ ദൃശ്യങ്ങൾ ഇന്ത്യയുടെ ഐക്യത്തെ കാണിക്കുന്നതാണെന്നാണ് പൊതുവിലുള്ള അഭിപ്രായങ്ങൾ.
അതേസമയം ദൽഹിയിലെ ഉത്തം നഗറിൽ നിന്നും സമാനമായ മറ്റൊരു ദൃശ്യവും പുറത്തുവന്നിട്ടുണ്ട്. ഈ ദൃശ്യത്തിൽ ഈദ് നമസ്കാരത്തിന് സുരക്ഷയൊരുക്കിയ പൊലീസ് ഉദ്യോഗസ്ഥർക്ക് ഇസ്ലാം മത വിശ്വാസികളാണ് പുഷ്പാർച്ചന നടത്തിയത്.
Content Highlight:Hindu devotees in Jaipur shower flowers on Eidgah; footage goes viral on social media