കോട്ടയം: കോട്ടയം മെഡിക്കല് കോളേജില് ചികിത്സ കിട്ടാതെ രോഗി മരിച്ച സംഭവത്തില് അന്വേഷണം നടത്തി റിപ്പോര്ട്ട് നല്കാന് ഉത്തരവിട്ട് ആരോഗ്യമന്ത്രി കെ.കെ ശൈലജ. മെഡിക്കല് വിദ്യാഭ്യാസ ഡയറക്ടര് അന്വേഷിച്ച് റിപ്പോര്ട്ട് നല്കണം എന്നാണ് നിര്ദ്ദേശം.
ഇടുക്കി സ്വരാജ് സ്വദേശി ജേക്കബ് തോമസാണ് മരിച്ചത്. ഉച്ചയ്ക്ക് ആശുപത്രിയില് എത്തിച്ച ജേക്കബിനെ ചികിത്സിക്കാന് ഡോക്ടര്മാര് തയ്യാറായില്ലെന്നാണ് ആരോപണം. എച്ച്.വണ്.എന്.വണ് പനി ബാധിച്ച് ആശുപത്രിയിലെത്തിയ 62 വയസുകാരനായ ജേക്കബ് തോമസിനെ വെന്റിലേറ്റര് ഇല്ലാത്തതിനാല് ആശുപത്രി അധികൃതര് മടക്കി അയക്കുകയായിരുന്നു.
തുടര്ന്ന് രണ്ടു സ്വകാര്യ ആശുപത്രികളില് കൊണ്ടുപോയെങ്കിലും അവരും രോഗിയെ ചികിത്സിക്കാന് തയ്യാറായില്ല.
രോഗിയെ നാലുമണിയോടെ മെഡിക്കല് കോളെജില് തിരച്ചെത്തിച്ചെങ്കിലും ആശുപത്രിയില് പ്രവേശിപ്പിക്കാനും അധികൃതര് തയ്യാറായില്ലെന്നും ആരോപണമുണ്ട്.
പിന്നീട് ആംബുലന്സില് കിടന്ന് ജേക്കബ് മരിക്കുകയായിരുന്നു. മരണം സ്ഥിരീകരിക്കാനും അധികൃതര് തയ്യാറായില്ലെന്നും കൂടെയുണ്ടായിരുന്നവര് പറഞ്ഞു.
ബന്ധുക്കള് ജേക്കബ് തോമസിന്റെ മൃതദേഹം വഹിച്ചുകൊണ്ടുള്ള ആംബുലന്സ് കോട്ടയം മെഡിക്കല് കോളേജിന്റെ മുന്നില് നിര്ത്തിയിട്ട് പ്രതിഷേധിക്കുകയാണ്. ഏറ്റുമാനൂര് പൊലീസ് സംഭവസ്ഥലത്തെത്തി മരിച്ചയാളുടെ മകളുടെ മൊഴി രേഖപ്പെടുത്തി.