ന്യൂസിലാന്‍ഡിനെതിരായ അഞ്ച് ടി-20 മത്സരങ്ങളടങ്ങുന്ന പരമ്പരയിലെ അവസാന മത്സരത്തില്‍ ഇന്ത്യയ്ക്ക് ഏഴുവിക്കറ്റ് തോല്‍വി. സീഡന്‍ പാര്‍ക്കില്‍ നടന്ന മത്സരത്തില്‍ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ എട്ട് വിക്കറ്റ് നഷ്ടത്തില്‍ 191 റണ്‍സാണ് നേടിയത്. വിജയലക്ഷ്യം പിന്തുടര്‍ന്ന ന്യൂസിലാന്‍ഡ് രണ്ട് ഓവര്‍ ബാക്കി നില്‍ക്കേ മൂന്ന് വിക്കറ്റ് നഷ്ടത്തില്‍ 195 റണ്‍സ് നേടി വിജയം സ്വന്തമാക്കുകയായിരുന്നു. അവസാന രണ്ട് മത്സരത്തില്‍ ന്യൂസിലാന്‍ഡ് വിജയിച്ചെങ്കിലും 3-2 ന് പരമ്പര ഇന്ത്യ സ്വന്തമാക്കി.
പരമ്പരയില്‍ വെടിക്കെട്ട് പ്രകടനമാണ് കിവീസിന്റെ സൂപ്പര്‍ താരം ഗ്ലെന്‍ ഫിലിപ്സ് കാഴ്ചവെച്ചത്. അഞ്ച് മത്സരങ്ങലില്‍ നിന്ന് ഒരു സെഞ്ച്വറിയും മൂന്ന് ഫിഫ്റ്റിയും ഉള്‍പ്പെടെ 341 റണ്‍സാണ് താരം സ്വന്തമാക്കിയത്. 82*, 70, 17, 107, 65* എന്നിങ്ങനെയാണ് താരം സ്‌കോര്‍ ചെയ്തതത്. 185 എന്ന കിടിലന്‍ സ്‌ട്രൈക്ക് റേറ്റിലാണ് താരം സീരീസില്‍ ബാറ്റ് വീശിയത്.
പരമ്പരയിലെ താരമാകാനും ഫിലിപ്‌സിന് സാധിച്ചിരുന്നു. ഇതോടെ ഒരു തകര്‍പ്പന്‍ റെക്കോഡ് സ്വന്തമാക്കാനും ഫിലിപ്‌സിന് സാധിച്ചിരിക്കുകയാണ്. അന്താരാഷ്ട്ര ടി-20യിലെ ഒരു ബൈലാട്രല്‍ സീരീസില്‍ ഏറ്റവും കൂടുതല്‍ റണ്‍സ് നേടിയ താരമാകാനാണ് കിവീസ് സൂപ്പര്‍ താരത്തിന് സാധിച്ചത്. ഈ നേട്ടത്തില്‍ ഇംഗ്ലണ്ട് സൂപ്പര്‍ താരം ഫില്‍ സാള്‍ട്ടിനെ മറികടന്നാണ് ഫിലിപ്സ് ഈ നേട്ടം കൈവരിച്ചത്.
(താരം, റണ്‍സ്, മത്സരങ്ങള്‍, എതിരാളി, സീസണ്‍ എന്ന ക്രമത്തില്‍)
ഗ്ലെന്‍ ഫിലിപ്സ് (ന്യൂസിലാന്‍ഡ്) – 333 – 5 – ഇന്ത്യ – 2026/27
ഫില്‍ സാള്‍ട്ട് (ഇംഗ്ലണ്ട്) – 331 – 5 – വെസ്റ്റ് ഇന്‍ഡീസ് – 2023/24
മുഹമ്മദ് റിസ്‌വാന്‍ (പാകിസ്ഥാന്‍) – 316 – 6 – ഇംഗ്ലണ്ട് – 2022
മാര്‍ക്ക് ചാപ്മാന്‍ (ന്യൂസിലാന്‍ഡ്) – 290 – 7 – പാകിസ്ഥാന്‍ – 2023
ബാബര്‍ അസം (പാകിസ്ഥാന്‍) – 285 – 7 – ഇംഗ്ലണ്ട് – 2022
അതേസമയം മത്സരത്തില്‍ ടിം സീഫര്‍ട്ടും ഗ്ലെന്‍ ഫിലിപ്സിന്റെയും കരുത്തിലാണ് ന്യൂസിലാന്‍ഡ് വിജയം സ്വന്തമാക്കിയത്.
ന്യൂസിലാന്‍ഡിന് തുടക്കത്തില്‍ തന്നെ ഓപ്പണര്‍ ഫിന്‍ അലനെ നഷ്ടപ്പെട്ടു. രണ്ടാമത്തെ ഓവറില്‍ അര്‍ഷ്ദീപ് സിങ്ങാണ് ഇന്ത്യയക്ക് വേണ്ടി ആദ്യ വിക്കറ്റ് നേടിയത്. വിക്കറ്റ് നഷ്ടപ്പെട്ടെങ്കിലും ടിം സീഫര്‍ട്ടും ഡാരില്‍ മിച്ചലും ചേര്‍ന്ന് ന്യൂസിലാന്‍ഡിന്റെ സ്‌കോര്‍ ഉയര്‍ത്തിക്കൊണ്ടിരുന്നു. ഒമ്പതാം ഓവറില്‍ ഡാരില്‍ മിച്ചല്‍ പുറത്താകുമ്പോഴേക്കും സ്‌കോര്‍ 93ല്‍ എത്തിയിരുന്നു.
പിന്നീട് ക്രീസിലെത്തിയ ഗ്ലെന്‍ ഫിലിപ്സിനെ കൂട്ടുപിടിച്ച് സീഫര്‍ട്ട് ന്യൂസിലാന്‍ഡിന്റെ സ്‌കോര്‍ ഉയര്‍ത്തി. 50 പന്തില്‍ നിന്നും 93 റണ്‍സെടുത്ത ടിം സീഫര്‍ട്ടിനെ നിതീഷ് കുമാര്‍ റെഡ്ഡി 16ാം ഓവറില്‍ പുറത്താക്കി. 11 ഫോറും അഞ്ച് സിക്സറുകളും അടങ്ങുന്നതായിരുന്നു സീഫര്‍ട്ടിന്റെ ഇന്നിങ്സ്.
18ാം ഓവറിന്റെ അവസാനപന്തില്‍ ഭുവനേശ്വര്‍ കുമാറിനെ ബൗണ്ടറി കടത്തി ഗ്ലെന്‍ ഫിലിപ്സ് ന്യൂസിലാന്‍ഡിനെ വിജയത്തിലേക്കെത്തിച്ചു. 38 പന്തില്‍ എട്ട് ഫോറുകളും മൂന്ന് സിക്സറുകളുമടക്കം 65 റണ്‍സ് നേടി ഗ്ലെന്‍ ഫിലിപ്സ് പുറത്താവാതെ നിന്നു.
വിക്കറ്റ് കീപ്പര്‍ ഇഷാന്‍ കിഷന്റെയും ക്യാപ്റ്റന്‍ ശ്രേയസ് അയ്യരുടെയും അര്‍ധ സെഞ്ച്വറികളുടെ കരുത്തിലാണ് ഇന്ത്യ മാന്യമായ ടോട്ടല്‍ നേടിയത്. ഇഷാന്‍ 32 പന്തുകളില്‍ നിന്നും 61 റണ്‍സ് നേടിയാണ് തിളങ്ങിയത്. അഞ്ച് വീതം ഫോറുകളും സിക്സുകളുമാണ് വിക്കറ്റ് കീപ്പറുടെ ബാറ്റില്‍ നിന്നും പിറന്നത്.
മൂന്ന് ഫോറുകളും നാല് സിക്സുകളും അടക്കം 23 പന്തില്‍ 50 റണ്‍സാണ് ക്യാപ്റ്റന്‍ അയ്യര്‍ നേടിയത്. നമന്‍ ധിര്‍ 23 പന്തില്‍ 33 റണ്‍സും നിതീഷ് കുമാര്‍ റെഡ്ഡി 17 പന്തില്‍ 22 റണ്‍സും നേടി.
Content Highlight: Glenn Philips Becomes Highest Run-scorer in a bilateral T20I series