സിനിമാപ്രേമികൾക്ക് തിരക്കേറിയ മാസമാകുകയാണ് നവംബർ. ഇന്ത്യൻ സിനിമയിലെ വമ്പൻ പ്രോജക്ടായ ‘രാമായണ’ മുതൽ സൂര്യയും നസ്‌ലനും ഒന്നിക്കുന്ന ‘സീൻ’, മമ്മൂട്ടിയും ധനുഷും ഒരുമിക്കുന്ന ‘ഓം’ തുടങ്ങി നിരവധി ചിത്രങ്ങളാണ് ഈ മാസം തിയേറ്ററുകളിലേക്ക് എത്തുന്നത്. മലയാളത്തിൽ ഡിസ്കോ, ബാച്ച്ലർ പാർട്ടി ഡ്യൂ, കോസ്മിക് സാംസൺ തുടങ്ങിയ ചിത്രങ്ങളും റിലീസിനൊരുങ്ങുന്നുണ്ട്. തമിഴ്, തെലുങ്ക് സിനിമകളിൽ നിന്നുള്ള വമ്പൻ ചിത്രങ്ങളും കൂടി എത്തുന്നതോടെ നവംബറിൽ സിനിമാപ്രേമികൾക്ക് മികച്ച സിനിമ അനുഭവമായിരിക്കും ലഭിക്കുന്നത്.
നവംബർ അഞ്ച്: രാമായണ
രൺബീർ കപൂർ രാമനായും സായ് പല്ലവി സീതയായും യാഷ് രാവണനായും എത്തുന്ന ‘രാമായണ: റൈസ് ഓഫ് എ ലെജൻഡ്’ ആണ് നവംബറിലെ പ്രധാന റിലീസുകളിലൊന്ന്. നിതേഷ് തിവാരി സംവിധാനം ചെയ്യുന്ന ചിത്രം രണ്ട് ഭാഗങ്ങളായാണ് ഒരുങ്ങുന്നത്. സണ്ണി ഡിയോൾ ഹനുമാനായും രവി ദുബെ ലക്ഷ്മണനായും എത്തുന്നു. ഹാൻസ് സിമ്മറും എ.ആർ. റഹ്മാനും ചേർന്നാണ് ചിത്രത്തിന് സംഗീതം ഒരുക്കുന്നത്. വമ്പൻ താരനിരയും വിഷ്വൽ ഇഫക്ട്സും ചിത്രത്തിന്റെ പ്രധാന ആകർഷണങ്ങളാണ്. ആദ്യഭാഗം നവംബർ 5ന് ആഗോളതലത്തിൽ തിയേറ്ററുകളിലെത്തും.
രാമായണ,ഡിസ്കോ,മൂക്കുത്തി അമ്മൻ 2. Photo. IMDb
നവംബർ ആറ്: മലയാളത്തിൽ ‘ഡിസ്കോ’, തമിഴിൽ ‘സീൻ’
നവംബർ ആറിന് മലയാളത്തിൽ ഉല്ലാസ് ചെമ്പൻ സംവിധാനം ചെയ്യുന്ന ‘ഡിസ്കോ’ തിയേറ്ററുകളിലെത്തും. ആന്റണി വർഗീസ്, അർജുൻ അശോകൻ, ലുക്മാൻ അവറാൻ, ചെമ്പൻ വിനോദ് ജോസ്, ദേവ് മോഹൻ, ശ്രീനാഥ് ഭാസി, വിഷ്ണു ഉണ്ണികൃഷ്ണൻ, ഫെമിന ജോർജ് എന്നിവരാണ് ചിത്രത്തിലെ പ്രധാന താരങ്ങൾ. അധോലോകത്തിന്റെ അപകടകരമായ ലോകത്തേക്ക് കടക്കുന്ന ഒരു സാധാരണക്കാരന്റെ മാറ്റങ്ങളാണ് സിനിമയുടെ പ്രമേയം.
അതേസമയം, ‘ആവേശം’, ‘രോമാഞ്ചം’ എന്നീ ചിത്രങ്ങൾക്കുശേഷം ജിത്തു മാധവൻ ഒരുക്കുന്ന തമിഴ് ചിത്രമായ ‘സീൻ’ നവംബർ ആറിന് റിലീസ് ചെയ്യും. സൂര്യ, നസ്‌ലെൻ, നസ്രിയ നസീം എന്നിവർ പ്രധാന വേഷങ്ങളിലെത്തുന്ന ചിത്രത്തിന് സംഗീതം ഒരുക്കുന്നത് സുഷിൻ ശ്യാമാണ്. സൂര്യയുടെ 47-ാമത്തെ ചിത്രമായ ‘സീൻ’ ജിത്തു മാധവന്റെ തമിഴ് സംവിധാന അരങ്ങേറ്റം കൂടിയാണ്.
നവംബർ ആറ്: ഗോഡ്‌സില്ലയും മൂക്കുത്തി അമ്മൻ 2വും
ജാപ്പനീസ് ചിത്രമായ ‘ഗോഡ്‌സില്ല മൈനസ് സീറോ’യും നവംബർ 6ന് ചില അന്താരാഷ്ട്ര വിപണികളിൽ റിലീസ് ചെയ്യും. തകാഷി യമസാക്കി രചനയും സംവിധാനവും നിർവഹിക്കുന്ന ചിത്രം ‘ഗോഡ്‌സില്ല മൈനസ് വൺ’ എന്ന സിനിമയുടെ തുടർച്ചയാണ്. യുദ്ധാനന്തര ജപ്പാനിലേക്ക് വീണ്ടും ഉയർന്നുവരുന്ന ഗോഡ്‌സില്ല സൃഷ്ടിക്കുന്ന ഭീഷണിയാണ് ചിത്രത്തിന്റെ പ്രമേയം.
നയൻതാര പ്രധാന വേഷത്തിലെത്തുന്ന തമിഴ് ഫാന്റസി കോമഡി ചിത്രം ‘മൂക്കുത്തി അമ്മൻ 2’വും നവംബർ ആറിന് റിലീസ് ചെയ്യാനാണ് നിശ്ചയിച്ചിരിക്കുന്നത്. 2020ൽ പുറത്തിറങ്ങിയ ‘മൂക്കുത്തി അമ്മൻ’ ചിത്രത്തിന്റെ തുടർച്ചയായാണ് ഇത് എത്തുന്നത്. ആദ്യഭാഗത്തിൽ ദൈവത്തിന്റെ വേഷത്തിലെത്തിയ നയൻതാരയുടെ കഥാപാത്രം ഒരു ആൾദൈവത്തിന്റെ തട്ടിപ്പുകൾ പുറത്തുകൊണ്ടുവരുന്നതായിരുന്നു കഥയുടെ കേന്ദ്രം. വൻ ബജറ്റിൽ ഒരുക്കിയ ചിത്രം വൻ പ്രതീക്ഷയോടെയാണ് തിയേറ്ററുകളിലെത്തുന്നത്.
നവംബർ 19: ബാച്ച്ലർ പാർട്ടി D’eux
അമൽ നീരദ് സംവിധാനം ചെയ്യുന്ന ‘ബാച്ച്ലർ പാർട്ടി ഡ്യൂ’ നവംബർ 19ന് തിയേറ്ററുകളിലെത്തും. 2012ൽ പുറത്തിറങ്ങിയ ‘ബാച്ച്ലർ പാർട്ടി’യുടെ തുടർച്ചയായിക്കൊണ്ടാണ് ചിത്രമെത്തുന്നത്. നസ്‌ലെൻ, ടൊവിനോ തോമസ്, കുഞ്ചാക്കോ ബോബൻ, സൗബിൻ ഷാഹിർ, ഷറഫുദ്ദീൻ, ശ്രീനാഥ് ഭാസി, ഷൈൻ ടോം ചാക്കോ തുടങ്ങി വലിയൊരു താരനിരയാണ് ചിത്രത്തിലുള്ളത്. ക്രിസ്റ്റോ സേവ്യറാണ് ചിത്രത്തിന് സംഗീതം ഒരുക്കുന്നത്.
നവംബർ 20: മമ്മൂട്ടി–ധനുഷ് ചിത്രം ‘ഓം’
മമ്മൂട്ടിയും ധനുഷും ആദ്യമായി ഒന്നിക്കുന്ന ‘ഓം: ചാപ്റ്റർ 1 – ഉദിരം: ദ ബ്ലഡ് വുഡ്’ നവംബർ 20ന് തിയേറ്ററുകളിലെത്തും. ‘അമരൻ’ സംവിധായകൻ രാജ്കുമാർ പെരിയസാമി ഒരുക്കുന്ന ചിത്രത്തിൽ സായ് പല്ലവി, ശ്രീലീല, നസറുദ്ദീൻ ഷാ, ഇന്ദ്രൻസ് എന്നിവരും പ്രധാന വേഷങ്ങളിലുണ്ട്. ആദ്യം ഒക്ടോബർ 16ന് റിലീസ് ചെയ്യാനിരുന്ന ചിത്രം പിന്നീട് നവംബറിലേക്ക് മാറ്റുകയായിരുന്നു.
നവംബർ 20: ദുൽഖറിന്റെ ‘ആകാശംലോ ഒക്ക താര’
ദുൽഖർ സൽമാൻ നായകനാകുന്ന തെലുങ്ക് ചിത്രം ‘ആകാശംലോ ഒക്ക താര’യും നവംബർ 20ന് റിലീസ് ചെയ്യും. പവൻ സദിനേനി സംവിധാനം ചെയ്യുന്ന ചിത്രത്തിൽ പുതുമുഖം സത്വിക വീരവല്ലിയാണ് നായിക. തെലുങ്കിനൊപ്പം മലയാളം, തമിഴ്, കന്നഡ, ഹിന്ദി ഭാഷകളിലും ചിത്രം പുറത്തിറങ്ങും. പ്രണയവും സ്വപ്നങ്ങളും ലക്ഷ്യങ്ങളിലേക്കുള്ള യാത്രയും പ്രമേയമാകുന്ന ചിത്രമാണിത്.
നവംബർ 27: രശ്മികയുടെ ‘മൈസ’യും ‘കോസ്മിക് സാംസണും’
രശ്മിക മന്ദാന നായികയാകുന്ന പാൻ-ഇന്ത്യൻ ചിത്രം ‘മൈസ’ നവംബർ 27ന് റിലീസ് ചെയ്യും. ഗോണ്ട് ഗോത്രവിഭാഗത്തിന്റെ പശ്ചാത്തലത്തിൽ ഒരുങ്ങുന്ന ആക്ഷൻ ഡ്രാമയിൽ ശക്തമായൊരു സ്ത്രീ കഥാപാത്രത്തെയാണ് രശ്മിക അവതരിപ്പിക്കുന്നത്. തീവ്രമായ ആക്ഷൻ രംഗങ്ങളും കഥാപാത്രത്തിന്റെ ശാരീരിക മാറ്റങ്ങളുമാണ് ചിത്രത്തിന്റെ പ്രത്യേകതകൾ. തെലുങ്ക്, ഹിന്ദി, തമിഴ്, കന്നഡ, മലയാളം ഭാഷകളിലാണ് ചിത്രം എത്തുന്നത്.
കോസ്മിക് സാംസൺ,ബാച്ച്ലർ പാർട്ടി D’eux,ആകാശംലോ ഒക്ക താര. Photo. IMDb
സന്ദീപ് പ്രദീപ് നായകനാകുന്ന മലയാള ചിത്രം ‘കോസ്മിക് സാംസൺ’ നവംബർ 27ന് റിലീസ് ചെയ്യും. അഭിജിത് ജോസഫ് സംവിധാനം ചെയ്യുന്ന ഫാന്റസി ആക്ഷൻ ചിത്രത്തിൽ മുകേഷ്, മിയ ജോർജ്, അൽത്താഫ് സലിം, അൽഫോൺസ് പുത്രൻ എന്നിവരും അഭിനയിക്കുന്നു. സാധാരണ ജീവിതം നയിക്കുന്ന ഒരു പിസ ഡെലിവറി ജീവനക്കാരൻ നിഗൂഢമായ ശക്തികൾ നിറഞ്ഞ ഫാന്റസി ലോകത്തേക്ക് എത്തുന്നതും തുടർന്ന് നടക്കുന്ന സംഭവങ്ങളുമാണ് ചിത്രത്തിന്റെ പ്രമേയം. മലയാളത്തിനൊപ്പം മറ്റ് ഇന്ത്യൻ ഭാഷകളിലും ചിത്രം എത്തും.
ഇങ്ങനെ ആക്ഷൻ, ഫാന്റസി, ക്രൈം ത്രില്ലർ, പുരാണകഥ തുടങ്ങി വ്യത്യസ്ത വിഭാഗങ്ങളിലുള്ള സിനിമകളാണ് നവംബറിൽ പ്രേക്ഷകരെ കാത്തിരിക്കുന്നത്. വമ്പൻ താരങ്ങളുടെ ചിത്രങ്ങളും പുതിയ പരീക്ഷണങ്ങളുമായി എത്തുന്ന സിനിമകളും ഒരുമിക്കുന്നതിനാൽ ഈ മാസം തിയേറ്ററുകളിൽ വലിയ പ്രതീക്ഷയോടെയാണ് പ്രേക്ഷകർ കാത്തിരിക്കുന്നത്.
Content Highlight: From ‘Ramayana’ to the Mammootty–Dhanush film: 10 major releases to look forward to in November