2026 ഫിഫ ലോകകപ്പിനുള്ള സ്ക്വാഡ് പ്രഖ്യാപിച്ചിരിക്കുകയാണ് ഹെയ്തി. പരിശീലകന് സെബാസ്റ്റ്യന് മീനിന്റെ കീഴിലാണ് ഹെയ്തി ലോകകപ്പ് കളിക്കാനിറങ്ങുന്നത്. ഹെയ്തി ടീമില് ഇടം നേടിയ ഒരു താരം ഇന്നും മലയാളി ഫുട്ബോള് പ്രേമികള്ക്ക് ഏറെ സുപരിചതമാണ്. മുന് കേരള ബ്ലാസ്റ്റേഴ്സ് താരമായ ഡക്കന്സ് നാസോണ് ആണ് ഹെയ്തി നിരയില് ഇടം നേടിയിട്ടുള്ളത്.
ഐ.എസ്.എല്ലില് 2016-17 സീസണിലായിരുന്നു ഡക്കന്സ് നാസോണ് കേരളത്തിനായി പന്തുതട്ടിയത്. കളിക്കളത്തിലെ വേഗത കൊണ്ടും മുന്നേറ്റ നിരയിലെ മികച്ച ആക്രമണം കൊണ്ടും ഡക്കന്സ് നാസോണ് ബ്ലാസ്റ്റേഴ്സ് ആരാധകരുടെ പ്രിയപ്പെട്ട താരമായി മാറുകയും ചെയ്തിരുന്നു. ഇപ്പോള് താരം ലോക ഫുട്ബോളിന്റെ വിശ്വവേദിയില് പന്തുതട്ടാനൊരുങ്ങുമ്പോള് കേരളത്തിലെ ഫുട്ബോള് ആരാധകരും ആവേശത്തിലാണ്.
ഹെയ്തിയുടെ അറ്റാക്കിങ്ങില് ഒഴിച്ചുകൂടാനാവാത്ത ഘടകമാണ് നാസോണ്. ഹെയ്തിക്ക് വേണ്ടി ഏറ്റവും കൂടുതല് ഗോളുകള് നേടിയ താരവും നാസോണ് ആണ്. 44 തവണയാണ് താരം എതിരാളികളുടെ വലയില് പന്തെത്തിച്ചത്. ലോകകപ്പ് യോഗ്യത മത്സരങ്ങളിലും ഹെയ്തിക്കായി മിന്നും പ്രകടനമായിരുന്നു നാസോണ് നടത്തിയിരുന്നത്. ആറ് ഗോളുകള് അടിച്ചുകൂട്ടിയാണ് താരം ഹെയ്തിയെ ലോകകപ്പില് എത്തിച്ചത്.
ലോകകപ്പില് ഗ്രൂപ്പ് സിയിലാണ് ഹെയ്തി ഇടം നേടിയിട്ടുള്ളത്. ഹെയ്തിക്കൊപ്പം അഞ്ച്
തവണ ലോക ചാമ്പ്യന്മാരായ ബ്രസീലും ഗ്രൂപ്പ് സിയിലുണ്ട്. മൊറോക്കോയും സ്കോട്ലന്ഡുമാണ് ഗ്രൂപ്പിലെ മറ്റ് ടീമുകള്.
2022 ലോകകപ്പില് സെമി ഫൈനല് വരെ മുന്നേറിയ ടീമാണ് ആഫ്രിക്കന് കരുത്തരായ മൊറോക്കോ. സ്കോട്ലാന്ഡും അട്ടിമറികള് നടത്തി പേരുകേട്ടവരാണ്. ഈ വമ്പന് ടീമുകള്ക്കൊപ്പം മത്സരിച്ചുകൊണ്ട് അടുത്ത റൗണ്ടിലേക്ക് മുന്നേറണമെങ്കില് ഹെയ്തി മികച്ച പോരാട്ടവീര്യം തന്നെ കാഴ്ചവെക്കേണ്ടി വരും.
നീണ്ട 52 വര്ഷങ്ങള്ക്ക് ശേഷമാണ് ഹെയ്തി ലോകകപ്പ് കളിക്കാനെത്തുന്നത്. 1974ലായിരുന്നു ഹെയ്തി അവസാനമായി ലോകകപ്പ് കളിച്ചിരുന്നത്. ഫ്രഞ്ച് പരിശീലകന് സെബാസ്റ്റ്യന് മീനിയുടെ കീഴില് ലോകകപ്പിനെത്തുന്ന ഹെയ്തി അത്ഭുതങ്ങള് സൃഷ്ടിക്കുമോയെന്ന് കണ്ടുതന്നെ അറിയണം.
2026 ഫിഫ ലോകകപ്പിനുള്ള ഹെയ്തി സ്ക്വാഡ്
ഗോള്കീപ്പര്മാര്: ജോണി പ്ലാസൈഡ്, അലക്സാണ്ടര് പിയറി, ജോസു ഡുവര്ഗര്.
ഡിഫന്ഡര്മാര്: കാര്ലെന്സ് ആര്ക്കസ്, വില്ഗ്വെന്സ് പൗഗെയ്ന്, റിക്കാര്ഡോ ആഡെ, റിക്കാര്ഡോ ആഡെ, ജീന് കെവിന് ഡുവെര്നെ, ഹാനസ് ഡെല്ക്രോയിക്സ്, കീറ്റോ തെര്മോണ്സി, മാര്ട്ടിന് എക്സ്പീരിയന്സ്, ഡ്യൂക്ക് ലാക്രോയിക്സ്.
മിഡ്ഫീല്ഡര്മാര്: ജോസു കാസിമിര്, ലെവര്ട്ടണ് പിയറി, ഡോണി സൈമണ്, വുഡന്സ്കി പിയറി, കാള് ഫ്രെഡ് സെയ്ന്റേ, ഡാന്ലി ജീന് ജാക്വസ്, ജീന് റിക്നര് ബെല്ലെഗാര്ഡ്.
ഫൊര്വേഡ്സ്: ഡക്കന്സ് നാസണ്, ഫ്രാന്റ്സ്ഡി പിയറോട്ട്, ഡീഡ്സണ് ലൂയിസിയസ്, റൂബന് പ്രൊവിഡന്സ്, യാസിന് ഫോര്ച്യൂണ്, വില്സണ് ഇസിഡോര്, ലെന്നി ജോസഫ്, ഡെറിക് എറ്റിയെന് ജൂനിയര്.
Content Highlight: Former Kerala Blasters player Duckens Nazon set to play 2026 fifa world cup for Haiti