ക്രിസ്റ്റ്യാനോ റൊണാൾഡോയും ലയണൽ മെസിയും. ലോക ഫുട്ബോളിലെ അടക്കി വാഴുന്ന രണ്ട് ഇതിഹാസങ്ങൾ. തലമുറ മാറ്റമുണ്ടായിട്ടും ഇരുവരും തന്നെയാണ് ആരാധകരുടെ പ്രിയപ്പെട്ടവര്. മെസിയും റോണോയും യൂറോപ്യന് ലീഗുകളില് നിന്ന് പുതിയ തട്ടകങ്ങളിലേക്ക് ചേക്കേറിയിട്ടും യുവതാരങ്ങള് സ്പോട്ട്ലൈറ്റിലേക്കെത്തിയിട്ടും ഇന്നും ഫുട്ബോളില് കൂടുതല് ചര്ച്ച ചെയ്യപ്പെടുന്നത് ഇവരെ കുറിച്ചാണ്.
മെസിയെയും റൊണാള്ഡോയെയും കുറിച്ച് ആരാധകര് പരാമര്ശിക്കാത്ത ദിവസങ്ങള് കടന്നുപോകുന്നത് വളരെ വിരളമാണ്. ഇവരില് മികച്ച താരമാര് എന്ന ചോദ്യം ഇപ്പോഴും ഫുട്ബോള് ലോകത്തെ ഇരു ചേരിയില് നിര്ത്താന് കെല്പ്പുള്ളതാണ്.
മെസിയാണ് മികച്ചതെന്ന് ഒരു കൂട്ടര് വാദിക്കുമ്പോള് മറുവശത്ത് റൊണാള്ഡോയാണ് മികച്ചതെന്ന് മറ്റൊരു കൂട്ടരും പറയുന്നു. ഇരുവരും ഇതിഹാസങ്ങള് തന്നെയെന്ന് ഒരുപോലെ അംഗീകരിക്കുന്നവരും കുറവല്ല.
ഇപ്പോൾ മെസിയെ കുറിച്ച് സംസാരിക്കുകയാണ് പോർച്ചുഗൽ ഇതിഹാസം ക്രിസ്റ്റ്യാനോ റൊണാൾഡോ. തനിക്ക് മെസിയോട് പ്രത്യേക ഇഷ്ടമുണ്ടെന്നും 15 വർഷത്തോളം തങ്ങൾ ഈ വേദിയിൽ ഒരുമിച്ചിട്ടുണ്ടെന്നും അദ്ദേഹം പറഞ്ഞു. മെസി എപ്പോഴും തന്നോട് നന്നായി പെരുമാറുകയും ബഹുമാനിക്കുകയും ചെയ്തിരുന്നുവെന്നും റോണോ കൂട്ടിച്ചേർത്തു.
‘തീർച്ചയായും എനിക്ക് മെസിയോട് പ്രത്യേക ഇഷ്ടമുണ്ട്.15 വർഷത്തോളം ഞങ്ങൾ ഈ വേദിയിൽ ഒരുമിച്ചിട്ടുണ്ട്. ഗാലകളിൽ അദ്ദേഹത്തിന് ഇംഗ്ലീഷ് പരിഭാഷപ്പെടുത്തി കൊടുത്തിരുന്നിരുന്നത് എനിക്ക് ഓർമയുണ്ട്. അദ്ദേഹം എപ്പോഴും എന്നോട് നന്നായി പെരുമാറുകയും എന്നെ ബഹുമാനിക്കുകയും ചെയ്തിരുന്നു,’ റൊണാൾഡോ പറഞ്ഞു.
നിലവിൽ മെസി എം.എൽ.എസ് ക്ലബായ ഇന്റർ മയാമി താരമാണ്. ടീമിനായി താരം ഇതുവരെ 59 മത്സരങ്ങളിൽ 49 ഗോളുകൾ നേടിയിട്ടുണ്ട്. കൂടാതെ, 23 അസിസ്റ്റുകളും സ്വന്തം പേരിൽ കുറിച്ചു.
അതേസമയം, സൗദി പ്രൊ ലീഗിലെ അൽ നസറിലാണ് റൊണാൾഡോ കളിക്കുന്നത്. ക്ലബ്ബിനായി താരം ഇതുവരെ 111 മത്സരങ്ങളിൽ നിന്ന് 99 ഗോളുകളും 19 അസിസ്റ്റുകളും സ്വന്തമാക്കിയിട്ടുണ്ട്.
യുവേഫ നേഷൻസ് ലീഗ് ഫൈനലിൽ സ്പെയ്നിനെതിരെ റൊണാൾഡോ പോർച്ചുഗൽ ടീമിനായി ഇന്ന് കളത്തിലിറങ്ങും. മെസിയുടെ അടുത്ത മത്സരം അർജന്റീന ടീമിനൊപ്പം കൊളംബിയക്കെതിരായ ലോകകപ്പ് യോഗ്യത മത്സരമാണ്.
Content Highlight: Football: Cristiano Ronaldo talks about Lionel Messi