പാലക്കാട്: അരിയൂര് സഹകരണ ബാങ്കില് വ്യാജ സര്ട്ടിഫിക്കറ്റ് ഉപയോഗിച്ച് സ്ഥാനക്കയറ്റത്തിന് ശ്രമിച്ച യൂത്ത് ലീഗ് നേതാക്കള്ക്കെതിരെ നടപടി. യൂത്ത് ലീഗ് നേതാക്കള്ക്കെതിരെ നാട്ടുകല് പൊലീസ് കേസെടുത്തു.
അരിയൂര് ബാങ്ക് ലാസ്റ്റ് ഗ്രേഡ് ജീവനക്കാരായിരിക്കവേ ക്ലാര്ക്കായി നിയമനം ലഭിക്കാന് വ്യാജ സര്ട്ടിഫിക്കറ്റ് ഹാജരാക്കിയെന്ന പരാതിയിലാണ് നടപടി.
യൂത്ത് ലീഗ് സംസ്ഥാന സെക്രട്ടറി ഗഫൂര് കോല്ക്കളത്തില്, മുസ്ലിം ലീഗ് നിയോജകമണ്ഡലം സെക്രട്ടറി അബ്ദുള് റഷീദ് എന്നിവര്ക്കെതിരെയാണ് പൊലീസ് കേസെടുത്തത്.
വ്യാജ നിയമനം തരപ്പെടുത്തി എന്നതടക്കമുള്ള വകുപ്പുകള് പ്രകാരമാണ് കേസെടുത്തിരിക്കുന്നത്. എന്നാല് തട്ടിപ്പിന് ശ്രമിച്ചിട്ടില്ലെന്നാണ് യൂത്ത് ലീഗ് നേതാക്കളുടെ വാദം.
സര്ട്ടിഫിക്കറ്റിന്റെ ആധികാരികത ഉറപ്പുവരുത്തുന്നത് വരെ സ്ഥാനക്കയറ്റത്തിന് പരിഗണിക്കരുതെന്ന് കാണിച്ച് ബാങ്കിന് കത്ത് നല്കിയിരുന്നുവെന്ന് ഗഫൂര് പറഞ്ഞതായി മാധ്യമങ്ങള് റിപ്പോര്ട്ട് ചെയ്യുന്നു. ഗഫൂര് തെങ്കര ഡിവിഷനില് നിന്നുള്ള പാലക്കാട് ജില്ലാ പഞ്ചായത്ത് അംഗം കൂടിയാണ്.
അതേസമയം സഹകരണ വകുപ്പ് അസിസ്റ്റന്റ് രജിസ്ട്രാര് നടത്തിയ പരിശോധനയിലാണ് വ്യാജ സര്ട്ടിഫിക്കറ്റ് ഉപയോഗിച്ച് ജോലി തരപ്പെടുത്തിയതായി കണ്ടെത്തിയത്. പിന്നീട് അസിസ്റ്റന്റ് രജിസ്ട്രാര് ലീഗ് നേതാക്കള്ക്കെതിരെ പരാതി നല്കുകയായിരുന്നു.
ഇതിനിടെ ബെംഗളൂരുവില് നിന്നും നേടിയ ബിരുദ സര്ട്ടിഫിക്കറ്റില് സംശയം തോന്നിയപ്പോള് തന്നെ ബാങ്കിനെ വിവരം ധരിച്ചിപ്പിച്ചുവെന്ന വാദവും യൂത്ത് ലീഗ് നേതാക്കള് ഉയര്ത്തുന്നുണ്ട്. എന്നാല് ബീഹാറിലെ മഗധ യൂണിവേഴ്സിറ്റിയുടെ ബികോം കോര്പ്പറേഷന് സര്ട്ടിഫിക്കറ്റാണ് ഇവര് ഹാജരാക്കിയതെന്നും റിപ്പോര്ട്ടുകളുണ്ട്.
Content Highlight: Youth League leaders booked for trying to get promotion using fake certificates