ഗസ: ഗസയില് വര്ദ്ധിച്ചുവരുന്ന പട്ടിണി ഉടന് അവസാനിപ്പിക്കണമെന്ന് ആവശ്യപ്പെട്ട് ഇരുപത്തിമൂന്ന് പ്രമുഖ യു.എസ്, യൂറോപ്യന് സാമ്പത്തിക വിദഗ്ധര് ഇസ്രായേല് പ്രധാനമന്ത്രി ബെഞ്ചമിന് നെത്യാഹുവിന് കത്തയച്ചു. ഗസ സൈനികമായി കൈവശപ്പെടുത്താനുള്ള ഇസ്രായേലിന്റെ പദ്ധതികള് പിന്വലിക്കണമെന്നും നിയന്ത്രണങ്ങളില്ലാതെ ജനങ്ങള്ക്ക് ഭക്ഷ്യസഹായം അനുവദിക്കണമെന്നും കത്തില് പറയുന്നു. കത്തയച്ച 23 സാമ്പത്തിക വിദഗ്ധരില് പത്ത് പേരും നൊബേല് സമ്മാന ജേതാക്കളാണ്.
നൊബേല് സമ്മാന ജേതാവും എം.ഐ.ടി സാമ്പത്തിക ശാസ്ത്രജ്ഞനും വൈ നേഷന്സ് ഫെയില് എന്ന പുസ്തകത്തിന്റെ സഹരചയിതാവുമായ ഡാരണ് അസെമോഗ്ലു ആണ് വെള്ളിയാഴ്ച എക്സില് കത്ത് പങ്കിട്ടത്. ഗസയില് പടരുന്ന പട്ടിണിയെക്കുറിച്ചും സാധാരണക്കാരെ നിര്ബന്ധിതമായി മാറ്റിപ്പാര്പ്പിക്കാനുള്ള പദ്ധതികളെ കുറിച്ചും തങ്ങള് ആശങ്കയിലാണെന്ന് കത്തില് പറയുന്നു.
മനുഷ്യരെന്ന നിലയിലും സാമ്പത്തിക വിദഗ്ധര് എന്ന നിലയിലും, വ്യാപകമായ പട്ടിണി വര്ദ്ധിപ്പിക്കുന്ന ഏതൊരു നയവും ഉടനടി നിര്ത്തലാക്കണമെന്ന് ഇവര് ആവശ്യപ്പെട്ടു. ഗസയിലെ 2.1 ദശലക്ഷം നിവാസികളില് മൂന്നിലൊന്ന് പേരും ഭക്ഷണമില്ലാതെ നിരവധി ദിവസങ്ങള് കഴിഞ്ഞുവെന്ന് കാണിക്കുന്ന ഐക്യരാഷ്ട്രസഭയുടെ ലോക ഭക്ഷ്യ പദ്ധതിയുടെ ഡാറ്റ ഇവര് ചൂണ്ടികാണിക്കുന്നു. മൂന്ന് മാസം മുമ്പുള്ള വിലയുമായി താരതമ്യപ്പെടുത്തുമ്പോള് ഇപ്പോള് ആ പ്രദേശത്തെ വിപണി വിലകള് പത്തിരട്ടി കൂടുതലാണ്.
മനുഷ്യാവകാശങ്ങളോടും അന്താരാഷ്ട്ര നിയമങ്ങളോടും ഇസ്രായേലിന്റെ പ്രതിബദ്ധത ഉറപ്പിക്കുന്ന ഒരു ഔപചാരിക പ്രഖ്യാപനം ഉടന് പുറപ്പെടുവിക്കാനും വെടിനിര്ത്തല് കരാര് പിന്തുടരാനും ഇസ്രായേലിനോട് കത്തില് ആവശ്യപ്പെടുന്നു.
അസെമോഗ്ലുവിനൊപ്പം, കത്തില് ഒപ്പിട്ട 23 പേരില് ആംഗസ് ഡീറ്റണ്, പീറ്റര് എ. ഡയമണ്ട്, എസ്തര് ഡഫ്ലോ, ക്ലോഡിയ ഗോള്ഡിന്, എറിക് എസ് മാസ്കിന്, റോജര് ബി. മയേഴ്സണ്, എഡ്മണ്ട് എസ്.ഫെല്പ്സ്, ക്രിസ്റ്റഫര് എ.പിസാറൈഡ്സ്, ജോസഫ് ഇസ്റ്റിഗ്ലിറ്റ്സ് എന്നിവരും ഉള്പ്പെടുന്നു.
Content Highlight: economists write to Netanyahu, calling for an end to the occupation and starvation in Gaza