ദുബായ്: ആരോഗ്യ പ്രവർത്തകർക്ക് പത്തുവർഷത്തെ ഗോൾഡൻ വിസ അനുവദിച്ച് ദുബായ്. കൊവിഡ് പ്രതിരോധത്തിൽ മുന്നിൽ നിന്ന് പ്രവർത്തിച്ചതിനാണ് ദുബായ് ആരോഗ്യ പ്രവർത്തകർക്കുള്ള ആദരമായി പത്ത് വർഷത്തെ ഗോൾഡൻ വിസ നൽകുന്നത്. ദുബായ് ആരോഗ്യ വകുപ്പിന് കീഴിൽ ജോലി ചെയ്യുന്ന ആരോഗ്യ പ്രവർത്തകർക്കാണ് ഈ ആനുകൂല്യം ലഭിക്കുക.
കൊവിഡ് 19 പശ്ചാത്തലത്തിൽ യു.എ.ഇ.യിൽ വൈദ്യ സഹായം നൽകുന്നതിന് രാജ്യത്ത് നിന്ന് 88 അംഗ മെഡിക്കൽ സംഘം ദുബായിലേക്ക് പോയിരുന്നു. കേരളം, മഹാരാഷ്ട്ര, കർണാടക എന്നിവിടങ്ങളിലെ ആസ്റ്റർ ഡി.എം. ഹെൽത്ത് കെയറിൽ നിന്നുള്ള നഴ്സുമാരാണ് ദുബായിലേക്ക് പോയത്.
വൈദ്യ സഹായം നൽകാനായി ആരോഗ്യ പ്രവർത്തകരെ അയക്കാൻ യു.എ.ഇ നേരത്തെ ഇന്ത്യയോട് അഭ്യർത്ഥിച്ചിരുന്നു. കൂടാതെ ഇന്ത്യയിൽ നിലവിലുള്ള യു.എ.ഇയിൽ ജോലി ചെയ്യുന്ന നഴ്സുമാരെ തിരിച്ചയക്കാനും യു.എ.ഇ അഭ്യർത്ഥന നടത്തിയിരുന്നു.