തൊണ്ണൂറുകളിൽ മലയാളി പ്രേക്ഷകരുടെ പ്രിയപ്പെട്ട നായികയായിരുന്നു ദിവ്യ ഉണ്ണി. ഒരു മികച്ച നർത്തകി കൂടിയായ ദിവ്യ മലയാളം, തമിഴ്, ഹിന്ദി, തെലുങ്ക് എന്നീ ഭാഷകളിലായി ഏകദേശം 50 സിനിമകളിൽ അഭിനയിച്ചിട്ടുണ്ട്. പ്രണയവർണ്ണങ്ങൾ, ചുരം, ആകാശഗംഗ തുടങ്ങിയ നിരവധി സിനിമകളിലെ അഭിനയത്തിലൂടെയാണ് ദിവ്യ ശ്രദ്ധിക്കപ്പെടുന്നത്.
ചുരുങ്ങിയകാലം കൊണ്ട് മമ്മൂട്ടി, മോഹൻലാൽ തുടങ്ങിയവരുടെ നായികയായി അഭിനയിക്കാൻ ദിവ്യ ഉണ്ണിക്ക് ഭാഗ്യം ലഭിച്ചു. ഇപ്പോൾ അഭിനയത്തിൽ നിന്നൊക്കെ മാറി അമേരിക്കയിൽ കുടുംബസമേതം താമസിക്കുകയാണ് ദിവ്യ ഉണ്ണി. സ്വന്തമായൊരു നൃത്തസ്ഥാപനം നടത്തുന്നുണ്ട് നടി. ഇപ്പോൾ തിരിച്ചുവരവിനെപ്പറ്റി സംസാരിക്കുകയാണ് ദിവ്യ ഉണ്ണി.
‘വർഷങ്ങൾക്കിപ്പുറം ഞാൻ ചെയ്ത കഥാപാത്രങ്ങൾക്ക് ലഭിക്കുന്ന സ്വീകാര്യത വളരെ വലുതാണ്. ഇനിയും അത്തരത്തിലുള്ള നല്ല കഥാപാത്രങ്ങൾ ചെയ്യണമെന്നുണ്ട്. ഞാൻ ബോധപൂർവം അതിൽ നിന്ന് മാറിനിൽക്കുന്നതല്ല.
ഓർമിക്കപ്പെടുന്ന കഥാപാത്രത്തിലൂടെയാവണം തിരിച്ചുവരവ് എന്ന് ആഗ്രഹമുണ്ട്. സ്ക്രിപ്റ്റ് കേൾക്കാറുണ്ട്,’ ദിവ്യ ഉണ്ണി പറയുന്നു.
മനസിൽ തട്ടുന്ന കഥാപാത്രങ്ങൾ കിട്ടിയാൽ ഉറപ്പായും താൻ ചെയ്യുമെന്നും നൃത്തം ആധാരമാക്കിയുള്ള സിനിമകൾ ചെയ്യാനാണ് കൂടുതൽ താത്പര്യമെന്നും അവർ കൂട്ടിച്ചേർത്തു.
തന്റെ എല്ലാ കാര്യങ്ങൾക്കും മാതാപിതാക്കൾ കൂടെയുണ്ടെന്നും അതാണ് തന്റെ ഏറ്റവും വലിയ കരുത്ത് എന്നും ദിവ്യ ഉണ്ണി പറയുന്നു. അതുകൊണ്ടാണ്, നിർണായക തീരുമാനങ്ങൾ എടുക്കാനും മുന്നോട്ടുപോകാനും സാധിച്ചതെന്നും നടി കൂട്ടിച്ചേർത്തു.
തനിക്ക് മണിചിത്രത്താഴ് പോലുള്ള സിനിമകൾ ചെയ്യണമെന്ന് ആഗ്രഹമുണ്ടെന്നും അത്തരം സിനിമകൾ ഇന്നും ഹൃദയത്തിൽ തങ്ങി നിൽക്കുന്ന ചിത്രങ്ങളാണെന്നും പറഞ്ഞിരുന്നു.
തനിക്ക് സിനിമയിൽ ഇത്രയും ഗ്യാപ്പ് വന്നത് കുടുംബത്തിന്റെയും കുട്ടികളുടെയും ഡാൻസ് സ്കൂളിന്റെയും ഉത്തരവാദിത്തങ്ങൾ ഉള്ളതുകൊണ്ടാണെന്നും ദിവ്യ പറഞ്ഞിരുന്നു.
Content Highlight: Divya Unni talking about coming back to Cinema