ഇന്ത്യയെപ്പോലൊരു എതിരാളിയെ നേരിടാന്‍ മറ്റ് ടീമുകള്‍ ഭയപ്പെടുന്ന അവസ്ഥയാണ്; പ്രശംസയുമായി ദിനേശ് കാര്‍ത്തിക്

ന്യൂസിലാന്‍ഡിനെതിരായ മൂന്നാം ടി-20 മത്സരത്തില്‍ വിജയം സ്വന്തമാക്കിയതിന് പിന്നാലെ ഇന്ത്യന്‍ ടീം ഓപ്പണര്‍മാര്‍ വൈഭവ് സൂര്യവംശിയെയും അഭിഷേക് ശര്‍മയെയും പ്രശംസിച്ച് മുന്‍ താരം ദിനേശ് കാര്‍ത്തിക്. ഓരോ പന്തിലും ആക്രമണോത്സുകമായ ഷോട്ടുകളാണ് ഇന്ത്യന്‍ താരങ്ങള്‍ കളിച്ചതെന്നും ആദ്യ ഓവറില്‍ തന്നെ അവര്‍ 25 റണ്‍സ് അടിച്ചെടുക്കുകയും നിരവധി റെക്കോഡുകള്‍ തകര്‍ക്കുകയും ചെയ്‌തെന്ന് അദ്ദേഹം ചൂണ്ടിക്കാട്ടി.

റോജര്‍ ഫെഡററുടെയും മൈക്ക് ടൈസണിന്റെയും കരിയറിലെ ഏറ്റവും മികച്ച കാലത്തെ പ്രകടനത്തോടാണ് ഇന്ത്യന്‍ ടീമിന്റെ ആധിപത്യത്തെ കാര്‍ത്തിക് താരതമ്യം ചെയ്തത്.

‘ഈ ഇന്ത്യന്‍ ടീമിന്റെ പ്രകടനത്തെ അഭിനന്ദിക്കുകയല്ലാതെ മറ്റൊന്നും ചെയ്യാനില്ല. ആധിപത്യത്തിന്റെ ഏറ്റവും മികച്ച ഉദാഹരണമാണിത്. തങ്ങളുടെ കരിയറിലെ ഏറ്റവും മികച്ച ഫോമിലുള്ള റോജര്‍ ഫെഡററെയും മൈക്ക് ടൈസണെയും പോലെയാണ് ഇന്ത്യയുടെ പ്രകടനം. ഇന്ത്യയെപ്പോലൊരു എതിരാളിയെ നേരിടാന്‍ മറ്റ് ടീമുകള്‍ ഭയപ്പെടുന്ന അവസ്ഥയാണ്.

ഓരോ പന്തിലും ആക്രമണോത്സുകമായ ഷോട്ടുകളാണ് ഇന്ത്യന്‍ താരങ്ങള്‍ കളിച്ചത്. ആദ്യ പന്ത് മുതല്‍ തന്നെ അഭിഷേക് ശര്‍മയും വൈഭവ് സൂര്യവംശിയും സംഹാരതാണ്ഡവമാടി. ആദ്യ ഓവറില്‍ തന്നെ അവര്‍ 25 റണ്‍സ് അടിച്ചെടുത്തു. ഇന്ന് ഇന്ത്യ നിരവധി റെക്കോര്‍ഡുകളാണ് തകര്‍ത്തത്.

ന്യൂസിലന്‍ഡിനെപ്പോലൊരു ടീമിനെതിരെ ഒരു ഓവറില്‍ 25 റണ്‍സ് നേടുകയെന്നത് അത്ര എളുപ്പമുള്ള കാര്യമല്ല. ഈ ഇന്ത്യന്‍ ടീം ഇപ്പോള്‍ എതിരാളികളില്‍ ഭയമുണ്ടാക്കുന്ന രീതിയിലാണ് കളിക്കുന്നത്. ലോക ക്രിക്കറ്റില്‍ ഇപ്പോള്‍ ഇന്ത്യയുടെ ആധിപത്യമാണ്,’ മത്സര ശേഷം ക്രിക്ബസില്‍ നടന്ന ചര്‍ച്ചയില്‍ അദ്ദേഹം പറഞ്ഞു.

ന്യൂസിലാന്‍ഡിനെതിരായ അഞ്ച് മത്സരങ്ങള്‍ അടങ്ങുന്ന ടി-20 പരമ്പരയില്‍ മൂന്നാം മത്സരത്തില്‍ തകര്‍പ്പന്‍ വിജയം സ്വന്തമാക്കിയിരിക്കുകയാണ് ഇന്ത്യ. വെല്ലിങ്ടണ്‍ റീജിയണല്‍ സ്റ്റേഡിയത്തില്‍ നടന്ന മത്സരത്തില്‍ ആറ് വിക്കറ്റിനാണ് ഇന്ത്യ വിജയം സ്വന്തമാക്കിയത്. കിവീസ് ഉയര്‍ത്തിയ 198 റണ്‍സിന്റെ വിജയലക്ഷ്യം 13.2 ഓവറില്‍ മറികടക്കുകയായിരുന്നു ഇന്ത്യ. ഇതോടെ 3-0ന് പരമ്പര വിജയിക്കാനും ഇന്ത്യയ്ക്ക് സാധിച്ചിരിക്കുകയാണ്.

മത്സരത്തില്‍ സഞ്ജു സാംസണിന് പകരമായി ഓപ്പണിങ് പൊസിഷനില്‍ എത്തിയ യുവ താരം വൈഭവ് സൂര്യവംശിയും അഭിഷേക് ശര്‍മയും വെടിക്കെട്ട് തുടക്കമാണ് ഇന്ത്യയ്ക്ക് നല്‍കിയത്. വെടിക്കെട്ട് തുടക്കത്തില്‍ അഞ്ച് ചരിത്ര നേട്ടങ്ങളാണ് ഇന്ത്യയ്ക്ക് വേണ്ടി അഭിഷേകും വൈഭവും സ്വന്തമാക്കിയത്.

അന്താരാഷ്ട്ര പുരുഷ ടി-20 ക്രിക്കറ്റ് ചരിത്രത്തിലെ ഏറ്റവും ഉയര്‍ന്ന പവര്‍പ്ലേ സ്‌കോറാണ് ഇന്ത്യയ്ക്ക് വേണ്ടി വൈഭവും അഭിഷേക് ശര്‍മയും അടിച്ചെടുത്തത്. പവര്‍ പ്ലേയില്‍ വിക്കറ്റ് നഷ്ടപ്പെടുത്താതെ 118 റണ്‍സാണ് ഇന്ത്യ നേടിയത്.

രണ്ടാമത്തെ റെക്കോഡ് അന്താരാഷ്ട്ര പുരുഷ ടി-20 ചരിത്രത്തില്‍ ഏറ്റവും വേഗത്തില്‍ 50 റണ്‍സ് നേടുന്ന ടീം എന്ന റെക്കോഡും ഇന്ത്യ തൂക്കിയിരുന്നു. 2.2 ഓവറിലായിരുന്നു ഇന്ത്യയ്ക്ക് വേണ്ടി അഭിഷേകും വൈഭവും 50 റണ്‍സിലെത്തിയത്.

മാത്രമല്ല ഫോര്‍മാറ്റില്‍ ഏറ്റവും വേഗത്തില്‍ 100 റണ്‍സിന്റെ ഓപ്പണിങ് പാര്‍ട്ണര്‍ഷിപ്പ് നേടുന്ന താരങ്ങളാകാനും അഭിഷേക്-വൈഭവ് സഖ്യത്തിന് സാധിച്ചു. 31 പന്തില്‍ 133 റണ്‍സിന്റെ കൂട്ടുകെട്ടുമായാണ് ഇരുവരും കളത്തില്‍ തകര്‍ത്താടിയത്.

ഇതിന് പുറമെ അന്താരാഷ്ട്ര ടി-20യല്‍ 100 + സ്‌കോര്‍ ഓപ്പണിങ് കൂട്ടുകെട്ടില്‍ ഏറ്റവും ഉയര്‍ന്ന റണ്‍റേറ്റ് എന്ന നേട്ടവും ഇന്ത്യ സ്വന്തം പേരിലാക്കി. 18.13 എന്ന റണ്‍ റേറ്റിലാണ് ഇന്ത്യ നേട്ടം സ്വന്തമാക്കിയത്.

അഞ്ചാമത്തെ റെക്കോഡ് ഫോര്‍മാറ്റില്‍ ഫുള്‍ മെമ്പര്‍ ടീമുകളില്‍ ഏറ്റവും വേഗത്തില്‍ 100 റണ്‍സ് നേടുന്ന ടീം എന്ന നേട്ടമാണ്. അഞ്ച് ഓവറിലാണ് ഇന്ത്യ ഈ നേട്ടത്തിലെത്തിയത്.

അഭിഷേക് ശര്‍മയുടെ വെടിക്കെട്ട് ബാറ്റിങ്ങിലാണ് ഇന്ത്യ അതിവേഗം വിജയം സ്വന്തമാക്കിയത്. സെഞ്ച്വറി നേടിയാണ് താരം കരുത്തുകാട്ടിയത്. 38 പന്തില്‍ 11 സിക്സും ഒമ്പത് ഫോറും ഉള്‍പ്പെടെ 113 റണ്‍സ് നേടിയാണ് അഭിഷേക് മടങ്ങിയത്. നേരിട്ട 35ാം പന്തില്‍ ഫോര്‍ നേടി 103 റണ്‍സ് പൂര്‍ത്തിയാക്കിയാണ് അഭിഷേക് തന്റെ നാലാം ടി-20 സെഞ്ച്വറി പൂര്‍ത്തിയാക്കിയത്. മത്സരത്തിലെ താരമാകാനും അഭിഷേകിന് സാധിച്ചു.

വൈഭവിനെയാണ് ഇന്ത്യയ്ക്ക് ആദ്യം നഷ്ടപ്പെട്ടത്. 19 പന്തില്‍ നിന്ന് നാല് സിക്സും നാല് ഫോറും ഉള്‍പ്പെടെ 45 റണ്‍സ് നേടിയാണ് വൈഭവ് മടങ്ങിയത്. 236.84 എന്ന തകര്‍പ്പന്‍ സ്‌ട്രൈക്ക് റേറ്റിലാണ് താരം ബാറ്റ് വീശിയത്. വണ്‍ ഡൗണില്‍ ഇറങ്ങിയ സഞ്ജു 13 പന്തില്‍ 18 റണ്‍സ് നേടിയാണ് മടങ്ങിയത്. രണ്ട് ഫോറാണ് താരം നേടിയത്.

Content Highlight: Dinesh Karthik Praises Indian Openers Vaibhav Sooryavanshi And Sanju Samson