മോദിക്ക് നല്ല നിരാശയുണ്ട്; സഞ്ചിയുമെടുത്ത് മടങ്ങാന്‍ സമയമായി: ദിമാഗി നക്‌സല്‍ പരാമര്‍ശത്തെക്കുറിച്ച് കോണ്‍ഗ്രസ്

ന്യൂദല്‍ഹി: പ്രധാനമന്ത്രി നരേന്ദ്ര മോദി തന്റെ രാഷ്ട്രീയ എതിരാളികളെ ‘ദിമാഗി നക്‌സലുകള്‍’ എന്ന് വിശേഷിപ്പിച്ചതിനെതിരെ തിരിച്ചടിച്ച് കോണ്‍ഗ്രസ്. പ്രധാനമന്ത്രി കടുത്ത മാനസിക അസ്വസ്ഥതയിലാണെന്നും, അസ്വസ്ഥനും നിരാശനുമാണെന്നും, അദ്ദേഹത്തിന്റെ സഞ്ചി എടുത്ത് മടങ്ങാനുള്ള സമയം അടുത്തെത്തിയെന്നും കോണ്‍ഗ്രസ് നേതാവ് ജയറാം രമേശ് എക്‌സ് പോസ്റ്റില്‍ പറഞ്ഞു.

ആയുധമേന്തിയ മാവോയിസ്റ്റുകളെ ഇല്ലാതാക്കിയെങ്കിലും, ‘ദിമാഗി നക്‌സലുകള്‍’ പല രാഷ്ട്രീയ പാര്‍ട്ടികളിലും സംഘടനകളിലും നുഴഞ്ഞുകയറിയിട്ടുണ്ടെന്നും, അവര്‍ ഭരണഘടനയ്ക്കും ജനാധിപത്യത്തിനുമെതിരെ ജനങ്ങളെ ഇളക്കിവിടുകയാണെന്നും മോദി ആരോപിച്ചിരുന്നു. ഇതിന് മറുപടിയായാണ് കോണ്‍ഗ്രസിന്റെ പ്രതികരണം.

ഛത്തീസ്ഗഡിലെ ബസ്തറിലുള്ള സി.ആര്‍.പി.എഫ് (സി.ആര്‍.പി.എഫ്) ക്യാമ്പില്‍ സുരക്ഷാ ഉദ്യോഗസ്ഥര്‍ക്കൊപ്പം ദീപാവലി ആഘോഷിക്കുന്നതിനിടെയായിരുന്നു മോദിയുടെ പരാമര്‍ശം. സൈനിക യൂണിഫോം ധരിച്ചാണ് മോദി ഈ പരാമര്‍ശം നടത്തിയത്.

ദീപാവലി ദിനത്തില്‍ പോലും തന്റെ സ്ഥിരം ശൈലിയിലുള്ള അധിക്ഷേപങ്ങള്‍ നടത്താന്‍ പ്രധാനമന്ത്രി മടിച്ചില്ലെന്ന് ജയറാം രമേശ് പറഞ്ഞു. ദിമാഗി നക്‌സലുകള്‍’ എന്ന് അദ്ദേഹം വിശേഷിപ്പിക്കുന്നവരെക്കുറിച്ച് അദ്ദേഹം വീണ്ടും സംസാരിച്ചിരിക്കുന്നു. രാഷ്ട്രീയേതരമായ ഒരു ഗൗരവമേറിയ ചടങ്ങില്‍, സുരക്ഷാ സേനയുടെ യൂണിഫോം ധരിച്ചുകൊണ്ട്, തന്റെ രാഷ്ട്രീയ എതിരാളികള്‍ക്കെതിരെ അദ്ദേഹം അധിക്ഷേപങ്ങള്‍ ചൊരിഞ്ഞുവെന്നും മോദിയെക്കുറിച്ച് ജയറാം രമേശ് പറഞ്ഞു.

ഇത് എല്ലാ സ്ഥാപനപരമായ മര്യാദകള്‍ക്കും നേരെയുള്ള ധിക്കാരപരമായ കടന്നുകയറ്റമാണ്. എന്നാല്‍ ഇത്തരം കാര്യങ്ങളൊന്നും ചെയ്യാന്‍ മോദിക്ക് മടിയില്ലെന്നും ജയറാം രമേശ് പറഞ്ഞു.

ജാതി സെന്‍സസ് വേണമെന്ന് ആവശ്യപ്പെടുന്നവര്‍ അര്‍ബന്‍ നക്‌സലുകള്‍ ആണെന്ന് 2024 ഏപ്രില്‍ 28-ന് പറഞ്ഞ അദ്ദേഹം, പിന്നീട് 2025 ഏപ്രില്‍ 30-ന്, 2027-ലെ സെന്‍സസിന്റെ ഭാഗമായി ജാതി സെന്‍സസ് നടത്തുമെന്ന് പ്രഖ്യാപിച്ചുവെന്ന് ജയറാം രമേശ് ചൂണ്ടിക്കാട്ടി.

നേരത്തെ, 2020 സെപ്റ്റംബറില്‍, വിവാദമായ മൂന്ന് കാര്‍ഷിക നിയമങ്ങള്‍ക്കെതിരെ സമരം ചെയ്തവരെ ‘നക്‌സല്‍ ആശയധാരയുടെ പിന്തുണക്കാര്‍’ എന്ന് മോദി വിളിച്ചിരുന്നു. എന്നാല്‍ പിന്നീട്, 2021 നവംബര്‍ 19-ന്, അതേ നിയമങ്ങള്‍ അദ്ദേഹം പിന്‍വലിക്കുകയും ചെയ്തുവെന്ന് കോണ്‍ഗ്രസ് നേതാവ് ഓര്‍മ്മിപ്പിച്ചു.

‘പ്രധാനമന്ത്രി വ്യക്തമായും അസ്വസ്ഥനും, മാനസികമായി സംഘര്‍ഷത്തിലും, നിരാശാബാധിതനുമാണ്. അദ്ദേഹത്തിന് അധികാരം ഒഴിഞ്ഞുപോയി സഞ്ചി എടുത്ത് മടങ്ങേണ്ട സമയം അതിവേഗം അടുത്തെത്തിയിരിക്കുന്നു,’ കോണ്‍ഗ്രസ് നേതാവ് പറഞ്ഞു.

ഈ വര്‍ഷത്തെ സ്വാതന്ത്ര്യ ദിനത്തിന് ചെങ്കോട്ടയില്‍ സംസാരിക്കവെയാണ് മോദി ദിമാഗി നക്‌സല്‍ എന്ന വാക്ക് ഉപയോഗിച്ചത്. തുടര്‍ന്നുള്ള ചില പൊതുയോഗങ്ങളിലും മോദി ഈ വാക്ക് ഉപയോഗിച്ചു. നക്‌സല്‍ ചിന്താഗതിയുള്ള ആളുകള്‍ ഇപ്പോഴും സമൂഹത്തില്‍ സജീവമാണെന്നും പ്രധാനമന്ത്രി ആരോപിച്ചിരുന്നു. ആയുധമേന്തിയ തീവ്രവാദികളേക്കാള്‍ അപകടകാരികളാണ് ബുദ്ധിപരമായി നക്‌സലിസം പ്രചരിപ്പിക്കുന്ന ആളുകളെന്ന ആരോപണവും മോദി നടത്തിയിരുന്നു.

Content Highlight: ‘Desperate and disturbed’: Congress About Modi over fresh ‘dimagi Naxals’ attack