അർജന്റീനക്ക് വേണ്ടി വിടവാങ്ങൽ മത്സരം കളിച്ചതിന് പിന്നാലെ ലയണൽ മെസിക്ക് വൈകാരികമായ ആശംസകൾ അറിയിച്ച് പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോ. അർജന്റീനക്ക് വേണ്ടിയുള്ള അവസാന മത്സരത്തിന് ശേഷം മെസി പങ്കുവെച്ച ഇൻസ്റ്റഗ്രാം പോസ്റ്റിന് താഴെ കമന്റിലൂടെയാണ് റൊണാൾഡോ മെസിക്ക് ആശംസ അറിയിച്ചത്.
‘ലിയോ, ഇത്രയും വർഷങ്ങൾ നിങ്ങൾ രാജ്യത്തിനായി പോരാടി. എന്നും ഓർമിക്കപ്പെടുന്ന ഒരു ചരിത്രം നിങ്ങൾ സൃഷ്ടിച്ചു. അർജന്റീനക്കൊപ്പം നിങ്ങൾ നേടിയ എല്ലാ നേട്ടങ്ങൾക്കും എന്റെ ഹൃദയം നിറഞ്ഞ ആദരം,’ റൊണാൾഡോ കുറിച്ചു.
അർജന്റീനക്ക് വേണ്ടി നേടേണ്ട നേട്ടങ്ങളെല്ലാം കൈപ്പിടിയിലാക്കിയാണ് മെസി മടങ്ങുന്നത്. കഴിഞ്ഞ ദിവസം നടന്ന ബെനിനെതിരെയുള്ള മത്സരത്തിലായിരുന്നു മെസി അർജന്റീനക്ക് വേണ്ടി അവസാനമായി ബൂട്ട് കെട്ടിയത്. മത്സരത്തിൽ എതിരില്ലാത്ത മൂന്ന് ഗോളുകൾക്കായിരുന്നു മുൻ ലോക ചാമ്പ്യന്മാരുടെ വിജയം. അർജന്റീന നേടിയ ഈ മൂന്ന് ഗോളിലും മെസിയുടെ കാൽപ്പാടുകൾ ഉണ്ടായിരുന്നു.
മത്സരത്തിൽ രണ്ട് അസിസ്റ്റുകളും ഒരു ഗോളും നേടിയാണ് മെസി തിളങ്ങിയത്. അർജന്റീനക്ക് വേണ്ടി 126 ഗോളുകളും 67 അസിസ്റ്റുകളും നേടിയാണ് തന്റെ ഐതിഹാസികമായ 21 വർഷത്തെ യാത്ര മെസി അവസാനിപ്പിച്ചത്.
2028 കോപ്പ അമേരിക്കയിൽ അർജന്റീനക്കായി മെസി കളത്തിലിറങ്ങുമെന്ന് പ്രതീക്ഷിച്ചിരുന്നെങ്കിലും ആരാധകരെ ഒന്നടങ്കം കണ്ണീരിലാഴ്ത്തിയായിരുന്നു ഓഗസ്റ്റ് 31ന് അർജന്റൈൻ ഇതിഹാസത്തിന്റെ പടിയിറക്കം. എന്നാൽ ജന്മനാടിനായി അവസാന പോരാട്ടത്തിനായി വീണ്ടും മെസി കളത്തിലിറങ്ങുകയായിരുന്നു.
2026 ലോകകപ്പിലും മെസിയുടെ പോരാട്ടവീര്യങ്ങൾക്ക് ഫുട്‌ബോൾ ലോകം സാക്ഷിയായി. ഫൈനലിൽ സ്‌പെയ്‌നിന് മുന്നിൽ പരാജയപ്പെട്ടെങ്കിലും ലോകകപ്പിൽ പല റെക്കോഡുകളും തിരുത്തിയാണ് മെസി മടങ്ങിയത്.
ലോകകപ്പിൽ ഏറ്റവും കൂടുതൽ ഗോൾ നേടുന്ന രണ്ടാമത്തെ താരമായും ലോകകപ്പിൽ അർജന്റീനയ്ക്ക് വേണ്ടി ഏറ്റവും കൂടുതൽ ഗോൾ നേടുന്ന താരമായും മെസി ചരിത്രത്തിൽ ഇടം പിടിച്ചു. 21 ഗോളുകളാണ് ആറ് ലോകകപ്പുകളിൽ നിന്നും മെസി അടിച്ചുകൂട്ടിയത്. 2026 ലോകകപ്പിൽ എട്ട് ഗോളുകളും നാല് അസിസ്റ്റുകളുമായിരുന്നു മെസിയുടെ സമ്പാദ്യം.
ഇന്റർനാഷണൽ ഫുട്‌ബോളിൽ നിന്നും പടിയിറങ്ങിയെങ്കിലും മെസി ക്ലബ്ബ് ഫുട്‌ബോളിൽ ഇന്റർ മയാമിക്ക് വേണ്ടി കളിക്കുന്നത് തുടരും.
Content Highlight: Cristiano Ronaldo extends his wishes to Lionel Messi following his retirement from international football