മലപ്പുറം ജില്ലക്കെതിരായ സി.പി.ഐ.എം നേതാവിന്റെ വിദ്വേഷ പരാമര്‍ശം; നന്ദകുമാറിനെ തള്ളി എം.വി. ഗോവിന്ദന്‍

പാലക്കാട്: മലപ്പുറം ജില്ലക്കെതിരായ വിദ്വേഷ പരാമര്‍ശം നടത്തിയ പൊന്നാനി മുന്‍ എം.എല്‍.എ പി. നന്ദകുമാറിനെ തള്ളി സി.പി.ഐ.എം സംസ്ഥാന സെക്രട്ടറി എം.വി. ഗോവിന്ദന്‍. സി.പി.ഐ.എം നേതാവായ നന്ദകുമാര്‍ പറഞ്ഞത് പാര്‍ട്ടി നിലപാടല്ലെന്ന് എം.വി. ഗോവിന്ദന്‍ പ്രതികരിച്ചു.

മുസ്‌ലിം മതന്യൂനപക്ഷങ്ങളെ ചേര്‍ത്തുപിടിക്കുന്നതാണ് പാര്‍ട്ടി നിലപാട്. സംസ്ഥാന സെക്രട്ടറി പറയുന്നതാണ് പാര്‍ട്ടി നിലപാടെന്നും ഗോവിന്ദന്‍ കൂട്ടിച്ചേര്‍ത്തു. നന്ദകുമാറിന്റെ വിദ്വേഷ പരാമര്‍ശത്തിനെതിരെ വ്യാപക വിമര്‍ശനം ഉയരുന്നതിനിടെയാണ് എം.വി. ഗോവിന്ദന്റെ പ്രതികരണം.

മതമൗലിക വര്‍ഗീയവാദികളുടെ കൂടാണ് മലപ്പുറം ജില്ല എന്നായിരുന്നു സി.പി.ഐ.എം നേതാവ് നന്ദകുമാറിന്റെ വിദ്വേഷ പരാമര്‍ശം. പൊന്നാനിയില്‍ നടന്ന സി.പി.ഐ.എം മലപ്പുറം ജില്ലാ വിപുലികൃത കമ്മിറ്റി പ്രതിനിധി സമ്മേളനത്തില്‍ പ്രതിപക്ഷ നേതാവ് പിണറായി വിജയന്‍ അടക്കമുള്ളവര്‍ വേദിയിലിരിക്കെയായിരുന്നു നന്ദകുമാര്‍ ഈ കാര്യം പറഞ്ഞത്.

‘മലപ്പുറം ജില്ലയെ സംബന്ധിച്ച് സവിശേഷമായ പല സാഹചര്യവുമുണ്ട്. മതമൗലിക വര്‍ഗീയവാദികളുടെ കൂടാണ് മലപ്പുറം ജില്ല. അതിനെ പ്രതിരോധിച്ച് മതനിരപേക്ഷ പ്രസ്ഥാനങ്ങളെ യോജിപ്പിച്ച് മുന്നോട്ടുപോകുന്ന കമ്മ്യൂണിസ്റ്റ് പാര്‍ട്ടി, പുതിയ കാലത്ത് അതിന്റെ രാഷ്ട്രീയ കടമകള്‍ എങ്ങനെ ഏറ്റെടുക്കണമെന്ന് പരിശോധിക്കണം’, എന്ന് നന്ദകുമാര്‍ പറഞ്ഞിരുന്നു.

മന്ത്രി കെ.എം. ഷാജി, എം.എല്‍.എ വി.എസ്. ജോയ് അടക്കമുള്ള യു.ഡി.എഫ് നേതാക്കള്‍ നന്ദകുമാറിന്റെ പരാമര്‍ശത്തെ അപലപിച്ചിരുന്നു.
സമൂഹ മാധ്യമങ്ങളിലും ഈ പരാമര്‍ശത്തിനെതിരെ ശക്തമായ പ്രതിഷേധം ഉയരുന്നുണ്ട്. നന്ദകുമാറിനെതിരെ യൂത്ത് ലീഗ് പൊന്നാനി മുനിസിപ്പല്‍ കമ്മിറ്റി പരാതി നല്‍കുകയും ചെയ്തിരുന്നു. മത സൗഹാര്‍ദം തകര്‍ക്കുന്ന പരാമര്‍ശം നടത്തിയെന്നായിരുന്നു പരാതി.

എ.പി സമസ്തക്ക് കീഴിലുള്ള കേരള മുസ്ലിം ജമാഅത്തും നന്ദകുമാറിന്റ പരാമര്‍ശത്തെ അപലപിച്ചിരുന്നു. സി.പി.ഐ.എം നേതാവ് നന്ദകുമാറിന്റെ പ്രസ്താവന പ്രതിഷേധാര്‍ഹമാണെന്നും അവജ്ഞയോടെ തള്ളിക്കളയണമെന്നുമാണ് കേരള മുസ്‌ലിം ജമാഅത്ത് പ്രതികരിച്ചത്.

Content Highlight: CPIM State Scretary MV Govindan’s Response on Hate Speech of CPIM Leader Nandakumar against Malappuram