ഫോം ആറിൽ മാറ്റം വരുത്തിയ നടപടി: ചീഫ് ഇലക്ഷൻ കമ്മീഷണർ ഗ്യാനേഷ് കുമാർ നിയമം ലംഘിച്ചെന്ന് കോൺഗ്രസ്; സുപ്രീം കോടതി സ്വമേധയാ ഇടപെടണമെന്ന് ആവശ്യം

ന്യൂദൽഹി: വോട്ടർ പട്ടികയിൽ പേര് ചേർക്കാനുള്ള ഫോം ആറിൽ ഏകപക്ഷീയമായി മാറ്റം വരുത്തി മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ നിയമവും ഭരണഘടനാപരമായ കീഴ്‌വഴക്കങ്ങളും ലംഘിച്ചതായി കോൺഗ്രസ് ആരോപിച്ചു. വിഷയത്തിൽ സുപ്രീം കോടതി സ്വമേധയാ കേസെടുത്ത് അദ്ദേഹത്തെ ഉത്തരവാദിയാക്കണമെന്നും പാർട്ടി ആവശ്യപ്പെട്ടു.

ഗ്യാനേഷ് കുമാർ പദവിയിൽ തുടരുന്നത് രാജ്യത്തെ ജനങ്ങളോടുള്ള അവഹേളനമാണെന്ന് കോൺഗ്രസ് ജനറൽ സെക്രട്ടറി ജയറാം രമേശ് എക്സിൽ കുറിച്ചു. ലോക്‌സഭാ പ്രതിപക്ഷ നേതാവ് രാഹുൽ ഗാന്ധിയുടെ നിലപാടിനെ പിന്തുണച്ചുകൊണ്ട്, സി.ഇ.സി രാജിവെക്കണമെന്ന പാർട്ടിയുടെ ആവശ്യം അദ്ദേഹം ആവർത്തിച്ചു.

വെള്ളിയാഴ്ച അർദ്ധരാത്രിയോടെ തെരഞ്ഞെടുപ്പ് കമ്മീഷൻ, യുവ വോട്ടർമാർക്കായി പ്രത്യേക എൻറോൾമെന്റ് ക്യാമ്പുകൾ സംഘടിപ്പിക്കാനും സോഷ്യൽ മീഡിയ വഴി ഇതിന് വിപുലമായ പ്രചാരണം നൽകാനും ഉദ്യോഗസ്ഥർക്ക് നിർദ്ദേശം നൽകിയതായി ജയറാം രമേശ് ചൂണ്ടിക്കാട്ടി.

അപേക്ഷകരുടെ മാതാപിതാക്കളോ മുത്തശ്ശീമുത്തശ്ശന്മാരോ മുൻപ് നടന്ന സ്‌പെഷ്യൽ ഇന്റൻസീവ് റിവിഷനിൽ (എസ്.ഐ.ആർ) ഉൾപ്പെട്ടിട്ടുണ്ടോ എന്ന് വ്യക്തമാക്കണമെന്ന പുതിയ നിബന്ധന ഫോം ആറിൽ നിർബന്ധമാക്കിക്കൊണ്ട് യുവ വോട്ടർമാരുടെ രജിസ്ട്രേഷൻ നേരത്തെ ദുഷ്കരമാക്കിയ ശേഷമാണ് കമ്മീഷന്റെ ഈ നടപടിയെന്ന് അദ്ദേഹം ആരോപിച്ചു.

ഈ മാറ്റം പൂർണമായും നിയമവിരുദ്ധമാണെന്ന് വിശേഷിപ്പിച്ച അദ്ദേഹം, യാതൊരു ഔദ്യോഗിക വിജ്ഞാപനവുമില്ലാതെ 2026 ജൂലൈ ആദ്യവാരത്തിൽ ഓൺലൈൻ ഫോമിൽ മാറ്റം വരുത്തുകയായിരുന്നുവെന്നും വ്യക്തമാക്കി. 1950-ലെ ജനപ്രാതിനിധ്യ നിയമപ്രകാരം ഫോം ആറ് ഭേദഗതി ചെയ്യാനുള്ള അധികാരം കേന്ദ്ര സർക്കാരിൽ മാത്രമാണ് നിക്ഷിപ്തമായിട്ടുള്ളതെന്നും തെരഞ്ഞെടുപ്പ് കമ്മീഷന് അതിനുള്ള അധികാരമില്ലെന്നും അദ്ദേഹം വാദിച്ചു.

പാർലമെന്റിനെ അറിയിച്ചുകൊണ്ട് കേന്ദ്ര സർക്കാരിന് മാത്രം മാറ്റാൻ സാധിക്കുന്ന 1960-ലെ ‘രജിസ്ട്രേഷൻ ഓഫ് ഇലക്ടേഴ്സ് റൂൾസ്’ ഭേദഗതി ചെയ്യാതെയാണ് ഈ നടപടി സ്വീകരിച്ചതെന്നും അദ്ദേഹം ചൂണ്ടിക്കാട്ടി.

യുവാക്കൾക്കും കന്നിവോട്ടർമാർക്കും തടസ്സമില്ലാതെ രജിസ്റ്റർ ചെയ്യാൻ കഴിയുന്നതിനായി ഈ ‘നിയമവിരുദ്ധവും അനധികൃതവുമായ’ മാറ്റം പിൻവലിക്കണമെന്ന് കമ്മീഷനിലെ മറ്റ് രണ്ട് തെരഞ്ഞെടുപ്പ് കമ്മീഷണർമാരും ആവശ്യപ്പെട്ടിരുന്നതായി അദ്ദേഹം പറഞ്ഞു.

‘ഭരണഘടനാപരമായ മര്യാദകളും നടപടിക്രമങ്ങളും മാത്രമല്ല, പാർലമെന്റ് പാസാക്കിയ നിയമവും ഇലക്ഷൻ കമ്മിഷണർ ബോധപൂർവ്വം ലംഘിച്ചിരിക്കുകയാണ്,’ എന്ന് പറഞ്ഞ ജയറാം രമേശ്, സുപ്രീം കോടതി വിഷയത്തിൽ സ്വമേധയാ ഇടപെടണമെന്ന് അഭ്യർത്ഥിച്ചു. രാജിവെച്ച് മാപ്പുസാക്ഷിയാകാൻ തയ്യാറായാൽ ഗ്യാനേഷ് കുമാറിന് പ്രായശ്ചിത്തം ചെയ്യാൻ സാധിക്കുമെന്ന രാഹുൽ ഗാന്ധിയുടെ വാക്കുകളും അദ്ദേഹം ഉദ്ധരിച്ചു.

വോട്ടർ പട്ടികയിൽ പുതുതായി പേര് ചേർക്കാൻ ആഗ്രഹിക്കുന്നവർ മാതാപിതാക്കളുടെ എസ്.ഐ.ആർ വിവരങ്ങൾ നൽകണമെന്ന നിർദ്ദേശം വിവാദമായ പശ്ചാത്തലത്തിലാണ് കോൺഗ്രസിന്റെ ഈ ആരോപണങ്ങൾ.

കഴിഞ്ഞ ജൂണിൽ ബീഹാറിൽ എസ്.ഐ.ആർ നടപടികൾ ആരംഭിച്ചതിനുശേഷം 18-നും 28-നും ഇടയിൽ പ്രായമുള്ള 2.37 കോടി വോട്ടർമാരെ ചേർത്തതായി തെരഞ്ഞെടുപ്പ് കമ്മീഷൻ ഉദ്യോഗസ്ഥർ വെള്ളിയാഴ്ച വ്യക്തമാക്കിയിരുന്നു.

ഓൺലൈൻ പ്രക്രിയയിൽ വരുത്തിയ മാറ്റത്തെത്തുടർന്ന്, നിലവിലുള്ള വോട്ടർമാർ വോട്ടർപട്ടികയിൽ തുടരുന്നതിനും പുതുതായി അപേക്ഷിക്കുന്നവർ പേര് ചേർക്കുന്നതിനും മാതാപിതാക്കളുടെ എസ്.ഐ.ആർ വിവരങ്ങൾ നൽകേണ്ടതുണ്ട്. പുതിയ വോട്ടർമാർ ഫോം 6 പൂരിപ്പിക്കുമ്പോൾ ഈ വിവരങ്ങൾ നൽകുന്നത് നിർബന്ധമാക്കാൻ കമ്മീഷൻ ഉദ്യോഗസ്ഥർക്ക് നിർദ്ദേശം നൽകിയിട്ടുണ്ട്.

എന്നാൽ, നിർദ്ദേശങ്ങളിലൂടെ ഒരു സത്യവാങ്മൂലം ഉൾപ്പെടുത്തുക മാത്രമാണ് ചെയ്തതെന്നും ഫോം ആറിൽ ഭേദഗതി വരുത്തിയിട്ടില്ലെന്നുമാണ് തെരഞ്ഞെടുപ്പ് കമ്മീഷൻ ഉദ്യോഗസ്ഥരുടെ വിശദീകരണം. എങ്കിലും, ഓൺലൈനായി ഫോം ആറ് പൂരിപ്പിക്കുന്നവർക്ക് ഈ സത്യവാങ്മൂലം പൂർത്തിയാക്കാതെ അപേക്ഷാ നടപടികളുമായി മുന്നോട്ട് പോകാനാകില്ലെന്നും ഉദ്യോഗസ്ഥൻ വ്യക്തമാക്കി.

Content Highlight:Congress alleges CEC Gyanesh Kumar violated the law by changing Form 6; urges Supreme Court to take suo motu cognizance.