അരൂര്: ബി.ഡി.ജെ.എസ് പിന്മാറിയ സാഹചര്യത്തില് അരൂരില് ബി.ജെ.പി മത്സരിക്കും. യുവമോര്ച്ചാ നേതാവ് പ്രകാശ് ബാബുവിനെയാണ് നേതൃത്വം പരിഗണിക്കുന്നത്. കഴിഞ്ഞ ലോക്സഭാ തെരഞ്ഞെടുപ്പില് കോഴിക്കോട് നിന്നും മത്സരിച്ച എന്.ഡി.എ സ്ഥാനാര്ത്ഥിയായിരുന്നു പ്രകാശ് ബാബു.
ചിത്തിര ആട്ട വിശേഷ സമയത്ത് ശബരിമലയില് സ്ത്രീയെ ആക്രമിച്ച കേസിലെ മുഖ്യപ്രതിയാണ് പ്രകാശ് ബാബു. ശബരിമല യുവതീപ്രവേശന പ്രതിഷേധങ്ങളുമായി ബന്ധപ്പെട്ട് പൊലീസ് പ്രകാശ് ബാബുവിനെ പിടികിട്ടാപ്പുള്ളിയായി പ്രഖ്യാപിച്ചിരുന്നു.
ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ
ശബരിമല യുവതീപ്രവേശന പ്രതിഷേധങ്ങളുമായി ബന്ധപ്പെട്ട് പ്രകാശ് ബാബുവിനെതിരെ എട്ട് കേസുകളാണുള്ളത്. ശബരിമലയില് കലാപത്തിന് ശ്രമിച്ചു, ചിത്തിര ആട്ട വിശേഷത്തിനിടെ സ്ത്രീയെ തടഞ്ഞു, ദേവസ്വം ബോര്ഡ് പ്രസിഡന്റിന്റെ വീട്ടിലേക്ക് നടത്തിയ മാര്ച്ചിനിടെ പൊലീസ് വാഹനങ്ങള് തകര്ത്തു എന്നീ കേസുകളിലാണ് പ്രകാശ് ബാബുവിനെതിരെ അറസ്റ്റ് വാറണ്ട് പുറപ്പെടുവിച്ചിരുന്നത്.
അരൂരില് ബി.ഡി.ജെ.എസ് മത്സരിക്കാനില്ലെന്ന് അധ്യക്ഷന് തുഷാര് വെള്ളാപ്പള്ളി ബി.ജെ.പി ദേശീയ അധ്യക്ഷന് അമിത് ഷായെ അറിയിച്ചിരുന്നു. ഇന്നലെ രാത്രി വൈകിയാണ് തുഷാര് അമിത് ഷായുമായി കൂടിക്കാഴ്ച നടത്തിയത്. പാര്ട്ടിക്ക് അര്ഹമായ പരിഗണനകിട്ടാത്തതിനാലാണ് തീരുമാനമെന്ന് തുഷാര് പറഞ്ഞതായാണ് റിപ്പോര്ട്ട്. ഇതിന് പിന്നാലെയാണ് സ്ഥാനാര്ത്ഥിയെ പ്രഖ്യാപിക്കാന് ബി.ജെ.പി ഒരുങ്ങുന്നത്.
വാര്ത്തകള് ടെലഗ്രാമില് ലഭിക്കാന് ഇവിടെ ക്ലിക്ക് ചെയ്യൂ
ബി.ജെ.പി വാഗ്ദാനം ചെയ്ത ബോര്ഡ്, കോര്പ്പറേഷന് സ്ഥാനങ്ങള് പാര്ട്ടിക്ക് ഇതുവരെ ലഭ്യമാക്കിയിട്ടില്ലെന്നും ഇതില് തീരുമാനം ഉണ്ടാകണമെന്നും തുഷാര് അമിത് ഷായോട് ആവശ്യപ്പെട്ടതായാണ് റിപ്പോര്ട്ട്. എന്നാല് നിലവിലെ സാഹചര്യത്തില് അത് പരിഗണിക്കാനാവില്ലെന്ന നിലപാടാണ് അമിത് ഷാ കൈക്കൊണ്ടത് എന്നാണ് അറിയുന്നത്.