മലയാള സിനിമയിൽ അപൂർവമായി മാത്രം സംഭവിക്കുന്ന തരത്തിലുള്ള വലിയ വിജയമായി മാറിയ ചിത്രമാണ് സവിൻ സ സംവിധാനം ചെയ്ത വാഴ 2.
ഇൻസ്റ്റഗ്രാം റീൽസിലൂടെ ശ്രദ്ധ നേടിയ ഹാഷിറും സംഘവും പ്രധാന വേഷങ്ങളിൽ എത്തിയ ഈ ചിത്രം റിലീസിന് പിന്നാലെ തന്നെ സോഷ്യൽ മീഡിയയിലും പ്രേക്ഷകർക്കിടയിലും വലിയ ചർച്ചയായി.
വാഴ 2, Photo: IMDb
എന്നാൽ യുവതാരങ്ങളോടൊപ്പം തന്നെ ചിത്രത്തിൽ ഏറ്റവും കൂടുതൽ കൈയ്യടി നേടിയ കഥാപാത്രങ്ങളിൽ ഒന്നായി മാറിയത് ബിജുക്കുട്ടൻ അവതരിപ്പിച്ച അച്ഛൻ വേഷമാണ്. വിനായകിന്റെ അച്ഛനായി നിറഞ്ഞ പ്രകടനം കാഴ്ചവെച്ച ബിജുക്കുട്ടൻ, സിനിമയിൽ മറ്റൊരു ഇമോഷൻ നൽകി.
ചിത്രം റിലീസായതോടെ ഈ കഥാപാത്രം സോഷ്യൽ മീഡിയയിൽ വൈറലാകുകയും പ്രേക്ഷകർ ഏറ്റെടുക്കുകയും ചെയ്തു. ഇപ്പോഴിതാ, റിപ്പോർട്ടർ ഫിലിം യൂട്യൂബ് ചാനലിന് നൽകിയ അഭിമുഖത്തിൽ, തന്റെ കഥാപാത്രത്തിന് ലഭിച്ച ഈ അപ്രതീക്ഷിതമായ ജനപ്രീതിയെക്കുറിച്ച് തുറന്ന് സംസാരിക്കുകയാണ് ബിജുക്കുട്ടൻ.
‘വാഴ ഇറങ്ങിയതിന് ശേഷം ‘ചോട്ടാ മുബൈ’യിൽ ലാലേട്ടൻ പറയുന്ന ഒരു സീൻ വെച്ച് നിരവധി എഡിറ്റുകൾ വരുന്നുണ്ട്. അതിന്റെ താഴെ കമന്റുകളും കാണാം ലാലേട്ടൻ പറഞ്ഞത് കറക്ട് ആയില്ലേ എന്ന്.
ചോട്ടാ മുബൈ, Photo: IMDb
‘എടാ നീയാണ് ഈ സിനിമയിലെ മെയിൻ’ എന്ന് പറയുന്ന ആ ഡയലോഗ് ആണ് എല്ലാ വീഡിയോകളിലും കാണാൻ സാധിക്കുന്നത്. ലാലേട്ടന്റെ ഡയലോഗും, പിന്നെ ‘വാഴ’യിൽ ഞാൻ പടക്കം പൊട്ടിക്കുന്ന സീനും ഒരുമിച്ചാണ് വീഡിയോ ഇറക്കുന്നത്. ലാലേട്ടൻ അന്ന് പറഞ്ഞ ആ ഡയലോഗുകൾ, ലാലേട്ടന്റെ നാവ് പൊന്നായി എന്ന് തന്നെ വേണം പറയാൻ,’ ബിജുക്കുട്ടൻ പറഞ്ഞു.
ബിജുക്കുട്ടൻ, വിനായക്, Photo: Bijukuttan/ Facebook
റിലീസ് ചെയ്ത് വെറും എട്ട് ദിവസത്തിനുള്ളിൽ തന്നെ ചിത്രം ആഗോളതലത്തിൽ 117 കോടി രൂപയ്ക്ക് മുകളിൽ ഗ്രോസ് കളക്ഷൻ നേടി. ആദ്യ ഭാഗത്തെക്കാൾ വലിയ സ്വീകാര്യതയാണ് രണ്ടാം ഭാഗത്തിന് തിയേറ്ററുകളിൽ ലഭിച്ചുകൊണ്ടിരിക്കുന്നത്.
സവിൻ സ സംവിധാനം ചെയ്ത ഈ ചിത്രത്തിന്റെ തിരക്കഥ ഒരുക്കിയത് ഹിറ്റ് മേക്കർ വിപിൻ ദാസാണ്. ഹാഷിർ, അലൻ, അജിൻ, വിനായക് എന്നീ സോഷ്യൽ മീഡിയ താരങ്ങൾക്കൊപ്പം അൽഫോൻസ് പുത്രൻ, വിജയ് ബാബു, അജു വർഗീസ് എന്നിവരും പ്രധാന വേഷങ്ങളിൽ എത്തുന്നു.
Content Highlight: Bijukuttan talk about Actor Mohanlal