മലയാള സിനിമയ്ക്ക് ഏറെ പരിചിതനായ നടനാണ് അശോകന്. 1987ല് പുറത്തിറങ്ങിയ പെരുവഴിയമ്പലം എന്ന ചിത്രത്തിലൂടെയാണ് അദ്ദേഹം തന്റെ സിനിമാ കരിയര് ആരംഭിച്ചത്. പിന്നീട് മലയാളത്തിലെ മികച്ച നടന്മാരിലൊരാളായി അദ്ദേഹം മാറി. ഇതിനോടകം സിനിമകളില് ചെറുതും വലുതുമായ കഥാപാത്രങ്ങളെ അവതരിപ്പിക്കാന് അശോകന് സാധിച്ചു. നായകനായും സഹനടനായും വില്ലനായുമെല്ലാം സിനിമയില് അശോകന് തന്റെ സാന്നിധ്യമറിയിച്ചിട്ടുണ്ട്.
അടൂര് ഗോപാലകൃഷ്ണന്, പത്മരാജന് എന്നിങ്ങനെ മലാളത്തിലെ നിരവധി പ്രശസ്ത സംവിധായകരുടെ സിനിമകളിലും അദ്ദേഹം അഭിനയിച്ചിട്ടുണ്ട്. ഇപ്പോള് തന്റെ അനന്തരം എന്ന സിനിമ ഇന്നത്തെ തലമുറയും കാണുന്നതില് സന്തോഷമുണ്ടെന്ന് അശോകന് പറയുന്നു. അനന്തരം അന്നത്തെ ഓഫ്ബീറ്റ് സിനിമകളില് ഉള്പ്പെടുന്ന ഒരു സിനിമയാണെന്നും പാട്ടും മറ്റുമൊന്നും ആ സിനിമയില് ഉണ്ടായിരുന്നില്ലെന്നും അദ്ദേഹം പറഞ്ഞു. സിനിമയിലെ ബസ് സീക്വന്സൊക്കെ സോഷ്യല് മീഡിയയിലും റീലുകളിലുമൊക്കെ കാണാറുണ്ടെന്നും അദ്ദേഹം കൂട്ടിച്ചേര്ത്തു. സൈന സൗത്ത് പ്ലസിനോട് സംസാരിക്കുകയായിരുന്നു അശോകന്.
‘ഇപ്പോഴത്തെ തലമുറയും ഈ സിനിമകള് കാണുന്നുണ്ടല്ലോ എന്നൊരു സന്തോഷം നമുക്ക് ഉണ്ട്. കാരണം ഈ സിനിമ ശരിക്കും അന്നത്തെ ഒരു ഓഫ് ബീറ്റ് സിനിമയാണ്. പാട്ടില്ല, സ്റ്റണ്ടുകളോ അങ്ങനെയുള്ള ഒരു പരിപാടിയും അതിനകത്ത് ഇല്ല.
എന്നിട്ട് തന്നെ ആ പടം ഇന്ന് റീലായിട്ട് ഇന്സ്റ്റാഗ്രാമിലൊക്കെ വരുമ്പോള് ഇന്നത്തെ തലമുറയും കാണുന്നുണ്ടല്ലോ എന്നൊരു സന്തോഷം ഞങ്ങള്ക്കുണ്ട്. ഇപ്പോള് ആ ബസിലെ സീക്വന്സുകളൊക്കെ വേറെ പാട്ടൊക്കെ ഇട്ടുകൊണ്ടാണ് കാണിക്കുന്നത്. പാട്ട് എന്ന പരിപാടി അതിനകത്ത് ഇല്ല. പക്ഷേ അതുകൊണ്ട് റീച്ചാകുന്നുണ്ട്,’ അശോകന് പറയുന്നു.
അനന്തരം
അടൂര് ഗോപാലകൃഷ്ണന് രചനയും സംവിധാനവും നിര്വ്വഹിച്ച് 1987ല് പുറത്തിറങ്ങിയ ചിത്രമാണ് അനന്തരം. അശോകന്, ശോഭന, മമ്മൂട്ടി എന്നിവര് കേന്ദ്ര കഥാപാത്രങ്ങളെ അവതരിപ്പിച്ചിരുക്കുന്ന ഈ സിനിമ ആത്മഗത രീതിയിലുള്ള കഥപറച്ചില് ഘടനയാണ് സ്വീകരിച്ചിരിക്കുന്നത്. അനന്തരം ആ വര്ഷത്തെ ഏറ്റവും മികച്ച സംവിധായകനും തിരക്കഥാകൃത്തിനുമുള്ള ദേശീയ പുരസ്കാരം അടൂരിന് നേടികൊടുത്തു.
Content Highlight: Ashokan talks about Anatharam movie