തമിഴകത്തിന്റെ ദളപതി വിജയ്യുടെ അവസാനചിത്രമായി ആരാധകര് കരുതുന്ന ജന നായകന്റെ പുതിയ അപ്ഡേറ്റാണ് സോഷ്യല് മീഡിയയില് ചര്ച്ച. ചിത്രത്തിന്റെ ഓഡിയോ ലോഞ്ച് ഡിസംബര് 27ന് മലേഷ്യയില് വെച്ച് നടക്കുമെന്ന് അണിയറപ്രവര്ത്തകര് അറിയിച്ചു. മലേഷ്യയിലെ വിജയ് ആരാധകര് തങ്ങളുടെ ഇഷ്ടതാരത്തെക്കുറിച്ച് സംസാരിക്കുന്ന സ്പെഷ്യല് വീഡിയോ നിര്മാതാക്കള് കഴിഞ്ഞദിവസം പുറത്തുവിട്ടിരുന്നു.
വീഡിയോയില് അനിരുദ്ധ് ഒരുക്കിയ ഗാനമാണ് എല്ലാവരുടെയും ശ്രദ്ധ ആകര്ഷിച്ചത്. വളരെയധികം ഇമോഷണലാക്കാന് സാധിക്കുന്ന സ്ലോ പേയ്സ് ഗാനമാണ് അനിരുദ്ധ് ഒരുക്കിയത്. ആരാധകരുടെ വാക്കുകളെക്കാള് എല്ലാവരും ഒരുപോലെ ഏറ്റെടുത്തത് അനിരുദ്ധിന്റെ ഗാനമാണ്. വിജയ്യുടെ പല രംഗങ്ങളും ഗാനത്തോടൊപ്പം കാണിച്ചത് കൂടുതല് ഇമോഷണലാക്കിയെന്നും അഭിപ്രായമുണ്ട്.
തങ്ങളുടെ ദളപതിക്ക് ഇതിനെക്കാള് നല്ല യാത്രയയപ്പ് നല്കാനാകില്ലെന്നാണ് ആരാധകര് പറയുന്നത്. ഓരോ തവണ കേള്ക്കുമ്പോഴും കണ്ണ് നിറയുന്നുണ്ടെന്നും എന്തോ ഒരു മാജിക് ഈ പാട്ടില് അനിരുദ്ധ് ചെയ്തിട്ടുണ്ടെന്നും കമന്റുകളുണ്ട്. ഓഡിയോ ലോഞ്ച് വേദിയില് വിജയ്യുടെ മുന്നില് വെച്ച് ഈ പാട്ട് പാടുമ്പോള് അദ്ദേഹവും കരയുമെന്നും ചിലര് പറയുന്നുണ്ട്.
മലേഷ്യ ഇതുവരെ കണ്ടതില് വെച്ച് ഏറ്റവും വലിയ സിനിമാ ഇവന്റാണ് അണിയറപ്രവര്ത്തകര് ലക്ഷ്യം വെക്കുന്നത്. മലേഷ്യയിലെ ബുകിത് ജലീല് സ്റ്റേഡിയത്തിലാണ് ഓഡിയോ ലോഞ്ച് അരങ്ങേറുന്നത്. സുരക്ഷാ കാരണങ്ങള് ചൂണ്ടിക്കാട്ടി മുമ്പ് പുറത്തുവന്ന രണ്ട് വിജയ് ചിത്രങ്ങളുടെയും ഓഡിയോ ലോഞ്ചിന് സര്ക്കാര് അനുമതി നല്കിയിരുന്നില്ല.
അവസാന സിനിമയുടെ ഓഡിയോ ലോഞ്ച് നേരില് കാണാന് കഴിയാത്തതിന്റെ നിരാശയിലാണ് തമിഴ്നാട്ടിലെ വിജയ് ആരാധകര്. ടി.വിയില് ലൈവ് ടെലികാസ്റ്റും ലൈവ് സ്ട്രീമിങ്ങും നടത്താന് അണിയറപ്രവര്ത്തകര് പദ്ധതിയിടുന്നുണ്ട്. വിജയ്ക്ക് വേണ്ടി അനിരുദ്ധ് ഒരു ട്രിബ്യൂട്ട് കണ്സേര്ട്ട് നടത്താന് സാധ്യതയുണ്ടെന്നും റിപ്പോര്ട്ടുണ്ട്.
18 വര്ഷത്തിന് ശേഷമാണ് വിജയ് മലേഷ്യന് മണ്ണില് കാലുകുത്തുന്നത്. ഇനി ഒരിക്കല് കൂടി ഓഡിയോ ലോഞ്ചോ കുട്ടിക്കഥ പറയലോ ഉണ്ടാകില്ലെന്നാണ് ആരാധകര് കണക്കുകൂട്ടുന്നത്. 85000ത്തിലധികം ആളുകളെ ഉള്ക്കൊള്ളിക്കാന് കഴിയുന്ന സ്റ്റേഡിയത്തില് ദളപതിയുടെ എന്ട്രി ഗംഭീരമാകുമെന്നാണ് സിനിമാലോകം കരുതുന്നത്.
Content Highlight: Anirudh’s song in Jana Nayagan audio launch announcement viral