കോഴിക്കോട്: സംസ്ഥാനത്ത് വീണ്ടും അമീബിക് മസ്തിഷ്ക ജ്വര മരണം. കോഴിക്കോട് മെഡിക്കല് കോളേജില് ചികിത്സയിലായിരുന്ന വയനാട് സുല്ത്താന് ബത്തേരി സ്വദേശി രതീഷ് (45) ആണ് മരിച്ചത്. ഇന്ന് (ശനി) പുലര്ച്ചയോടെ മരണം സ്ഥിരീകരിക്കുകയായിരുന്നു.
കരള് രോഗ ബാധിതനായ രതീഷിനെ പനി മൂര്ച്ഛിച്ചതോടെയാണ് മെഡിക്കല് കോളേജില് എത്തിച്ചത്. പിന്നീട് നടത്തിയ പരിശോധനയിലാണ് അമീബിക് മസ്തിഷ്ക ജ്വരം സ്ഥിരീകരിച്ചത്.
നിലവില് കോഴിക്കോട് മെഡിക്കല് കോളേജ് ആശുപത്രിയില് ചികിത്സയില് തുടരുന്ന കാസര്ഗോഡ് സ്വദേശിയുടെ ആരോഗ്യനില അതീവ ഗുരുതരമായി തുടരുകയാണെന്നാണ് വിവരം. 30കാരനായ കാസര്ഗോഡ് സ്വദേശിക്ക് മറ്റു ചില രോഗങ്ങള്ക്കും ചികിത്സ തേടുന്നുണ്ട്.
കഴിഞ്ഞ ഒന്നരമാസത്തിനിടെ അമീബിക് മസ്തിഷ്ക ജ്വരം ബാധിച്ച് ചികിത്സയിലായിരുന്ന നാല് പേരാണ് മരിച്ചത്. മൂന്ന് മാസം പ്രായമുള്ള കുഞ്ഞ് ഉള്പ്പെടെയാണ് മരണപ്പെട്ടത്. നിലവില് പത്ത് പേരാണ് മെഡിക്കല് കോളേജില് ചികിത്സയില് കഴിയുന്നത്.
ഗുരുതരാവസ്ഥയില് കഴിയുന്നവര്ക്ക് മറ്റ് അസുഖങ്ങളും ഉള്ളതിനാല് ആരോഗ്യനിലയില് ആശങ്കയുണ്ടെന്ന് ഡോക്ടര്മാര് പ്രതികരിച്ചിരുന്നു.
സംസ്ഥാനത്ത് അമീബിക് മസ്തിഷ്ക ജ്വരം വ്യാപകമായി റിപ്പോര്ട്ട് ചെയ്യുന്ന സാഹചര്യത്തില് തദ്ദേശ സ്ഥാപനങ്ങള് കേന്ദ്രീകരിച്ച് പ്രതിരോധ പ്രവര്ത്തനങ്ങള് ഊര്ജിതമാക്കാന് ആരോഗ്യവകുപ്പ് നിര്ദേശം നല്കിയിരുന്നു.
അമീബിക് മസ്തിഷ്ക ജ്വരം:
കെട്ടിക്കിടക്കുന്ന വെള്ളത്തില് മുങ്ങി കുളിക്കുന്നവരിലും നീന്തുന്നവരിലും വളരെ അപൂര്വമായി ഉണ്ടാകുന്ന രോഗ ബാധയാണ് അമീബിക് മസ്തിഷ്ക ജ്വരം അഥവാ അമീബിക് എന്സെഫലൈറ്റിസ്. നേഗ്ലെറിയ ഫൗലേറി, അക്കാന്ത അമീബ, സാപ്പിനിയ, ബാലമുത്തിയ വെര്മമീബ എന്നീ അമീബ വിഭാഗത്തില്പ്പെട്ട രോഗാണുക്കള് തലച്ചോറിനെ ബാധിക്കുമ്പോഴാണ് രോഗം ഉണ്ടാകുന്നത്. ഇത് മനുഷ്യരില് നിന്നും മനുഷ്യരിലേക്ക് പകരുന്ന രോഗമല്ല.
രോഗ ലക്ഷണങ്ങള്:
തീവ്രമായ തലവേദന, പനി, ഓക്കാനം, ഛര്ദ്ദി, കഴുത്ത് തിരിക്കാന് ബുദ്ധിമുട്ട്, വെളിച്ചത്തിലേക്ക് നോക്കാനുള്ള ബുദ്ധിമുട്ട് എന്നിവയാണ് പ്രധാന രോഗ ലക്ഷണങ്ങള്
Content Highlihght: Amoebic encephalitis; Another person undergoing medical treatment in Kozhikode dies