ടെൻഡുൽക്കർ – ആൻഡേഴ്സൺ ട്രോഫിയിലെ ആദ്യ ടെസ്റ്റിൽ ഇന്ത്യയെ ഇംഗ്ലണ്ട് പരാജയപ്പെടുത്തിയിരുന്നു. ലീഡ്സിലെ ഹെഡിങ്ലിയിൽ നടന്ന മത്സരത്തിൽ അഞ്ച് വിക്കറ്റിന്റെ തോൽവിയായിരുന്നു ഇന്ത്യ വഴങ്ങിയത്. ഇതോടെ അഞ്ച് മത്സരങ്ങളുള്ള പരമ്പരയിൽ ആതിഥേയർ മുമ്പിലെത്തി.
രോഹിത് ശർമയും വിരാട് കോഹ്ലിയും വിരമിച്ചതിന് ശേഷം ക്യാപ്റ്റൻസി ഏറ്റെടുത്ത ശുഭ്മൻ ഗിൽ നയിച്ച ആദ്യ മത്സരമായിരുന്നു ഇത്. ആദ്യ ഇന്നിങ്സിൽ താരം സെഞ്ച്വറി കണ്ടെത്തിയിരുന്നെങ്കിലും ടീമിനെ വിജയിപ്പിക്കാനായിരുന്നില്ല. തോൽവിയ്ക്ക് പിന്നാലെ ഗില്ലിന്റെ ക്യാപ്റ്റൻസിയെ കുറിച്ച് വിമർശനങ്ങൾ ഉയർന്നിരുന്നു.
എന്നാലിപ്പോൾ താരത്തിന് പിന്തുണയുമായി എത്തിയിരിക്കുകയാണ് മുൻ ഇംഗ്ലണ്ട് താരം അലിസ്റ്റ്ർ കുക്ക്. പുതിയൊരു ക്യാപ്റ്റൻ ചുമതല ഏറ്റെടുക്കുമ്പോൾ ടീമിന് അതുമായി എപ്പോഴും അഡ്ജസ്റ്റ് ചെയ്യാൻ കുറച്ച് സമയമെടുക്കുമെന്ന് അദ്ദേഹം പറഞ്ഞു. ബെൻ സ്റ്റോക്സ് ഇംഗ്ലണ്ട് ക്യാപ്റ്റനായി വന്നപ്പോൾ പുതിയ രീതിയോട് ടീമംഗങ്ങൾക്ക് പൊരുത്തപ്പെടാൻ സമയമെടുത്തുവെന്നും കുക്ക് കൂട്ടിച്ചേർത്തു.
‘പുതിയൊരു ക്യാപ്റ്റൻ ടീമിന്റെ ചുമതല ഏറ്റെടുക്കുമ്പോൾ, ടീമിന് എപ്പോഴും അഡ്ജസ്റ്റ് ചെയ്യാൻ കുറച്ച് സമയമെടുക്കും. ഇംഗ്ലണ്ട് നായകൻ ബെൻ സ്റ്റോക്സിന്റെ കാര്യത്തിലും ഇതുതന്നെയായിരുന്നു സ്ഥിതി.
അവൻ ക്യാപ്റ്റനായപ്പോൾ ഞങ്ങൾ എല്ലാ പന്തും ആക്രമിച്ച് കളിക്കുമെന്നാണ് പ്രഖ്യാപിച്ചത്. എന്നാൽ, ഇംഗ്ലണ്ട് താരങ്ങൾ അതിനോട് പൊരുത്തപെടാൻ സമയമെടുത്തു,’ കുക്ക് പറഞ്ഞു.
അതേസമയം, ജൂലൈ രണ്ടിന് ബുധനാഴ്ചയാണ് ഇന്ത്യ പരമ്പരയിലെ രണ്ടാം മത്സരത്തിനിറങ്ങുന്നത്. ബെർമിങ്ഹാമിലെ എഡ്ജ്ബാസ്റ്റണാണ് വേദി. ഇതിനായുള്ള തയ്യാറെടുപ്പിലാണ് ഇരു ടീമുകളും.
ആദ്യ ടെസ്റ്റിൽ പരാജയപ്പെട്ടതോടെ വരാനിരിക്കുന്ന മത്സരങ്ങൾ ഇന്ത്യയ്ക്ക് ഏറെ നിർണായകമാണ്. രണ്ടാം മത്സരത്തിൽ ജയിച്ച് പരമ്പരയിൽ സമനില നേടുക എന്നതാണ് ഇന്ത്യയുടെ ലക്ഷ്യം. ശുഭ്മൻ ഗില്ലിന് വിജയത്തോടെ തുടങ്ങാൻ സാധിച്ചില്ലെങ്കിലും രണ്ടാം ടെസ്റ്റിൽ ഇന്ത്യ വലിയ പ്രതീക്ഷയുമായാണ് കളത്തിലിറങ്ങുക.
Content Highlight: Alister Cook supports Shubhman Gill’s captaincy as Ben Stokes’ leadership struggle as reference