മലയാള സിനിമയിൽ മാത്രമല്ല, തമിഴിലും ശ്രദ്ധേയമായ വേഷങ്ങളിലൂടെ പ്രേക്ഷകരുടെ മുന്നിലെത്തിയിട്ടുള്ള നടനാണ് മമ്മൂട്ടി. ഇപ്പോഴിതാ ധനുഷിനെ നായകനാക്കി രാജ്കുമാർ പെരിയസാമി സംവിധാനം ചെയ്യുന്ന ഓ.എം എന്ന തമിഴ് ചിത്രത്തിലൂടെ താരം വീണ്ടും തമിഴ് സിനിമയിലേക്ക് എത്തുകയാണ്. ചിത്രത്തിനായി നടത്തിയ പരിശ്രമങ്ങളെക്കുറിച്ചും സംവിധായകൻ രാജ്കുമാർ പെരിയസാമിയെക്കുറിച്ചും സിനിമയുടെ സെറ്റിലെ അനുഭവങ്ങളെക്കുറിച്ചും താരം സംസാരിച്ചു. ചിത്രത്തിന്റെ പ്രൊമോഷന്റെ ഭാഗമായി കൊച്ചിയിൽ നടന്ന പരിപാടിയിൽ സംസാരിക്കുകയായിരുന്നു മമ്മൂട്ടി.
‘ഇത് ഒരു മലയാളം സിനിമയല്ല, തമിഴ് സിനിമയാണ്. ഒരു മലയാള സിനിമയ്ക്ക് ഞാൻ നൽകുന്ന എഫർട്ടിന്റെ മൂന്നിരട്ടി ഈ സിനിമയ്ക്ക് നൽകിയിട്ടുണ്ട്. ഈ സിനിമയിലേക്ക് എന്നെ വിളിക്കുമ്പോൾ അഭിനയിക്കാൻ കഴിയുന്ന ഒരു അവസ്ഥയിലായിരുന്നില്ല ഞാൻ. സംവിധായകനോട് എനിക്ക് ബുദ്ധിമുട്ടാണെന്ന് പറഞ്ഞു. നിങ്ങൾക്ക് എപ്പോഴാണോ സൗകര്യം അപ്പോൾ ഷൂട്ട് ചെയ്യാമെന്നായിരുന്നു അദ്ദേഹത്തിന്റെ മറുപടി. അങ്ങനെ അഞ്ചെട്ട് മാസം കഴിഞ്ഞാണ് ഷൂട്ടിങ് തുടങ്ങിയത്.
എന്നെ അത്രത്തോളം ആവശ്യമുള്ള ഒരു സംവിധായകനാണ്, അങ്ങനെയൊരു സിനിമയാണെന്ന് എനിക്ക് തോന്നി. പത്ത്, നാൽപ്പത്, അൻപത് ദിവസം മതിയാകുമെന്ന് കരുതിയാണ് ഞാൻ ഷൂട്ടിന് സമ്മതിച്ചത്. എന്നാൽ അതിലും കൂടുതൽ ദിവസങ്ങൾ വേണ്ടിവന്നു. രാത്രിയും പകലുമൊക്കെയായിരുന്നു ഷൂട്ടിങ്. പക്ഷേ ഇവരുടെയെല്ലാം കൂടെ ആയിരുന്നതുകൊണ്ട് വലിയ ബുദ്ധിമുട്ടൊന്നും തോന്നിയില്ല. ഈ സിനിമയുടെ ചിത്രീകരണത്തിനായി രാവിലെ എഴുന്നേറ്റ് പോകാൻ തന്നെ ഒരു രസമായിരുന്നു. എല്ലാവരുടെയും ബഹളവും സന്തോഷവുമൊക്കെയായി നല്ലൊരു അന്തരീക്ഷമായിരുന്നു സെറ്റിൽ. മദ്രാസിലായിരുന്നതുകൊണ്ട് വീട്ടിൽനിന്ന് പോയിവരാനും സാധിച്ചു,’ മമ്മൂട്ടി പറഞ്ഞു.
സംവിധായകൻ രാജ്കുമാർ പെരിയസാമിയെക്കുറിച്ചും മമ്മൂട്ടി സംസാരിച്ചു. സിനിമയോടുള്ള അദ്ദേഹത്തിന്റെ ആവേശവും അറിവും എടുത്തുപറഞ്ഞ താരം, ചിത്രീകരണത്തിനിടയിലെ പ്രതിസന്ധികൾ കൈകാര്യം ചെയ്യുന്ന രീതിയെയും പ്രശംസിച്ചു.
‘സംവിധായകൻ വളരെ പാവം മനുഷ്യനാണ്. അദ്ദേഹത്തിന് ഭയങ്കര ആവേശവും ആഗ്രഹവുമുണ്ട്. സിനിമ അയാൾക്ക് കാണാപ്പാഠമാണ്. എന്തു ചോദിച്ചാലും സിനിമയുടെ എല്ലാ കാര്യങ്ങളും അറിയാം. ആൾ ഒട്ടും ദേഷ്യപ്പെടുന്നത് ഞാൻ കണ്ടിട്ടില്ല. ചില കാര്യങ്ങൾ തടസപ്പെടുമ്പോഴും ബുദ്ധിമുട്ടുകൾ ഉണ്ടാകുമ്പോഴും എന്തുകൊണ്ടാണ് ഇയാൾ ദേഷ്യപ്പെടാത്തതെന്ന് നമുക്ക് തോന്നും. എന്നാൽ അതൊക്കെ അദ്ദേഹം കൈകാര്യം ചെയ്യുന്നത് കണ്ടാൽ അത്ഭുതം തോന്നും. അത്ര സിമ്പിളായിട്ടാണ് പ്രശ്നങ്ങളെ നേരിടുന്നത്.
ചില സമയങ്ങളിൽ നമുക്ക് സ്ട്രെസ് ഉണ്ടാകും. രാത്രി ഒരുപാട് വൈകുമ്പോൾ അദ്ദേഹം ചിരിച്ചുകൊണ്ട് വന്ന് ‘സാർ, ഇപ്പോൾ കഴിയിപ്പിക്കാം’ എന്നൊക്കെ പറയും. അപ്പോൾ നമുക്ക് നോ പറയാൻ കഴിയില്ല. അത്രയും ദിവസം ഞാൻ അവിടെ നിന്നതുപോലും അദ്ദേഹത്തിന്റെ ഒരേയൊരു കാരണം കൊണ്ടാണ്,’ മമ്മൂട്ടി പറഞ്ഞു.
ചിത്രത്തിന്റെ കഥയും കഥാപാത്രവും തനിക്ക് ഏറെ ഇഷ്ടപ്പെട്ടുവെന്നും മമ്മൂട്ടി പറഞ്ഞു. യുവതാരങ്ങൾക്കൊപ്പം അഭിനയിക്കാൻ ലഭിച്ച അവസരവും ചിത്രത്തിന്റെ സെറ്റിലെ സൗഹൃദാന്തരീക്ഷവുമാണ് സിനിമയെ കൂടുതൽ സന്തോഷകരമായ അനുഭവമാക്കിയതെന്നും താരം വ്യക്തമാക്കി.
‘ഈ സിനിമയുടെ കഥയും കഥാപാത്രവുമെല്ലാം എനിക്ക് ഒരുപാട് ഇഷ്ടമായി. യുവതാരങ്ങൾക്കൊപ്പം ഞാൻ അഭിനയിച്ചിട്ടില്ല. രജനികാന്തിനൊപ്പം ഒകെ അഭിനയിച്ചിട്ടുണ്ട്. ശേഷം കുറെ നാളുകൾ കഴിഞ്ഞാണ് വീണ്ടും ഒരു തമിഴ് സിനിമയിൽ അഭിനയിക്കുന്നത്. ഈ സിനിമയുടെ മറ്റ് യൂണിറ്റിലുള്ളവരും ക്യാമറാമാനും മ്യൂസിക് ഡയറക്ടറും പ്രൊഡ്യൂസേഴ്സും കൂടെ അഭിനയിക്കുന്ന പ്രധാന താരങ്ങളും ചെറിയ വേഷങ്ങളിലെത്തുന്ന അഭിനേതാക്കളുമെല്ലാം ഭയങ്കര വൈബായിരുന്നു. എല്ലാവരും കൂടിയുള്ള ആ അന്തരീക്ഷം വളരെ സന്തോഷം നൽകുന്നതായിരുന്നു,’ മമ്മൂട്ടി കൂട്ടിച്ചേർത്തു.
ഓ.എം. Photo. Facebook.com
നവംബർ 20ന് റിലീസ് ചെയ്യുന്ന ഓ.എം രാജ്കുമാർ പെരിയസാമിയാണ് സംവിധാനം ചെയ്യുന്നത്. ധനുഷ് നായകനാകുന്ന ചിത്രത്തിൽ സിയ കാർത്തികേയൻ എന്ന പ്രധാന കഥാപാത്രത്തെയാണ് മമ്മൂട്ടി അവതരിപ്പിക്കുന്നത്. സായ് പല്ലവി, ശ്രീലീല എന്നിവരും ചിത്രത്തിൽ പ്രധാന വേഷങ്ങളിലെത്തുന്നുണ്ട്.
Content Highlight: Actor Mammootty spoke candidly about the Tamil film ‘O.M.’, director Rajkumar Periasamy, and his experiences on the film’s set.